John 6 - Yupik Bible

Tiissitsaanek Tallimanek Nerevkarillra

¹ Makut kinguatgun Jesus-aaq Galilee-am imarpian akilirneranun qerallruuq. Tiberias-aam imarpianun.

² Yugugaat-llu maligtaat, irr'inarqelrialiari tangrramegteki apqucilegni caliaqellri.

³ Jesus-aaq-llu elitnauraminek ilaluni ingrimun mayurtuq, aqumluni-llu tuavet.

⁴ Jews-aat-llu Agayunerpiit, Paaskaaq, mallgiuq.

⁵ Jesus-aaq-llu ciugcami, yugugaat tangrrai ellminun ullautellriit. Philip-aamun-llu qanertuq, “Naken-mi kelipautengciqseta, makunun nerevkautekamten̄ek?”

⁶ Makunek qanertuq naspaanaluku, tua-i elliin cacirkaucini nallunricaaqaa.

⁷ Philip-aam kiugaa, “Akit yuinaq akimiarmek cipluku kelipanun tunnge'rmeng nuruciiqut ellma iqemkang'e'rmeng.”

⁸ Tua-i-llu elitnaurain iliit Andrew, Simon-aam Peter-aam amaqlia, elliinun qanertuq,

⁹ “Tan'gaurlurtangqerrsaaquq maani kelipautellegmek tallimanek, neqek-wa malruk, tau͡gaam cauciqat taukut makuni yugugarni?”

¹⁰ Tua-i-llu Jesus-aam qanrutai, “Yuut aqumevkarciki.” Yuut-llu aqumut, tamana canlian, amllertaluteng-llu tiissitsaat talliman engelkarrluki.

¹¹ Tua-i-llu Jesus-aam kelipat neqek-llu tegui, quyatmek-llu piicaumariami, aqumgalrianun aruqutkai piyugtaciicetun.

¹² Kainriata-llu, elitnaurani qanrutai, “Kaimllerit quyurciki, carraungraan cagmanritnaurtuq.”

¹³ Tamakut-llu quyurtait, kalngat-llu qulen malrugnek cipluku imirluki, tuaken kelipanek tallimanek nerellret ilakuaritnek.

¹⁴ Yuut-llu irr'inarqelrialiara tangrramegteggu, qanertut, “Wani-wa ilumun prophet-aarulliniuq imna nunamun tekitarkaq!”

¹⁵ Jesus-aaq-llu elpengami ataneqsuuciminek, unitai ingrimun kiimi ayagluni.

Nanvami Piyuallra

¹⁶ Atakuan-llu elitnaurai nanvamun atrartut,

¹⁷ angyamun-llu ekluteng, Galilee-am nanvaakun qerartut Capernaum-aamun. Kiituani-llu tan'geriuq, Jesus-aaq tekipailgan ellaitnun.

¹⁸ Waniwa-llu qailingluni anuqengan.

¹⁹ Cavluteng ayangnaqlermeggni mile-at pingayun cipluki yaaqsigtariqerluteng, Jesus-aaq tangrraat mer'em qaingakun piyuallrani, angyaq-llu mallgiluku. Tua-i taukut alingut.

²⁰ Tau͡gaam elliin qanrutai, “Wanguunga, alingenrici.”

²¹ Nutaan-llu angyamun ekesqumaat; ak'anurrlitevkenateng-llu nunamun ciunermeggnun tekilluteng.

Unguvatalek Kelipaq

²² Unuaquani-llu yugugaat Galilee-am nanvaan akiani cen̄avartut, nalluvkenateng angyam atauciullrucianek, Jesus-aaq-llu elitnauraminun ilaliulluni angyamun ekellrunrilucianek.

²³ Tau͡gaam, angyat Tiberias-aamek, Atanrem quyatmek piicaggaarluni yugnek kelipanek nerevkarillran yaaqsinrilkiinek, tuavet tekitut.

²⁴ Yugugaat-llu Jesus-aam elitnaurain-llu tuantenriluciat elpekngamegteggu, angyamun ekluteng Capernaum-aamun ayagtut, Jesus-aaq yuarluku.

²⁵ Nataqngamegteggu-llu nanvam akilirnerani qanrutaat, “Ayuqucirturtaa, qangvaq tekicit maavet?”

²⁶ Jesus-aam kiugai, “Ilumun, ilumun, qanrutamci: elpeci-wa yuararpecia, irr'inarqelriit tangelci pitkevkenaki, tau͡gaam kelipanek nerrlerci pitekluku kainrillerci-llu.

²⁷ Taumek neqkamun piunrirarkamun cumigtenrici, tau͡gaam cumiguciu neqkaq unguvamun nangyuilngurmun aturarkaulria, tamatumek Yuum Qetunraan cikirciqaaci; tua-i ellii Aatam, wani-wa Agayutem nallunailkucillrua.”

²⁸ Tua-i-llu qanrutaat, “Qaillun-mi piluta Agayutem caliarinek caliciqseta?”

²⁹ Jesus-aam kiugai, “Waniwauguq Agayutem caliara, ayagcetellranun ukvequvci.”

³⁰ Taukut-llu cali qanrutaat, “Qaillun ayuqelriamek nallunailkutmek piciqsit tangrrarkamten̄ek, ukveqnaamteggen? Camek taqutelarcit?

³¹ Ciuliaput kelipayagarnek yuilqumi nerlallruut igausngaciicetun, ‘Elliin kelipamek neqkaatnek qilagmek cikillrui.’”

³² Taumek Jesus-aam pii, “Ilumun, ilumun, qanrutamci, Moses-aarunrituq kelipamek qilagmiutarmek cikirturilria, tau͡gaam wii Atama kelipapiamek qilagmiutarmek cikilaraaci.

³³ Tua-i kelipaq Agayutem pia qilagmek pilartuq, nunamiut unguvakiutiit.”

³⁴ Nutaan piat, “Ataneq, kelipamek mat'umek cikiumarrlainaqikut.”

³⁵ Jesus-aam qanrutai, “Wiinga wani-wa unguvatalek kelipaq. Wangnun tailria kaigngaituq, cali-llu wangnun ukvelria meqsugngaunani watqapik.

³⁶ Tau͡gaam elpecen̄un qanellrucimtun, tangerrsaaqeng'erpecia ukveqsaituci.

³⁷ Tamarmeng Atama wangnun cikiutekellrin ullagciqaatnga; wangnun-llu ullautellria ayaksugngaitaqa watqapik.

³⁸ Tua-i wiinga qilagmek tekitua, pisqutka aturarkauvkenaku, tau͡gaam ayagcestem̄a pisqutii aturarkauluku.

³⁹ Wani-wa-llu ayagcestem̄a pisqutii, wangnun tunellrin iliitnek atauciungraan tamarisqevkenii, tau͡gaam ernermi nangneqlirmi tamakunek makcisqaanga.

⁴⁰ Wani-wa-llu Atama pisqutii, Qetunramek tangvagluteng ukvelriit unguvamek nangyuilngurmek pingesqelluki, wiinga-llu maktarkauluki ernermi nangneqlirmi.”

⁴¹ Tua-i-llu Jews-aat qanemyuugautekaat qanellra, qanellruan waten, “Wiinga kelipaugua qilagmek tekillua.”

⁴² Qanertut-llu, “Una-qaa Jesus-aarunrituq, Joseph-aam qetunraa? Angayuqaak-llu nallunritagput? Ciin-mi maa-i qanerta qilagmek tekitniluni?”

⁴³ Jesus-aam kiugai, “Qanemyuugautenrici.

⁴⁴ Aatam ayagcestem̄a tau͡gaam unayaqek'ngaan ullagarkaugaanga, wiinga-llu maktarkauluku ernermi nangneqlirmi.

⁴⁵ Prophet-aat igaitni igausngauq waten, ‘Ellait-llu tamarmeng Agayutmek ayuqucirtuumaarkaugut.’ Taumek yuk tamarmi Atamek niitellria, elitellria-llu wangnun tailartuq.

⁴⁶ Yuum-wa Aata tangeqsaitaa, taum tau͡gaam Agayutmek kingunelgem Aata tangellrua.

⁴⁷ Ilumun, ilumun, qanrutamci, kina imna ukvelria unguvamek nangyuilngurmek pinguq.

⁴⁸ Wiinga wani-wa unguvatalek kelipaq.

⁴⁹ Ciuliaci kelipayagarnek yuilqumi nerellrung'e'rmeng tuqullruut.

⁵⁰ Wani-wa kelipaq qilagmek tekitellria, yuk tuaken neresqelluku tuqusqevkenaku-llu.

⁵¹ Wiinga wani-wa kelipaq unguvalria qilagmek tekitelleq, kina imna kelipamek uumek nerkuni, unguvaarkauguq nangyuilngurmek, tua-i wani-wa kelipaq cikiutekaqa, kemkaqa ellamiut unguvakiutekaat.”

⁵² Tua-i-llu Jews-aat ayuqenriqertut qanerluteng, “Qaillun-mi uum yuum kemni neqkiutekciqau wangkutnun?”

⁵³ Jesus-aam pii, “Ilumun, ilumun, qanrutamci, Yuum Qetunraan kemganek nerenrilkuvci, auganek-llu menrilkuvci, unguvaituci elpeci.

⁵⁴ Kememnek nerelria, aumnek-llu melria, unguvamek nangyuilngurmek pinguq, wiinga-llu maktarkaugaqa ernermi nangneqlirmi.

⁵⁵ Wani-wa kemka neqkaupiartuq, auka-llu merkaupiarluni.

⁵⁶ Kememnek nerelria aumnek-llu melria wangnetaurciquq, wiinga-llu elliinetaurlua.

⁵⁷ Aatam unguvalriim wangnek ayagcecillruciatun, wiinga-llu unguvalua Aata pitekluku, tuaten cali wangnek nerelria unguvaciquq wii piteklua.

⁵⁸ Maa-i kelipaq qilagmek tekitelleq ciuliacetun pinrituq, taukut nerellruyaaqut tau͡gken tuquluteng; mat'umek kelipamek nerelria unguvaarkauguq nangyuilngurmek.”

⁵⁹ Makunek agayuvigmi qanellruuq Capernaum-aami ayuqucirturillermini.

⁶⁰ Taumek elitnaurain amlleret, makunek niicameng qanertut, “Caperrnaqvaa-lli makuni qanellrini; kia-kiq niicugniniartaki?”

⁶¹ Tau͡gaam Jesus-aam elitnaurani taringamiki qanemyuugauciatnek makunek, qanrutai, “Makut-qaa cangayugcetaiceci?

⁶² Qaillun-mi piyarceci Yuum Qetunraa tangerquvciu mayurtelluku uitallranun?

⁶³ Anerneruuq unguvamek cikiqengelria, kemek catnguksaituq. Elpecen̄un qanrutkellrenka anerneruut unguvauluteng-llu.

⁶⁴ Ilavci tau͡gaam ilait ukvenritut.” Tua-i Jesus-aam piqarraallerminek imkut ukvenrilnguut nallunritai, imna-llu tunestekani.

⁶⁵ Qanertuq-llu, “Man'a pitekluku qanrutellruamci yugmun ullagciigatnilua, Aatam tau͡gaam ullaucunarivkaqani wangnun.”

⁶⁶ Taum kinguani elitnaurai amlleret utertut, maligtenrirluku-llu.

Peter-aam Nallunairillra

⁶⁷ Taumek Jesus-aam imkut qulen malrugnek cipnelget qanrutai, “Elpeci-llu-qaa ayagciquci?”

⁶⁸ Simon-aam Peter-aam kiugaa, “Ataneq, kitumun ayagciqseta? Elpet tau͡gaam qaneryarangqertuten unguvamek nangyuilngurmek iqulegnek.

⁶⁹ Wangkuta-llu ukvellruukut, nallunritamteggen-llu taungucirpenek Agayutem Ellualriara.”

⁷⁰ Jesus-aam kiugai, “Cucukellrunritamci-qaa qulnguluci malrugnek cipluci, ilasi tau͡gaam tuunrangayauluni?”

⁷¹ Maa-i elliin qanrutkaa Simon-aam, Iscariot-aarmium qetunraa Judas-aaq, tua-i tauna qulen malrugnek cipnelget iliit tunestekani.