Joel 3 - Yupik Bible

Agayutem Cuqciiqai Atanruviit

¹ Ataneq qanertuq, “Taukuni ernerni ataam tukuurceciiqagka Judah Jerusalem-aaq-llu.

² Quyurciiqanka atanruviit tamalkuita ayaulluki-llu Kuignayugmun Cuqciyaramun. Tuani cuqciiqanka yumnun caliaqellrit tamalkuita pitekluki. Cekavtevkallruit Israel-aam yui nunanun allanun, avegluku-llu Israel-aaq, nunauteka.

³ Nall'arcetaariluteng nallunaillruat kitumun teguat pikarkauciitnek. Tun'illruut tan'gaurlurnek nasaurlurnek-llu pistekaurrluki akiliutekameggnek akissunun wine-anun-llu.

⁴ “Qaillun pingnaqsecia, Tyre-aq, Sidon-aaq, tamarpet-llu Philistia? Camek-qaa pillemnek akinaungnaqerpecia? Tuaten pikuvci, cukamek akinaurciqamci!

⁵ Tegullruaci qerrirlit akiutenka suulutaat-llu ayaulluki-llu akitulriit tukuutenka agayuvigpecen̄un.

⁶ Jerusalem-aam Judah-m-llu yui teguluki ayautellruaci nuniitnek yaaqvanun Greek-aanun-llu tunluki.

⁷ Waniwa wiinga anuteqataranka kiputestekellritnek. Tuaten elpeci ellaitnun pillrucirpecetun wiinga-llu tuaten piciqamci.

⁸ Qetunraci panici-llu tuneniaqevkarciqanka Judah-m yuinun; ellaita tuneniarait yaaqvanelngurnun Sabean-aanun. Wiinga, Ataneq waten qanertua.

⁹ “Atanruviit waten qanruski: ‘Anguyallerkarpecen̄un upci; anguyagteci qayagaurciki; quyurciki tamalkuita anguyagceci ayagluci-llu!

¹⁰ Nunamek itumcissuutevcen̄ek nuussirpalici naunrarnek-llu kepurissuutet uluaci kapuuciluki. Pinialeng'e'rmeng anguyalrianun ilautnarqai.

¹¹ Cukamek tailuci, avaqlimten̄i atanruvigni, kuignayugmun quyurci.’” Ataneq, anguyagteten atrarteski curugyartuusqelluki ukut!

¹² “Atanruviit upnarqai tailuteng-llu Kuignayugmun Cuqciyaramun. Tuani wiinga, Ataneq, aqumeciqua cuqnaluki avaqliput atanruviit.

¹³ Assiitqapigtellriaruut; kepurciki kepurilriatun mukaarkanek quyurciyaram nalliini; passilluki wine-arkat atsat passicimalauciicetun passicivigni imartulriani wine-aq uryurvianun.”

¹⁴ Tiissitsaat amlleqapiaraat uitaut Kuignayuani Cuqciyaram. Tuani Atanrem ernerkiuraa ukaqvaggun tekiciiquq.

¹⁵ Akerta iraluq-llu tan'geriuk, agyat-llu tanqiirulluteng.

Atanrem Atawaqerceciiqai Yun'i

¹⁶ Ataneq neptulriamek eriniaguq Ingrimek Zion-aamek; erinii kallugtun taiguq Jerusalem-aamek; nuna qilak-llu qiivuk. Tau͡gaam elliin yun'i camun pivkarngaitai.

¹⁷ “Nutaan, Israel-aam yuini, nallunrirciqerci wiinga Atanruciqa Agayutsi. Wiinga uitavikaqa Zion-aaq, kencignarqellria qemiqa! Jerusalem-aaq kencignarqellriaruluni nunarpauciquq; allanret yuut cirlakenqiggngaitaat.

¹⁸ Tamatum nalliini ingrit patumaciqut wine-arkanek naucetaarvignek, qemit-llu tamarmeng kuluvagtangqerciqut; Judah-rmiut-llu mermek enuqisngaunateng. Kuik qurrlurciquq Agayuvigpiinek Atanrem merqelluku Kuignayuk Acacia.

¹⁹ “Egypt-aaq kinernerurciiquq, Edom-aaq-llu nunakarniirulluni, tua-i-wa anguyallruatgu Judah tuqurqelluki pinarqutailnguut yuut.

^20-21 Wii akinauruciiqanka tuqurqumallret; uitasngaitanka pinarqutelget. Tau͡gaam Judah Jerusalem-aaq-llu yuirusngaituk akwarpak, wiinga-llu, Ataneq, uitaciqua Ingrimi Zion-aami.”