Jude 1 - Yupik Bible

Ukverumacim Ciumurutellerkaanek, Cuqcillerkamek-llu

¹ Wii, Jude, Jesus Christ-am kevgaani, James-aam-llu anelgutiini, kelgumalrianun Agayutmi Atamten̄i kenkumalrianun qaunqumalrianun-llu Jesus Christ-akun;

² Takumcukun, uitanqegcin, kenka-llu elpecen̄un pingiinarlit.

³ Kenkumalriani, igarviksuumingramci anirtuumacimten̄ek, igaqataramci eguaqurluci arcaqanrulria pitekluku ukveq, ciumurucesqelluku cikiutekumaciatun ellualrianun.

⁴ Ukverumangualriit-llu agayuvigmun ilautengata, ak'a ciuqvani picirkiumalriit qanercetaarumaarkat, elluanrilnguut, Agayutem naklekutii iqlutun ciuniuqiit aglumakillermegteggun, ciuniurpek'naku-llu kiingan Atanerput Jesus Christ-aq.

⁵ Taumek watua neq'angevkaramci, ak'a nallunrillrungerpeciu man'a: Atanrem anirturraarluki yuut Egypt-aamek, kinguakun ukvenrilnguut piunrillrukai.

⁶ An'gilat-llu, ciuqliit elucirteng uniskiit, iivkaumalriit elliin qillerqumakai kalivnernek piunriyuilngurnek petmigmi tan'gercetellriami erneq angelria engelkarrluku qanercetaarumallerkaq.

⁷ Sodom-aarmiucetun Gomorrah-rmiucetun-llu avaqliicetun-llu, taukut akusrarutekiyulriit, yuum-llu atuyuilkiinek aglumakiyulriit kenerkun nipsuilngurkun anucimirqecetaarumallrat cuqyutkesqelluku.

⁸ Taukucetun cali ukut qailluitulriit kemegteng caarrluurtelaraat, atanrulriit cakaarluki, qigcignarqelriit-llu piciliutekluki.

⁹ Tau͡gaam an'gilat piunrata Michael-aam, tuunrangayagmek inglulirluni kiutaarutlermegni Moses-aam temii pitekluku, piciliutekluku inerquasciigataa; waten tau͡gaam qanerluni, “Atanrem inerqurliten.”

¹⁰ Ukut tau͡gaam yuut piciliutekiut taringumanrilkemeggnek; camek-llu nutem taringumange'rmeng ungungssitun cacirkailngurcetun, tamakutgun assiirutut.

¹¹ Nakleng taukut! Cain-aq kingunrirtuatgu, iqluurluteng-llu Balaam-aatun iqluqataryaaqellertun akingellerkani pitekluku, piunrirarkaugut-llu, Korah-m atanranek narurcilriim, maligcestain piunrillruciicetun.

¹² Nerevkariaqavci kenkuyutmek, taukut arenqianarqelartut, talluunateng nerervagaluteng, ellmeggnek-llu arcaqakluteng; amirlutun yukutailngurtun ayuqut anuqem ayagaskiitun; napatun-llu uksuarmi atsailngurtun nalamalriatun, qecuumalriatun mimernaminek.

¹³ Imarpiim-llu qairitun, qapugmek egqaqilriacetun kasngunarqelrialillermeggnek, agyacetun-llu picimegcetun ayagalriacetun. Taukut nunakangqertut petmigmi tan'gercetellriami akwanun.

¹⁴ Enoch-aam-llu, Adam-aam kinguvrin malrunlegurutiita, qanrutkellrui ukut yuut, qanerluni, “Tangerrluku, Ataneq tekituq tiissitsaarugarnek ellualrianek maligluni,

¹⁵ qanercetaaryarturluki tamalkuita, picirkirluki-llu arcaqanqerrulriit elluanrilngurmek atullrat pitekluku, anagutellrat-llu, assiilngiumalriit-llu, Agayutem qigcikenricestain qancurlallrat ellii tungiinun, pitekluku.”

¹⁶ Makut qanemyuugartut, elaraluteng-llu, aglumayullerteng maliggluku, qanpagalluteng-llu ucuryaggluteng, ilateng-llu nanramciluki unangellerkarteng umyuaqluku.

¹⁷ Tau͡gaam kenkumalriani, neq'akiciki nallunairutait apostle-aarin Atanemta Jesus Christ-am.

¹⁸ Ellaita qanrutaiceci, “Nangneqlirmi piciliutekilriartangqerciquq, aglumayullerteng arcaqanqerrullerteng-llu maliggluku.”

¹⁹ Maa-inguut avtelalriit ilameggnek, nunamiutaam cumigucestai, Anerneq-llu avaliqevkenaku.

²⁰ Tau͡gaam elpeci, kenkumalriani, naucici elpecen̄ek ukverpeciuggun tanqilriakun pinrulriakun; piicalaqici-llu Anernerkun Tanqilriakun.

²¹ Agayutem kenkiini uitaurqici; neryuniurutkiciu takumcukutii Atanemta, Jesus Christ-am, unguvamun nangyuilngurmun.

²² Ukvertelluki-llu nalirrugtellriit;

²³ allat-llu anirturciki, kenermek nuggluki, allat-llu takumcukiciki qigcigyugluci, pelleqluki aturat kemgem iqaurtellri.

²⁴ Wani-wa elliinun nayumiqayugngastevcen̄un, carr'unaci-llu tunyugngaluci ucurnarqucian ciuqerranun angnirpagluci.

²⁵ Elliinun kiimi Agayutngulriamun, Anirturtemten̄un, Atanemteggun Jesus Christ-akun, pikevkararkaugut ucurnarqun, takarnarqun, angayuqauvik, piyunarquciq-llu akwanek, watua-llu maa-i, akwanun-llu. Amen.