John 10 - Yupik Bible

Christ-am Amiigucia, Qusngiliurten͞gucia-llu

¹ “Ilumun, ilumun, qanrutamci, qusngit eniita amiigakun itenrilnguq tau͡gaam casgukun mayurluni, teglengalriaruuq uayaariyuliuluni-llu.

² Tau͡gken amiigakun itellria qusngiliurten͞guuq.

³ Tauna tarikestem ikiruciiqaa, qusngit-llu erinii niiciiqaat, pini-llu qayagaularai atritgun anulluki-llu.

⁴ Pini-llu tamalkuita anucimariamiki, ciuliqagtelarai, qusngiin-llu maligtaat, erinii nallunrilamegteggu.

⁵ Tangnerraqseng maliggngaitaat, tau͡gaam qimagciqaat, tangnerraqmeng erinait nalluamegteki.”

⁶ Mat'umek ayuqestassiigutmek Jesus-aam qalarutai. Tau͡gaam ellaita ellmeggnun qanellri cauciitait.

⁷ Taumek Jesus-aam qalarutenqigtai, qanrulluki, “Ilumun, ilumun, qanrutamci, wiinga amiiguunga qusnginun.

⁸ Ciumkun tekitellriit teglegyulriarullruut uayaariyuliuluteng-llu, tau͡gaam qusngit niitenritait.

⁹ Wiinga amiiguunga, wangkun itellria anirtuumaarkauguq, itrarkauluni an'arkauluni-llu neqkarluni-llu.

¹⁰ Teglegyulria tekitelartuq teglegnaluni, tuqucinaluni, piunririnaluni-llu. Wiinga tekitellruunga unguvangqerresqelluki qaqimalriamek.

¹¹ Qusngiliurten͞guunga assirlua; qusngiliurtem assilriim unguvani pegtelaraa qusngit pitekluki.

¹² Ellimertuumalria qusngiliurten͞gunrilnguq, pikevkenaki-llu qusngit, keglunermek agiirtellriamek tangerquni qusngit uniciiqai qimagluni-llu, keglunrem-llu keggmarciqai sekavvluki-llu.

¹³ Tauna qimagtuq ellimertuumalriaruami qusngit-llu arcaqakenrilamiki.

¹⁴ Wiinga qusngiliurten͞guunga assirlua, pinka nallunritanka, pima-llu nallunritaatnga.

¹⁵ Atama wangnek nallunriluciatun, wiinga-llu Atamnek nallunrilucimtun, unguvaka-llu pegtaqa qusngit pitekluki.

¹⁶ Qusngingqertua-llu cali allanek, tamakut-llu taitarkauganka, erinaka-llu niitarkaugaat, ataucimun-llu quyurtarkauluteng, qusngiliurta atauciuluni.

¹⁷ Taumek Atama kenkaanga, unguvaka pegcamku, tegunqigtarkauluku ataam.

¹⁸ Kia imum wangnek tegungaitaa, tau͡gaam umyuaqa aturluku pegtarkaugaqa. Wani-wa wangnek pegcugngiimku, wangnek-llu cali tegunqigcugngaluku. Piyunarqutkamnek Atamnek piunga.”

¹⁹ Makut qanellri pitekluki Jews-aat ataam ayuqenriqertut.

²⁰ Amlleret qanertut, “Anernerrlulguuq, usviirutuq, ciin niicugniceciu?”

²¹ Allat qanertut, “Makut qanellri anernerrlulgem pikenritai. Anernerrluum-qaa cikmiumalriit uiceciiqai?”

Jews-aat Ukverciigatellrat Jesus-aamun Caliari Nallunaingraata

²² Tua-i taum nalliini agayunerpaullruuq Jerusalem-aami, uksumi.

²³ Jesus-aaq-llu agayuvigpiim iluani tarritellruuq Solomon-aam elaturraani.

²⁴ Tuani Jews-aat quyurrvikaat apluku-llu, “Qaillun pitalriamek paqnayugcetqatarcikut? Jesus-aarukuvet, elluarrluta nalqiguskut.”

²⁵ Jesus-aam kiugai, “Qanrutellruyaaqamci, ukvenrituci-llu. Caliama Atama atrakun atullma, nallunaircet'laraatnga.

²⁶ Tau͡gaam ukvenrituci, qusngiqenrilamci, qanellrucimtun.

²⁷ Qusngima erinaka niitelaraat, wiinga-llu nallunritanka, maligtelaraatnga-llu.

²⁸ Wiinga-llu unguvamek nangyuilngurmek cikiranka, piunrirngaitut-llu, unatemnek-llu kia imum tegungaitai.

²⁹ Aataka, wangnun taicestiit, angenruuq tamalkuitni; kia-llu imum tegusciigatai Aatam unatainek.

³⁰ Aata wii-llu atauciugukuk.”

³¹ Nutaan Jews-aat cali teggalqunek tegutut milqernaluku.

³² Jesus-aam qanrutai, “Calianek assilrianek amllernek Aatam piinek nasvitellruamci, tamakut naliit pitekluki miluquyugcecia?”

³³ Jews-aat kiugaat, “Caliaq assilria pitekluku miluquyunritamteggen tau͡gaam piciliutekiavet, waniwa yuunge'rpet, Agayutngurcavet.”

³⁴ Jesus-aam kiugai, “Igausnganrituq-qaa kalikarpecen̄i waten, ‘Wiinga qanertua agayutnguuci.’

³⁵ Tua-i-llu elliin Agayutem qaneryarain tekisvikellri agayutnek tuqluquniki (qaneryaraq cakaarumangaituq-llu),

³⁶ qaillun elpeci qanerciqseci Aatam tanqigivkallranek, nunamun-llu ayagcetellranek, piciliutekiniluku, waniwa qanellruama Agayutmun Qetunraqnilua?

³⁷ Atama caliari caliaqenrilkumki ukveqenricia.

³⁸ Tau͡gaam caliaqekumki, wangnek ukvenrilngerpeci, caliat tau͡gaam ukveqiciki, nallunrirnaurtuci Aatam wangnelucia, wiinga-llu elliinluciqa.”

³⁹ Tua-i-llu tegungnaqenqigcaaqaat, tau͡gaam akuliitgun an'uq.

⁴⁰ Ayanqiggluni-llu Jordan-aam yaatiinun, John-aam angllurcetqerraallranun, tuantaurluni-llu.

⁴¹ Amlleret-llu ullagaat, qanerluteng, “John-aaq nallunailkuciqsaitellruuq, tau͡gaam qanellri una pitekluku piciulliniut.”

⁴² Amlleret-llu tuani ukvervikaat.