John 15 - Yupik Bible

Wine-am Napaa Piciulria

¹ “Wii, wani-wa napaugua piciulua, Ataka-llu napaliurten͞guuq.

² Avayanka-llu nauginrilnguut tamalkuita au͡g'alarai, avayat-llu tamalkuita naugitulit carrilarai amllernek naugisqelluki.

³ Elpeci watua carr'ituci qaneryaraq elpecen̄un qaneryaraqelqa pitekluku.

⁴ Wangnetaurci, wiinga-llu elpecen̄etaurlua. Tuarpiaq avayaq naugisciigaluciatun ellminek, napametenrilkuni, tuaten-llu cali elpeci pisciigatuci, wangnetauranrilkuvci.

⁵ Wiinga napaugua, elpeci-llu avayauguci. Wangnetauralria, wiinga-llu elliinellua, amllernek naugiciquq. Wani-wa wii ilakevkenii caperrsukapigtuci.

⁶ Wangnetauranrilnguq avayatun egcimaarkauguq nalaluni-llu, tuaten-llu ayuqelriit quyurtelarait, kenermun-llu muriulluki ekualuki-llu.

⁷ Wangnetaurquvci, qaneryaranka-llu umyuarpecen̄etaurqata, tua-i camek kaigakuvci, tuaten pimaarkauguci.

⁸ Amllermek naugikuvci Ataka ucurnariciquq, wiinga-llu elitnauraqciqamci.

⁹ Aatam wangnek kenkillruciatun, tuaten kenkellruamci; kenkemnetaurci.

¹⁰ Alerquutenka atuquvciki, kenkemnetaurciquci, tuacetun wiinga Atama alerquutai atullrucimtun kenkiinetaurlua-llu.

¹¹ Makunek qallautamci, angniqa elpecen̄i uitasqelluku, angnirci-llu qaqimarisqelluku.

¹² “Maa-i-llu alerquuteka, kenkucesqelluci elpecen̄ek kenkillrucimtun.

¹³ Wani-wa kenka tamiini angenrulria, yuum unguvani pegeskaku yugnikekni pitekluku.

¹⁴ Alerquutenka atuquvciki yugnikciqamci.

¹⁵ Wak'nirnek pisten̄ek tuqlunriramci, atanermi caliari pistem nalluaki, tau͡gaam yugnikekemnek tuqluramci, Atamnek tamalkuan niitellemnek nallunrircecamci.

¹⁶ Elpeci nakmikellrunritarpecia, tau͡gaam wiinga nakmikellruamci ellimerluci-llu naugitullerkarpecen̄ek atsanek, atsaci-llu uitarrlainaasqelluki, Aatam cikirarkaungaci camek atemkun kaigavikekuvcen̄i.

¹⁷ Makunek alerquramci, atunem kenkucesqelluci.

Elitnaurain Nangcimallerkaat

¹⁸ “Ukvenrilnguut uumikekaceci, tua-i nallunrituci ciuvcen̄i wangnek uumikiqerraariciatnek.

¹⁹ Ukvenrilnguut ilakekunegceci, keneksaraiceci pimegcetun, tau͡gaam ilakenritaiceci, wiinga tau͡gaam cucukellruamci, taumek ukvenrilnguut uumikekaiceci.

²⁰ Elpecen̄un qanelqa neq'akiciu, ‘Pista angenrunrituq atanermini.’ Inglulirtuamegten͞ga, elpeci-llu inglulirturciqaiceci. Qanellrenka atuqunegteki, qanelci-llu aturyarait.

²¹ Tau͡gaam makunek tamalkuitnek piciqaiceci atqa pitekluku, ayagcesteka nalluamegteggu.

²² Qanrucarturluki tekitellrunrilkuma, assiilnguicartut, tau͡gaam watua assiilngumeggnun qanerniarutkaitut.

²³ Uumikestem̄a Ataka-llu uumikaa.

²⁴ Calillrunrilkuma ellaitni calianek allam pillrunrilkainek, assiilnguicartut, tau͡gaam maa-i tangellruat, uumiklunuk-llu wangkuk, Ataka wiinga-llu.

²⁵ Waten tau͡gaam piuq, qaneryaraq alerquutaitni igausngalria piciurcesqelluku, ‘Ayagnerkaunateng uumikaatnga.’

²⁶ Tau͡gaam Ililirturta tekiskuni, Aatamek elpecen̄un ayagcetarkaqa, Anerneq imna piciulria, Aatamek kingunelek, elliin nallunairciqaanga.

²⁷ Cali-llu elpeci nallunairiciquci, ayagmek ilakellruamci.