John 13 - Yupik Bible

Elitnaurami It'gaitnek Erurillra

¹ Wani-wa Paaskaam nerevkaritiin ciungakun, nunamek maaken ayallerkami pinaricia Jesus-aam nallunrilamiu, ilani-llu nunamelnguut kenkellruamiki kenkai iquklitlerkaminun.

² Atakutainanratni-llu, tuunrangayiim Judas-aaq, Simon-aam qetunraa Iscariot-aaq, umyugiumariaku tunesqelluku,

³ Jesus-aaq-llu nallunrilami Aatam cat tamalkuita unatminun tunellruciatnek, Agayutmun-llu ayagarkauciminek,

⁴ tua-i nangertuq nerrlerminek; aturani-llu yuungamiu, perriutamek manuilicirtuq.

⁵ Ermigcuun-llu mer'mek imiraa, elitnaurami-llu it'gait erurluki, manuilitaminek-llu perrirluki.

⁶ Kiituani Simon Peter tekitaa. Tua-i-llu taum qanrutaa, “Ataneq, wii-llu-qaa it'ganka eruqataraten?”

⁷ Jesus-aam kiugaa, “Caliaqa man'a cauciitan watua, tau͡gaam mat'um kinguani taringeciqan.”

⁸ Peter-aam kiugaa, “It'ganka erurngaitqapigtaten.” Jesus-aam kiugaa, “Erunrilkumken, pillgutekngaitarpenga.”

⁹ Nutaan Peter-aam pia, “Ataneq, it'ganka kiingita pivkenaki, unatenka qamiquqa-llu piarkaugaten!”

¹⁰ Jesus-aam qanrutaa, “Erunerralria it'gamikun tau͡gaam eruumakuni tamarmi iqaiciiquq; elpeci-llu iqaituci, tau͡gaam tamalkirtevkenaci.”

¹¹ Wani-wa tunestekani nallunrilamiu, tamana pitekluku qanertuq, “Tamalkirtevkenaci iqaituci.”

¹² It'gait-llu eruumariamiki, aturani-llu all'uku, aqumenqiggluni-llu qanrutai, “Nallunritarci-qaa ca elpecen̄un calilqa?

¹³ Elitnauristevcen̄ek Atanerpecen̄ek-llu tuqlulararpecia, tuaten-llu elluarrluci pilartuci, taunguama.

¹⁴ Tua-i wiinga, Atanerci Elitnauristeci-llu, it'gaci erullruamki, tuaten-llu elpeci erurtaagutnarquci it'garpecen̄ek.

¹⁵ Cuq'liramci, tuaten pisqelluci pillrucimtun elpecen̄un.

¹⁶ Ilumun, ilumun, qanrutamci, pista angenrunrituq atanermini, wall'u ayagcecimalria angenrunrituq ayagcestem̄ini.

¹⁷ Tamana nallunrilkuvciu, atawauciquci tuaten pikuvci.

¹⁸ Tamarpeci umyuaqenritamci, nakmikellrenka nallunrilamki; tau͡gaam igausngalria piciurtarkauguq, wani-wa una, ‘Nerellgutma kitngigaanga.’

¹⁹ Watua qanrutamci pivailgan, tuaten pikan ukvekesqellua taungucimnek.

²⁰ Ilumun, ilumun, qanrutamci, ayagcetlemnek ciuniurilriim ciuniuraanga, wiinga-llu ciuniurtem̄a ayagtesteka ciuniuraa.”

Tunestekani Qanrutkaa

²¹ Waten-llu qanrumariami, Jesus-aaq anernemikun angniirteqapigtuq, nallunairluni-llu qanertuq, “Ilumun, ilumun, qanrutamci, ilavci tunciqaanga.”

²² Tua-i elitnaurat tangertaagutut, paqnakluku-llu nalirteng qanrutkucianek.

²³ Nervigmetuq Jesus-aamun iggangqaluni elitnaurain iliit kenkekii.

²⁴ Simon-aam Peter-aam tauna iigmiuraa, apcesqelluku nalirteng picianek.

²⁵ Tua-i tauna Jesus-aamun iggangqalria, qanertuq elliinun, “Ataneq, kina pisiu?”

²⁶ Jesus-aaq kiuguq, “Kelipamek akurtellemnek cikirarkaqa taunguuq.” Tua-i kelipaq akurtellni Judas-aamun, Simon-aam qetunraanun Iscariot-aamun, tunaa.

²⁷ Tauna-llu akurtellranek igngan, tuunrangayiim itraa. Jesus-aam tua-i qanrutaa, “Piqatallren patagmek piyarturru.”

²⁸ Tua-i tuani nerellgutaini nallunrilngurtaituq ca pitekluku elliinun tuaten qanrucianek.

²⁹ Judas-aaq akiviutangqerran, ilait umyuarteqsaaqut, Jesus-aamun qanrucukluku Paaskaami aturarkameggnek kipucesqelluku, wall'u arrsaulriit camek cikiisqelluki.

³⁰ Tua-i taum kelipaq igumariamiu, egmian an'uq, maa-i unuuluni.

Nutaraq Alerquun

³¹ Anumarian-llu Jesus-aaq qanertuq, “Watua Yuum Qetunraa ucurnarimauq, Agayun-llu ucurnarimaluni elliikun.

³² Agayun ucurnarimakuni elliikun, Agayutem-llu ucurnarivkarciqaa ellmini, tamaa-llu ucurnarivkarciqaa.

³³ Irniamaa, nayuqacuaqerciqamci, yuarciqerpecia; qanellrucimtun-llu Jews-aanun, watua elpecen̄un qanertua, ‘Ayagvigkamnun taisciigatuci.’

³⁴ Alerquutmek nutaramek cikiramci, kenkucesqelluci elpecen̄un, elpecen̄ek kenkillrucimtun, tuaten elpeci-llu kenkucesqelluci.

³⁵ Tamaaggun tamarmeng nallunriciiqaiceci, wangnun elitnauraqucirci, kenkuskuvci atunem.”

Peter-aam Aarcirtuumallra

³⁶ Simon-aam Peter-aam qanrutaa, “Ataneq, natmun piciqsit?” Jesus-aaq kiuguq, “Ayagvigkamnun watua maligcunaitarpenga, tau͡gaam kinguqvaarni maligciiqerpenga.”

³⁷ Peter-aam qanrutaa, “Ataneq, ciin maa-i watua maligcunaiciken? Wiinga-wa unguvaka pegtarkaugaqa elpet pitekluten.”

³⁸ Jesus-aaq piuq, “Elpet-qaa unguvan pegciiqan wii piteklua? Ilumun, ilumun, qanrutamken, yaqulek angucalurtaq qalriangaituq mecirautekvailegpenga pingayurqunek.