John 14 - Yupik Bible

Caceturqaurutai Elitnauraminun

¹ “Ircaqruallayuilkici, Agayutmun ukvertuci wangnun-llu ukverci.

² Atama eniin ilua uitavigkalirtuq. Tuaten ayuqenrilkan qanrutellruyaramci. Uitallerkiuryartuqataramci.

³ Uitallerkiuryartuumarikumci-llu, ataam tekiciiqua tegunaluci uitallemnetesqelluci.

⁴ Ayagvigkamnun-llu tumyaraq nallunritarci.”

⁵ Tua-i-llu Thomas-aam pia, “Ataneq, ayagvigkan nalluarput, qaillun wani-wa tumyaraq nallunriciiqseta?”

⁶ Jesus-aam qanrutaa, “Wiinga tumyaraugua, piciulua, unguvaulua-llu; allakun Atamun tekitellriartangqerrsunaituq, wangkun tau͡gaam.

⁷ Nallunrilkuvcia, Ataka-llu nallunricararci; wak'nirnek-llu nallunritarci tangellruluku-llu.”

⁸ Philip-aam qanrutaa, “Ataneq, nasviskut Atamek, tua-i asgurakngaitarput.”

⁹ Jesus-aam kiugaa, “Akaarnun nayullrungramci, nallunriqsaitarpenga-qaa, Philip? Wangnek tangellriim Aata tangrraa. Qaillun tua-i qanercit, ‘Nasviskut Atamek?’

¹⁰ Ukveqenritan-qaa Atameluciqa, Aatam-llu wangnelucia? Qaneryarat elpecen̄un qaneryaraqellrenka wangnek qaneryaraqenritanka, tau͡gaam Aatam wangnelnguum caliani caliaqai.

¹¹ Ukveqicia Atameluciqa, Aatam-llu wangnelucia, wall'u caliat tamakut pitekluki ukveqicia.

¹² Ilumun, ilumun, qanrutamci, caliat caliaqellrenka ukvekestem̄a-llu caliaqeciqai, tamakut-llu angenritnek caliciquq, Aatamun ayagarkaungama.

¹³ Camek atemkun kaigakuvci, tuaten piciqua, Aata ucurnarisqelluku Qetunraakun.

¹⁴ Atemkun ca kaigatkekuvciu, wii piciurceciiqaqa.

Anernerem Tanqilriim Akqutkumallra

¹⁵ “Kenkekuvcia, alerquutenka aturarkaugaci.

¹⁶ Wiinga-llu Aata kaigavikciqaqa, elliin-llu cikirciqaaci Ililirturtem̄ek allamek, elpecen̄eterrlainararkamek akwarpak tayima.

¹⁷ Tua-i wani-wa Anernermek piciunrem pianek, ukvenrilnguut piksagutesciigalkiitnek, taukut tangenrrilatgu nalluluku-llu. Elpeci nallunritarci, elpecen̄etauraan, ircaqurpecen̄etaurluni-llu.

¹⁸ “Elliraurtessngaitamci, ullagciqamci.

¹⁹ Atataarqu, ukvenrilnguut tangenrrirciqaatnga, tau͡gaam elpeci tanglarciqerpecia, wani-wa wiinga unguviima, elpeci-llu unguvaarkauguci.

²⁰ Ernermi taumi nallunrirarkaugarci Atameluciqa, elpeci-llu wangnelucirci, wiinga-llu elpecen̄i.

²¹ Alerquutemnek pikilria aturluki-llu, waniwauguq wangnek kenkilria; wiinga-llu kenkesteka Atama kenkeciqaa, wiinga-llu kenkeciqaqa nallunairvikluku-llu.”

²² Judas-aam, Iscariot-aunrilnguum qanrutaa, “Ataneq, qaillun nallunairvikciqsikut ukvenrilnguut pivkenaki?”

²³ Jesus-aam kiugaa, “Yuum kenkekunia, qaneryaranka aturciqai, Atama-llu kenekciqaa, ullagciqerpuk-llu uitallgutekluku-llu.

²⁴ Wiinga kenkenricestem̄a qaneryaranka atunrit'larai. Qaneryaraq-llu niitellerci wiinga pikenritaqa, tau͡gaam Aatam ayagcestem̄a pikaa.

²⁵ “Makunek qanrutellruamci, elpecen̄ek nayullemni.

²⁶ Tau͡gaam Ililirturtem, wani-wa Anernerem Tanqilriim, Aatam wii piteklua ayagcetarkaan, elliin tamaitnek elicungcarciqaaci, neq'angevkarluci-llu tamalkuitnek elpecen̄un qaneryaraqellemnek.

²⁷ Uitanqegcitmek unisvikamci, uitanqegcitmek cikiramci, ukvenrilnguut piciryaraacetun cikinritamci. Ircaqruallayuilkici, alingyugpek'naci-llu.

²⁸ Niitellruuci elpecen̄un qanllemnek waten: ‘Ayagciqua, cali-llu ullagciqamci.’ Kenkekuvcia, angniryartuci, Aatamun ayagarkaungama, Aata wangni angenruan.

²⁹ Maa-i-llu qanrutellruamci pivailgan, pikan ukveresqelluci.

³⁰ Mat'um kinguani amllernek qanrusngaitamci, ukvenrilucim atanra agiircan, caunani-llu wangni.

³¹ Tau͡gaam ukvenrilnguut nallunricesqelluki, Aatamek kenkicimnek, Aatam alerquuciatun pilartua. Nangerrluci ayiilta.