John 20 - Yupik Bible

Maktellra

¹ Tua-i-llu nitilim erenrin ciuqliatni Mary Magdalene-aq unuayaarmi erqaarallrani qungumun tekituq, tangerrluku-llu teggalquq au͡gaumaluni qungumek.

² Tua-i-llu aqvaqurluni Simon Peter elitnauraq-llu imna Jesus-aam kenkekii ullagartak, qanrullukek, “Ataneq qungumek ayautelliniat, natmun-llu elliciat nalluarput.”

³ Tua-i Peter elitnauraq-llu tauna aipaa ayagtuk qungumun.

⁴ Tamarmek-llu aqvaqurlutek; elitnauraq-llu tauna Peter-aami uqilanruami ciumek qungumun tekituq.

⁵ Pull'uni uyangcami 'lumarrat tuanelnguut tangrrai, tau͡gken iterpek'nani.

⁶ Kinguakun Simon Peter tekicami, qungumun itertuq, 'lumarrat-llu tuanelnguut tangrrai ellimalriit,

⁷ 'lumarraq-llu Jesus-aam qamiqurran patullra allakaumaluni imgumauq.

⁸ Tua-i-llu elitnauraq tauna aipaa ciumek qungumun tekitelleq itermiuq, tamakut-llu tangrramiki ukvertuq.

⁹ Wani-wa tuqumalrianek makyucirkaanek igaumacia nalluat.

¹⁰ Tua-i-llu elitnaurak taukuk kingunermegnun ayagtuk.

Alaiqerraallra Magdalene-amun

¹¹ Tau͡gaam Mary qungum elatiini nangengqauq qialuni, tuaten-llu put'uq uyanglluni qungumun.

¹² Tangerrlukek-llu an'gilak malruk qatellrianek aturalgek, Jesus-aam temiin enellrani aqumgalutek, aipaa qamiqurran enellrani, aipaa-llu it'gain enellratni.

¹³ Taukuk qanertuk elliinun, “Arnaaq, ciin qiasit?” Kiugak, “Ataneqa ayautelliniatgu natmun-llu ellicia nalluamku.”

¹⁴ Waten-llu qanrraarluni tuigtuq, Jesus-aaq-llu tangerrluku, tau͡gaam elitaqevkenaku.

¹⁵ Jesus-aam-llu qanrutaa, “Arnaaq, ciin qiasit, kina yuarciu?” Naucetaarviliurten͞guyukluku kiugaa, “Usuuq, elpet ayautellrukuvgu apertuusnga natmun ellicirpenek, tua-i teguyarturnaurqa.”

¹⁶ Jesus-aaq-llu qanertuq elliinun, “Mary.” Kingyarluku taum pia Hebrews-aacetun, “Rabboni!” (Wani-wa waten ayuquq “Ayuqucirturta.”)

¹⁷ Jesus-aam qanrutaa, “Agturyaqunii, Atamnun cali mayuqsailama; tau͡gaam ilanka qanrucarturki, mayuqatartua-gguq Atamnun, Atavcen̄un-llu, Agayutemnun Agayutevcen̄un-llu.”

¹⁸ Mary Magdalene-aq-llu tekituq elitnauranun qanrulluki-llu, “Ataneq tangrraqa,” cali-llu tuaten ellminun qallatniluku.

Elitnauraminun Alaillra

¹⁹ Tua-i-llu erenrem taum atakuani, nitilim erenrin ciuqliatni, elitnaurat quyungqavikellrata amiigit kelucaumaluki, Jews-aanek alingluteng, Jesus-aam tekitai, qukaatni-llu nangengqaluni qanrutai, “Uitanqegcici.”

²⁰ Waten qanrraarluni, unatminek caniqaminek-llu nasvitai. Elitnaurat-llu angnirtut Ataneq tangrramegteggu.

²¹ Tua-i Jesus-aam qanrutenqigtai, “Uitanqegcici, Atamnun ayagtessucimtun, tuaten ayagcetamci.”

²² Waten-llu qanrraarluni, cupai, qanrulluki-llu, “Anerneq Tanqilria piksaguciu.

²³ Kinkut imkut assiilnguitnek au͡g'ariskuvceteng, au͡g'arisngaciqut, kinkut-llu imkut assiilnguitnek au͡g'aritenrilkuvceteng, au͡g'arisngangaitut.”

²⁴ Tau͡gaam Thomas-aaq, taukut qulen malrugnek cipnelget iliit, malrimek aterpagcimalria, ilakellrunritaat Jesus-aaq tekitellrani.

²⁵ Tua-i elitnauraullgutain qanrutaat, “Ataneq tangellruarput.” Tau͡gaam elliin kiugai, “Tau͡gaam unataini ussukcat enellrit tangenrilkumki, tekqa-llu ellinrilkumku ussukcat enellritnun, unatenka-llu ellinrilkumki caniqerranun ukverngaitua.”

²⁶ Erenret-llu pingayunelgurcata, ataam enemetut, Thomas-aaq-llu ilakluku. Jesus-aam tua-i tekitai amiiget kelucaumaluki, qukaatni-llu nangengqaluni qanrutai, “Uitanqegcici.”

²⁷ Nutaan-llu Thomas-aaq qanrutaa, “Elpet tekren maavet yagesgu, unatenka-llu tangerrluki, unateten-llu yageski caniqamnun-llu elliluki, ukvenricaqunak-llu, tau͡gaam ukvera.”

²⁸ Thomas-aam kiugaa, “Atanemaa, Agayutmaa.”

²⁹ Jesus-aam qanrutaa, “Tangrravnga ukvertuten, atawaqertut tangeqsaileng'e'rmeng ukvelriit.”

³⁰ Allat-llu cali nallunailkutat Jesus-aam elitnaurami takuatni pilallri amllertut, tau͡gaam kalikani makuni igausnganritut.

³¹ Tau͡gaam makut igausngaut ukveresqelluci Jesus-aaq Christ-aucianek, Agayutmun-llu Qetunraqucianek, elpeci-llu ukvelriani atrakun unguvangqerresqelluci.