Jonah 2 - Yupik Bible

Jonah-m Piicautii

¹ Tua-llu Jonah piicagtuq Atanermun Agayutminun neqem anrutaan iluanek, qanerluni:

² “Nanikuallemni Ataneq qayagaullruamken, elpet-llu niillua. Camaken tuqum iluanek qayagaullemni ikayungcarlua, niitellruarpenga.

³ Tua-i-wa elpet egtellruarpenga et'ulriamun, camavet et'uqranun imarpiim, mer'em-llu avatairlua, qairpagpet-llu qaingiralua.

⁴ Umyuartequa-llu ciuqerpenek ayagcecimayuklua ataam tangenqiggngaunaku tanqilria Agayuvigpiin.

⁵ Mer'em qaingiraanga aneryaarciigatevkarlua; imarpiim patulua tamarmirrlua, imarpiim-llu irnerrluguari nemrulluteng qamiqumnun.

⁶ Atrartua-llu ingrit camavet tusngallrata aciatnun, nunamun tuavet ikirtuqri kelucaumaarkanun akwarpak. Tau͡gaam elpet, Ataneq Agayutmaa, tuaken et'uqapigtellriamek nugtarpenga unguvatuumarma.

⁷ Ciunerkairutlemni-llu anerneriqatarlua, tuani, Ataneq piicagvikamken, elpet-llu tanqilriami Agayuvigpagpeni niillua.

⁸ Imkut caunrilngurnun agayutnguanun agayulalriit cakaaraat elpenun piciuluteng caumallerkarteng.

⁹ Tau͡gaam wii nanrarciqamken; elliiciqua-llu elpenun ekuagarkamek akqutkellrenka-llu aturluki. Anirturiyaraq Atanrem pikaa!”

¹⁰ Atanrem-llu pisqen͞gani neqerpiim Jonah miryaraa cen̄amun.