John 7 - Yupik Bible

Agayunerpaliyallrat Jerusalem-aamun

¹ Tamakut kinguatni Jesus-aaq Galilee-ami pektellruuq, Judea-mi pektenrirluni, tua-i Jews-aat tuquituatni.

² Wani-wa-llu Jews-aat agayunerpiit Talicirvik mallgiuq.

³ Taumek anelgutain qanrutaat, “Kitaki Judea-mun ayii, elitnaurarpet caliaten tangerrnaurait,

⁴ yuk-wa aassaqluni calingaituq yugnun nallunritesqumalria. Makunek pilaquvet nunamiunun elpenek nasvii.”

⁵ Tua-i nakmiin ilain-llu ukveqenrilatgu.

⁶ Taumek Jesus-aam qanrutai, “Pillerkaqa pinariksaituq, tau͡gaam elpeci pillerkarci upingarrlainartuq.

⁷ Ellamiut uumikngaitaiceci, wii tau͡gaam uumikaatnga, tua-i nalqigcilaama caliarita assiiluciatnek.

⁸ Agayunerpaliyarci, wii agayunerpaliyarngaitua watua, pillerkaqa tekiteksailan.”

⁹ Makunek qanrraarluni, Galilee-ami cali uitauq.

¹⁰ Tau͡gaam ilani agayunerpaliyaata, nutaan ellii-llu mayullruuq nalluvkarluni.

¹¹ Taumek Jews-aat agayunerpagmi yuaraat, qanerluteng, “Nanta?”

¹² Yugugaat-llu qanemyuugautekaat cakneq; ilait qanraqluteng, “Assilriaruuq,” allat tau͡gken qanerluteng, “Qang'a, yugnek iqlutmuruciuq.”

¹³ Tau͡gken yuut takuatni qanrutkenritaat, Jews-aat alikngamegteki.

Agayuvigpagmi Elitnaurillra

¹⁴ Agayunerpiim-llu qukallrani Jesus-aaq Agayuvigpagmun itellruuq, elicungcariluni-llu.

¹⁵ Tua-i-llu Jews-aat alangaarutkaat qanerluteng, “Qaillun uum igat nallunrirtaki, elitnaullruvkenani?”

¹⁶ Jesus-aam kiugai, “Elitnaurutka wii pikenritaqa, ayagcestem̄a pikaa.

¹⁷ Kia imum pisqutiinek aturyulriim elitnaurutka taringeciqaa, wall'u Agayutmek kingunengqerrucia, wall'u wangnek.

¹⁸ Kina imna ellminek qalartellria nanrautekaminek yualartuq, tau͡gken ayagcestem̄i nanrautekaanek yualria, tauna piciuguq, elliini-llu elluanrilngurtaituq.

¹⁹ Moses-aam-qaa alerquutnek cikinritaaci? Ilavci-llu aturciiganaki. Ciin tuquiturcecia?”

²⁰ Yugugaat kiugaat, “Anernerrlungqertuten! Kia tuquiturtaten?”

²¹ Jesus-aam kiugai, “Ataucimek calillruunga, tamarpeci-llu alangaarutkarci tauna.

²² Moses-aam nuugiryaramek cikillruaci, (tua-i Moses-aamek pinricaaquq, ciuliavcen̄ek tau͡gaam), Sabbath-aami-llu yuk nuugilararci.

²³ Yuk Sabbath-aami nuugiumakan, Moses-aam picirkiutii uniurtenritengnaqluku, ciin cangaksecia yuum qainga tamalkuan canrircetellrukumku Sabbath-aami?

²⁴ Tangellrakun cuqcinrici, elluallrakun tau͡gaam cuqcikici.”

²⁵ Jerusalem-aarmiut ilait qanertut, “Waniwaunrituq-qaa tuquitullrat?

²⁶ Tangerrluku, yuut takuatni qallatellria, inerqunritaat-llu! Atanrulriit-qaa Christ-aucia nallunricaaqaat?

²⁷ Wangkuta-wa uum kingunra nallunritarput. Tau͡gaam Christ-aq tekiskan kingunranek nallunrilngurtaiciiquq.”

²⁸ Jesus-aaq-llu qastuluni elicungcariuq qanerluni, “Nallunricaaqerpecia, kinguneqa-llu nalluvkenaku. Tau͡gaam wangnek tekitenritua, ayagcesteka-llu piciuguq; tauna nalluarci.

²⁹ Wiinga nallunritaqa, elliinek kingunengqerrama, ayagcetellrulua-llu elliin.”

³⁰ Nutaan tegungnaqsaaqaat, tau͡gaam atauciunger'mi yuum yaggvikenritaa, pillerkaa tekiteksailan.

³¹ Tau͡gaam yugugaat amlleret ukvervikaat, qanerluteng, “Christ-aq-qaa tekiskuni irr'inarqelrianek uum calillrin amllenritnek piciquq?”

³² Pharisee-aat-llu yugugaat qanemyuugautiitnek niitut, agayulirten͞gunret-llu Pharisee-aat-llu atanerruarit ayagcetait tegusqelluku.

³³ Taumek Jesus-aam qanrutai, “Ellma cali nayurciqamci, ayagciqua-llu ayagcestemnun.

³⁴ Yuarciqerpecia nataqevkenii-llu, ayagvigkamnun-llu tekisngaunaci.”

³⁵ Taumek Jews-aat qanruyutut, “Natmun una ayagciqa nataqngailkemten̄un? Wall'u-qaa ayagciqliuq skavingalrianun Greek-aat nuniitni, Greek-aat-llu elicungcarluki.

³⁶ Cauga man'a qanellra qanerluni, ‘Yuarciqerpecia nataqevkenii-llu,’ cali-llu, ‘Ayagvigkamnun-llu pisciiganaci’?”

³⁷ Ernermi nangneqlirmi agayunerpallratni, ernermi taumi angenrulriami, Jesus-aaq nangertuq, qastuluni-llu qanertuq, “Kina imna meqsukuni, wangnun tailuni merli.

³⁸ Wangnun ukvelria, qaneryaraqegtaaraam qanruciatun, ‘Iluminek mermek unguvatalegmek uryurciquq.’”

³⁹ Tau͡gaam mat'umek qanertuq Anerneq Tanqilria umyuaqluku, tamatumek elliinun ukvelriit unangarkaungata. Wani-wa Anerneq Tanqilria tut'eksaunani, tua-i Jesus-aaq ucurnariksailan.

Yuut Ayuqenrillrat

⁴⁰ Taumek yugugaat ilaita mat'umek qanellranek niicameng, qanertut, “Ilumun una prophet-aarulliniuq.”

⁴¹ Allat qanertut, “Una Christ-auguq.” Tau͡gaam ilait qanertut, “Christ-aq-qaa Galilee-amek kingunengqerciquq?

⁴² Qaneryarat-llu-qaa aperturinritut Christ-aq David-aam kinguvrinek kingunengqerrarkauniluku, Bethlehem-aamek-llu David-aam nunallranek?”

⁴³ Tua-i-llu yugugaat ayuqenriqertut ellii pitekluku.

⁴⁴ Ilaita-llu teguyugyaaqaat, tau͡gaam yuum yaggvikenritaa.

⁴⁵ Atanerruarit taumek utertut agayulirten͞gunernun, Pharisee-aanun-llu; taukut-llu aptait, “Ciin taitenriceciu?”

⁴⁶ Atanerruarit kiugut, “Arenqiatuq, yugmek uutun qallatellriartangeksaituq!”

⁴⁷ Taumek Pharisee-aat kiugait, “Elpeci-llu-qaa iqlutmurcimauci?

⁴⁸ Atam, atanret-qaa wall'u Pharisee-aat ukvervikaat?

⁴⁹ Tau͡gaam yugugaat cailkaat, alerquutet nalluamegteki aniqlaamaut.”

⁵⁰ Nicodemus-aam, elliinun ciuqvaarni ullautellrem wani-wa-llu ilakngatni, qanrutai,

⁵¹ “Picirkiutemta-qaa, yuk tungaunaku niiterraarpek'naku caliari-llu taringevkenaki, cuqtarkaugaa?”

⁵² Kiugaat, “Elpet-llu-qaa Galilee-armiunguuten? Yuvria, taringeciquten Galilee-amek prophet-aam taigarkaunrilucianek.”

⁵³ Tamarmeng-llu nakmiin enemeggnun utertut.