Judges 1 - Yupik Bible

Cirlakillrak Judah-nkuk Simeon-aaq-llu

¹ Joshua-m tuqullran kinguani Israel-aam yuin aptaat Ataneq, “Naliata kinguvellgutkellriartamta ciumek curugciqatki Canaan-aarmiut?”

² Ataneq kiuguq, “Kinguvellgutkellriari Judah-m ciumek ayagciqut. Cikiranka ataniullerkaanek nuna.”

³ Judah-llu qanertuq Simeon-aamun anelgutminun, “Maligesnga tamaavet nunamun wangnun cikiutngullermun, anguyagniarapuk Canaan-aarmiut; tuaten-llu wiinga maligciiqamken tamaavet nunamun elpenun cikiutngullermun.” Tua-i-llu Simeon-aam maligtaa.

⁴ Tua-llu Judah ayagtuq Atanrem-llu Canaan-aarmiut Perizz-aarmiut-llu cirlakevkarak; Bezek-aami-llu, cirlakiuk tiissitsaanek qulnek (10,000).

⁵ Tekitaat-llu Adonibezek-aaq Bezek-aami, anguyagluku-llu, cirlakluki-llu Canaan-aarmiut Perizz-aarmiut-llu.

⁶ Adonibezek-aaq-llu qimagtuq; tau͡gaam malirqeraat anguluku-llu, ayautek-llu keplukek putukuk-llu.

⁷ Adonibezek-aaq-llu qanertuq, “Yuinaat pingayun qulmek cipluku (70) angayuqat ayautait putukuit-llu kepumaluteng kaimllernek avulallruut estuuluma aciani; tuaten pillruamki, Agayutem akinauraanga ayuqiinek.” Taitaat-llu Jerusalem-aamun, tuani-llu yuunrirluni.

Judah-m Yuullgutkellriarin Cirlakaat Jerusalem-aaq Hebron-aaq-llu

⁸ Judah-m-llu anguyagtain curugaat Jerusalem-aaq, teguaqluku-llu. Yui-llu tuqurqait ekuavkarluku-llu nunarpak.

⁹ Taum-llu kinguani Judah-m anguyagtai atrartut anguyagyarturluki Canaan-aarmiut pengulilriami nunami uitalriit, acimi ingrit menglaitni, kinertellriami-llu nunami ungalalirnermeggni.

¹⁰ Ayagtut-llu inglulirluki Canaan-aarmiut Hebron-aami uitalriit nunarpiini Hebron-aam, aterpagcimalallermi ciungani Kiriath Arba-mek. Tuani cirlakait tungayakellriarit Sheshai-am, Ahiman-aam Talmai-am-llu.

Othniel-aam Cirlakaa Nunarpak Debir-aaq

¹¹ Tuaken-llu ayagluteng anguyagaat Debir-aam nunarpii, taum nalliini aterluni Kiriath Sepher-aamek.

¹² Iliit, at'lek Caleb-aamek, qanertuq, “Cikiutekciqaqa panika Achsah kassuucesqelluku kitumun angutmun teguaqestiinun Kiriath Sepher-aam.”

¹³ Othniel-aam, Caleb-aam kinguqlian Kenaz-aam qetunraan, teguaqaa nunarpak, tua-i-llu Caleb-aam cikiraa Achsah-mek kassuucesqelluku nuliqsagulluku.

¹⁴ Kassuutellermek erenrani Othniel-aam ellimerturaa kaigavikesqelluku atii naucetaarvigmek nunamek. Atrartuq-llu ciulvami qainganek, Caleb-aam-llu aptaa camek piyuucianek.

¹⁵ Ellii-llu kiuguq, “Elakanek piyugtua. Nuna cikiutellren kinertellriami nunami uitauq.” Tua-i Caleb-aam cikiraa qulliitnek aciqliitnek-llu mernek carvanilrianek.

Cirlakillrak Judah-nkuk Benjamin-aaq-llu Yuullgutkelriagken

¹⁶ Kinguvrin-llu Kenite-am, Moses-aam cakian, maligtait Judah-m yui tuaken nunarpagmek palm-anek napalilriamek yuilqurtaanun ungalalirneranun Arad-am Judah-mi. Tamaani nunaliut Amalek-aarmiunun ilaulluteng.

¹⁷ Judah-m-llu yuin maligtait Simoen-aam yui, ilikluteng-llu cirlakait Canaan-aarmiut Zephath-aam nunarpiini uitalriit. Aniqlaagaat nunarpak, piunrirluku, acirluku-llu Hormah-mek.

¹⁸ Atanrem ikayurai Judah-m yui, pikliutaat-llu qemililria nuna. Tau͡gaam teguaqenritaat Gaza, Ashkelon-aaq, Ekron-aaq-llu, avataitni-llu nunautait.

¹⁹ Tamakut yuut tamaanelnguut cen̄ami ayagassuutengqertut cavignek, taumek Judah-m yuin antesciigatellrukait.

²⁰ Hebron-aaq-llu cikiutekumauq Caleb-aamun, Moses-aam qanellruciatun; tuaken-llu Anak-aam pingayun tungayakellriit antai.

²¹ Tau͡gaam Benjamin-aam yuin antenritait Jebus-aarmiut Jerusalem-aami uitalriit, taumek man'a erneq engelkarrluku Jebus-aarmiut uitallgutek'larait Benjamin-aam yui Jerusalem-aami.

Kinguveqellriarin Ephraim-aam Manasseh-m-llu Teguaqaat Bethel-aaq

²² Kinguveqellriarin Ephraim-aam Manasseh-m-llu anguyagaat nunarpii Bethel-aam, taum nalliini aterpagcimalria Luz-amek. Atanrem-llu ikayuumai.

²³ Ayagceciut nalluatni yuvriastekanek,

²⁴ tangertut-llu angutmek anelriamek tuaken nunarpagmek, ellait-llu qanertut taumun, “Apertuuteqerkut iteryaraanek nunarpiim, wangkuta-llu qaillun pingaitamteggen.”

²⁵ Taum-llu apertuutai, Ephraim-aankuk-llu Manasseh-llu yuk'enka tuqutait tamalkuita nunarpiim yui, tau͡gaam tauna angun ilai-llu pivkenaki.

²⁶ Atatakuan angun tauna ayagtuq Hittite-at nuniitnun, nunarpaliluni-llu tuani, acirluku-llu Luz-amek, tuaten-llu aterpagcimauq una erneq tekilluku.

Israelite-at Antelqenrilkait Yuut

²⁷ Kinguvellgutkellriarin Manasseh-m antenritait yuut nunarpaitni Beth Shan-am, Taanach-aam, Dor-am, Ibleam, Megiddo-m, avataitni-llu nunacuaraat; Canaan-aarmiut-llu uitaurtut tamaani nunami.

²⁸ Israelite-at-llu piniriameng, Canaan-aarmiut umyugait aturcetevkenaki calisteksagutait, tau͡gaam nangqapiggluki antevkenaki.

²⁹ Kinguvellgutkellriarin Ephraim-aam antenritait Canaan-aarmiut nunarpiini Gezer-aam uitalriit, taumek Canaan-aarmiut uitaurtut ilagarluki.

³⁰ Zebulun-aam kinguvellgutkellriarin antenritait yuut nunarpaini Kitron-aam uitalriit, Nahalal-aami-llu, tau͡gaam Canaan-aarmiut uitaut ilagarluki, umyuateng-llu aturpek'naki calisten͞gurrluteng ellaitnun.

³¹ Kinguvellgutkellriarin Asher-aam antenritai yuut nunarpaini Acco-am uitalriit, Sidon-ami, Ahlab-ami, Achzib-ami, Helbah-mi, Aphik-ami, Rehob-ami-llu.

³² Asher-aam yui uitaut ilagarluki Canaan-aarmiut tamatum nunam yui, tua-i-wa ancimallrunrilata.

³³ Kinguvellgutkellriarin Naphtali-m antenritai yuut nunarpaini Beth Shemesh-aam uitalriit Bethanath-ami-llu. Naphtali-m yuin uitallgucirait Canaan-aarmiut nutem tamakurmiut, tau͡gaam umyuarit aturpek'naku calisteksagulluki.

³⁴ Amorite-at qessangraata ellimerturluki ayagcetait yuut kinguvellgutkellriarinek Dan-am qemililriamun nunamun atrarceteksaunaki-llu napailngurmun carr'ilqamun.

³⁵ Amorite-at uitaurtut Aijalon-aami, Shaalbim-aami, Ingrimi-llu Heres-aami, tau͡gaam kinguvellgutkellriartakek Ephraim-aankuk Manasseh-llu cakneq ataniurait umyugait-llu aturcetevkenaki calicitevkangluteng.

³⁶ Neglirnera Sela-m, Edomite-at nuniita cetran engelii ayagtuq Akrabbim Pass-akun.