Jonah 3 - Yupik Bible

Jonah-m Atanrem Pisqutii Niitaa

¹ Tua-llu ataam Ataneq qanenqigtuq Jonah-mun.

² Qanerluni, “Nineveh-mun, nunarpagmun ayii, qalarulluki-llu qaneryaramek wii pisqellemnek.”

³ Tua-i Jonah-m niilluku Ataneq ayagtuq Nineveh-mun, tauna angengami nunarpak piyualuni iquanek amavet engeliinun ayagnaqluni ernerrluni pingayunek.

⁴ Tua-i Jonah itrami nunarpagmun ernerpak tarriqaarluni qanertuq, “Erenret yuinaak malruk (40) kinguatni Nineveh piunriumaarkauguq!”

⁵ Yuut-llu Nineveh-rmiut ukveqaat Agayutem qanrutkesqellra. Yuut-llu alerqurait nereksaunaki yagyaraq atuusqelluku, tamarmeng-llu yuut, piuranmeggnek ayagluteng pikegtaunrillmeggnun, missuullernek at'ut tuatnallermegteggun umyualinqigtellerteng maniluku.

⁶ Tua-i-llu Nineveh-rmiut angayuqrata qaneryaraq niicamiu nangertuq atanruviim aqumlleranek, aturani-llu yuuluki missuullernek all'uni, qamllermun-llu aqumluni.

⁷ Picirkiun-llu ayagcetaa Nineveh-rmiunun tamalkuitnun waten: “Una picirkiutnguuq angayuqamek tungliinek-llu: Kina ner'arkaunrituq camek; yuunge'rmi, ungungssiunge'rmi, katngaungermeng-llu camek nerenrilkilit merpek'nateng-llu.

⁸ Yuut ungungssit-llu missuullernek askilit. Yuut tamarmeng ilungluteng kaigakilit Agayutmun, tamarmeng-llu tuigglit assiilnguullermeggnek peggluku-llu assiilnguq caliarteng.

⁹ Tayima Agayutem picirkiurani cimirciqlia; tayima-llu eq'urtellra pellugciquq, wangkuta-llu piunrinricen̄arluta!”

¹⁰ Agayutem-llu tangrraa umyualinqigtellrat pegcillrat-llu assiilngurmek caliameggnek. Elliin-llu umyuani cimiraa picirkiullni-llu ellaitnun pinricen̄arluku.