Lamentations 3 - Yupik Bible

Anucimirqecetaarun, Umyuarniurun, Neryuniurun-llu

¹ Wiinga nallunritaqa qaillun ayuqucia anucimirqecetaarumallrem Agayutmek;

² elliin ayagcetaanga tan'germun tanqigtailngurmun.

³ Kaugtuarlua pinqigtaarlua mulngakevkenii.

⁴ Kemka amiqa-llu aruvkaraa, enrenkaa-llu ayemqelluki;

⁵ Kelucaucimaunga nangteqnarqelriami nanikuanarqelriami-llu;

⁶ tan'germi uitavkarlua ak'a tuqullertun.

⁷ Casguliraanga kalivnercirlua-llu anesciigalilua;

⁸ qayagaunge'rma ikayuusqeng'e'rma-llu piicauteka ciuniuqsaunaku,

⁹ ayalualua piyualartua avateka tamarmi capumiin teggalqunek qacarnernek.

¹⁰ Taqukatun utaqaanga, qeckarviklua-llu yugtutulitun.

¹¹ Tumyarat taqruatnun malirqerlua allgurraarlua unitanga.

¹² Urluvni qeluluku napataqaanga.

¹³ Pitegcautai itraqluteng tememnun iluqvanun.

¹⁴ Tamarmeng yuut temciarautek'langaatnga ernerpak apalluqaqlua yuarutmeggnun.

¹⁵ Nerevkalriatun ayuqelaraanga nangteqnarqelrianek.

¹⁶ Teggalqunek tamuavkaraanga, qamllermi-llu akaguartellua;

¹⁷ Yuucimkun uitanqegcisciigaliunga, angniryaram ayuqucia nalluyagulluku.

¹⁸ Ak'anun unguvangairutua; neryuniurutairucama Atanermi.

¹⁹ Umyuaqellra engellugtulallma uitavigkaitelallma-llu, wangni nangteqnarqelriaruuq cakneq.

²⁰ Umyuamni uitalartuq kesianek, assiilliqevkarlua.

²¹ Tau͡gaam una umyuamnun ek'aqan ataam neryuniurut'ngelartua:

²² Pektayiilnguq Atanrem kenkii taqsuituq, naklekutii-llu iquklicuunani;

²³ nutaraurrlainarluteng unuakut tamalkuita; piciulriaruavet cimiyuunak.

²⁴ Ataneq wiinga kiingan pikaqa, neryuniurutengqerrlua-llu elliinek.

²⁵ Atanrem utaqalgilriit ellminek yuarten̄i-llu elluarrluki auluk'larai.

²⁶ Taumek assirciquq yuum utaqakuniu nerinisngialliqevkenani anirtuutii Atanrem.

²⁷ Atawauciquq-llu yuum eliskuniu nerinisngialliqsuicaraq ayagyuallermini.

²⁸ Nangteqkuni aqumgakili nepaunani nerinisngialliqevkenani.

²⁹ Maligtaqulluni cikeskili nunamun, neryuniurutkangqerrsuartuq cali.

³⁰ Qacarcestem̄inun ulluvani maniliu, qanerrluutait ciuniurluki.

³¹ Tua-i Atanrem qessakerrlainarngailakut,

³² angniicet'lang'e'rmikut iluteqlerput tekilluku, takumcukciqaakut pektayiilnguq kenekni aturluku;

³³ tua-i pitsaqluni nangteqevkayuilamiki yuut.

³⁴ Atanrem nallunritaa yuucimteggun nangteqaqamta itercivigmi;

³⁵ Nallunrit'laraa wangkuta pikaput taicimanritaqata elliin cikiutekellni.

³⁶ Nalluvkenaku-llu piciunrilngurkun qanercetaarumaaqamta cuqcivigni.

³⁷ Yuk camek piurcisciigatuq Atanrem pivkanrilkani.

³⁸ Assilria assiilnguq-llu piurtelartuk alerquutii aturluku.

³⁹ Yuk qanemyuugayunaituq anucimirqecetaarumakuni assiilngillni pitekluku.

⁴⁰ Ayuqucirput yuvrirra'arluku uterrnaurtukut Atanermun.

⁴¹ Umyuarput ikirrluku piicagnaurtukut Agayutmun.

⁴² Assiilngillemten̄i inglulilluta, au͡g'aritenritarpekut Ataneq.

⁴³ Naklekilaucin eq'uqertellerpenek caquluku malirqerarpekut, tuqurqelluta takumcukevkenata;

⁴⁴ amirlutun caquuten elpenek eq'errutevnek, piicautemta pellugciigalkiinek.

⁴⁵ Yugnun ciqiciviksagucetarpekut.

⁴⁶ “Tamarmeng inglukestemta caunrilkaitkut picingssautekluta;

⁴⁷ alingnarqelria, nanikuayaraq piunriumayaraq-llu wangkuta aturarput;

⁴⁸ iigemnek aluviigka qurrlurtuk kuigtun yuunka piunriumiita.

⁴⁹ “Aluviigka iigemnek qurrlurciquk taqsuunatek,

⁵⁰ Atanrem uyanglluni pakmaken tangerrnatkaanun;

⁵¹ Umyuaqa uqamaituq tangerrluku qaillun arnat pimallrat nunamni.

⁵² “Cacetaanrilnge'rma inglukestem̄a yaqulegtun pissularaatnga;

⁵³ unguvalua petmigmun igcetaatnga teggalqumek-llu patuluku;

⁵⁴ mer'em akuliini umyuartequa, tuquqatartua wii.

⁵⁵ “Petmiim-llu iluanek wiinga qayagauramken Ataneq.

⁵⁶ Niicesqumallemni elpet niitarpenga!

⁵⁷ Qayagaullemni canimnun tailuten qanrutarpenga, ‘alingenrilu!’

⁵⁸ “Tuaken anagcetarpenga unguvaarkaurtellua.

⁵⁹ Piciunrilnguq caliarat wangnun tanglaran Ataneq, cuqcimakuma ikayuqia wii.

⁶⁰ Nallunritaten eq'ukilriit wangnek, picirkiurait-llu assiitellriit nalluvkenaki.

⁶¹ “Niitelaraten caunrilkuuraqatnga, nalluvkenaki-llu tamalkuita assiitellriit picirkiurait.

⁶² Ernerpak qanqelaraatnga picirkiurluteng tuaten.

⁶³ Unuakumek maktellermeggnek ayagluteng atakullranun picingssautek'laraatnga.

⁶⁴ “Elpet tau͡gaam, Ataneq, akilirciqaten caliarata ayuqiinek.

⁶⁵ Aniqlaagiki nanikuavkarluki!

⁶⁶ Ataneq, elpet malirqeraluki piunrirki, qiliit aciatni catairulluki.”