John 19 - Yupik Bible

Jesus-aam Piciliutekumallra

¹ Tua-i-llu Pilate-aam Jesus-aaq tegua piqertuartelluku-llu.

² Anguyagtet-llu cukilananek piirriluteng nasqerrutekiuraat at'elluku-llu, qesurlimek-llu ulikutamek acetaat.

³ Ciuqerranun-llu piaqluteng qanerluteng, “Atawaqaa, Jews-aat Angayuqrat!” Qacartaat-llu unatmeggnek.

⁴ Pilate-aaq-llu anenqigtuq qanrulluki, “Tangerrluku, elpecen̄un anutaqa nallunricesqelluci nataqutenrilucimnek picurlautiinek.”

⁵ Taumek Jesus-aaq an'uq cukilananek nasqerrutengqerrluni qesurlimek-llu aturangqerrluni; Pilate-aam-llu qanrutai, “Tangerciu yuk!”

⁶ Agayulirten͞gunret atanret-llu tangrramegteggu qayagpagtut, “Ussukcausgu, kelistamun ussukcausgu!” Pilate-aam qanrutai, “Kitaki elpecen̄ek kelistamun ussukcauciu, wiinga picurlautiinek nataqvikenrilamku.”

⁷ Jews-aat kiugaat, “Alerquutengqertukut, tamakut maliggluki tuquarkauguq, wani-wa ellminek Agayutmun Qetunraqevkaan.”

⁸ Tua-i-llu Pilate-aaq mat'umek niicami civuurakanirtuq.

⁹ Ataam-llu nunam atanran 'laavkaaranun itertuq, Jesus-aamun-llu qanerluni, “Naken kingunengqercit?” Tau͡gaam Jesus-aam kiunritaa.

¹⁰ Pilate-aam tua-i pia, “Kiunritarpenga-qaa? Nalluan-qaa elpenek pegciyunarquciqa, kelistamun-llu ussukcauciyunarquciqa?”

¹¹ Jesus-aam kiugaa, “Qaillun piyunarqenricararpenga piyunarqucimek cikiumanrilkuvet pakmaken; taumek wangnek elpenun tun'illeq angenrulriamek assiilngirtuq.”

¹² Tamana engelekluku Pilate-aam pegtengnaqsaaqaa, tau͡gaam Jews-aat qayagaut, “Una pegeskuvgu, Caesar-aam atawakngaitaaten, tua-i kina imna ellminek atanruvkalria Caesar-aamun inglukian.”

¹³ Tua-i-llu Pilate-aam man'a niicamiu, Jesus-aaq anutaa qanercetaarviim aqumllertaanun aqumluni teggalqunek tuss'aralegmun.

¹⁴ Wani-wa erneq Paaskaamun upcaraq erenrem qukallrani. Jews-aanun qanertuq, “Tangerciu Angayuqerci!”

¹⁵ Tau͡gaam qayagpagtut, “Au͡g'arli, au͡g'arli, tauna, kelistamun ussukcausgu!” Pilate-aam qanrutai, “Angayuqerci-qaa kelistamun ussukcaullaku?” Agayulirten͞gunret kiugaat, “Allamek angayuqritukut Caesar-aamek tau͡gaam.”

¹⁶ Tua-i ellaitnun tunaa kelistamun ussukcaucesqelluku.

Ussukcaucimallra

¹⁷ Tua-i-llu Jesus-aaq teguat. Ellii-llu an'uq, kelistani quukatarluku, tuavet ilquignertalegmun, Jews-aat tamana Golgotha-mek aterpagtelaraat.

¹⁸ Tuani-llu ussukcautaat, allak-llu malruk avategkenun, Jesus-aaq-llu qukaqliliulluku.

¹⁹ Pilate-aaq-llu igartuq picetaaruyutiin caucianek kelistamun-llu elliluku. Waten-llu igausngauq, JESUS-AAQ NAZARETH-AARMIU, JEWS-AAT ANGAYUQRAT.

²⁰ Tauna-llu igaq Jews-aat amlleret naaqaat, Jesus-aam ussukcausngavia nunarpagnek canimelan, igaumiimi-llu Jews-aat, Roman-aat-llu, Greek-aat-llu qaneryaraitgun.

²¹ Tua-i Jews-aat agayulirten͞gunret Pilate-aamun qanertut, “Iganrilu, Jews-aat Angayuqratnek, tau͡gaam qanellruniluku ‘Jews-aat Angayuqaqaatnga.’”

²² Pilate-aam kiugai, “Ca igalqa igaumariaqa.”

²³ Tua-i-llu anguyagtet ussukcaucimariamegteggu aturai teguit cetamaurrluki-llu, anguyagtem̄un atauciq yirluku. Qallia-llu teguat; tau͡gken tauna mingqumanrituq, tamarmi keluituq pugyaraminek kanavet.

²⁴ Tua-i qanruyutut, “Man'a allgurpek'naku nall'arcetaaruteknaurput, nalimta pikniaraa.” Wani-wa qaneryarat piciurrluki, “Aturanka avenqegtait, qalliqa-llu nall'arcetaarutkaat.”

²⁵ Tuaten anguyagtet pillruut. Jesus-aam-llu kelistaan caniani nangengqaut aanii, aaniin-llu anelgutii Mary Clopas-aam nulirra, Mary Magdalene-aq-llu.

²⁶ Jesus-aam tua-i aanani tangrramiu, elitnauraq-llu tauna kenkekni caniani nangengqaluni, aanaminun qanertuq, “Arnaaq, tangerrluku qetunraan!”

²⁷ Elitnauramun-llu qanertuq, “Tangerrluku, aanan!” Tuakenirnek elitnauram taum nunaminun ayautaa.

²⁸ Tamatum kinguani Jesus-aaq tamarmeng qaqiyuciatnek nallunrilami, qaneryarat-llu piciurtarkaungata qanertuq, “Meqsugtua.”

²⁹ Puckaq-llu tuantuq quunarqelriamek imalek. Tua-i-llu urungalnguq teguat quunarqelriamek-llu mecirluku qanranun elliat.

³⁰ Jesus-aam-llu quunarqelria uigamiu qanertuq, “Qaqimariuq.” Qamiquni-llu putegtaa anernerirluni-llu.

³¹ Erneq tauna Upcaraungan, agayunerpagmun, Jews-aat Pilate-aaq kaigavikaat taukut iruit ayemcesqelluki atrarcesqelluki-llu, temait Sabbath-aami kelistami uitasqevkenaki.

³² Tua-i anguyagtet taillruut ciuqliim-llu iruk ayemllukek, aipaan-llu ussukcausngallgutiin.

³³ Tau͡gaam Jesus-aaq tekicamegteggu, tuqumaricia-llu tangrramegteggu, iruk ayemtenritagket.

³⁴ Tau͡gaam anguyagtet iliita caniqerrakun panamek kapaa, egmianun-llu tuaken auk meq-llu qurrlurtuq.

³⁵ Tamatumek-llu tangellrulriim tamana nallunairutkaa, nallunairutii-llu piciuguq, elliin-llu nallunritaa piciulriamek qanrucini, elpeci ukveresqelluci.

³⁶ Makut waten piut qaneryarat piciurcesqelluki: “Elliin enra ayemn͞gaitaat.”

³⁷ Cali-llu qaneryaraq alla waten ayuquq, “Kaplerteng tangerciqaat.”

Tungmagcimallra

³⁸ Tamatum-llu kinguani Jesus-aam elitnaurain iliita, tau͡gaam elitnauraucini aassaqluku, Jews-aat alikngamiki, wani-wa Joseph-aam Arimathea-rmium, Pilate-aaq kaigavikaa Jesus-aam temii au͡g'arnaluku; Pilate-aam-llu pisqaa. Elliin-llu au͡g'araa temii.

³⁹ Cali-llu Nicodemus-aaq ilautuq, imna ciuqvani Jesus-aamun unugmi tekitelleq, tekiulluni-llu tungmagcissuutnek aruyailkutnek, usperet yuinaat talliman engelkarrluki.

⁴⁰ Tua-i Jesus-aam temii teguak 'lumarrarmun-llu imgutaak aruyailkutet naunrat taukut ilakluki, Jews-aat piciryaraacetun tungmagciaqameng.

⁴¹ Ussukcausngavian yaaqsinrilkiini naucetaarvigtangqertuq, tauna-llu qungurtarluni nutaramek ellivikumaksailngurmek.

⁴² Qunguq tauna canimelan tuavet Jesus-aaq elliak, erneq tauna Jews-aani Upcaraungan agayunerpagmun.