Joel 2 - Yupik Bible

Petgertayulit Aarcirtuutngullrat Atanrem Ernerkiuraanun

¹ Cupu'uryaraq cupiciu; elpengcariluci Zion-aami, Agayutem kencignarqellriami penguani. Uuleggluci, Judah-m yuini! Atanrem ernerkiuraa tekitniarartuq.

² Erneq tauna tan'gerceciiquq, amirlirluni tan'gercetqapiggluni! Petgertayulirugaat agiirtut tan'gerem nalilauciatun ingrit. Tuaten ayuqellriartangqeqsaituq kinguakun-llu ayuqengengaunani.

³ Kenertun nerait naunraat. Ciunrat Eden-aam naucetaarviatun ayuqsaaquq, kingunrat tau͡gken naumalriartailngurtun qau͡gyatun ayuqluni. Ca-llu tamakunek qimagciiganani.

⁴ Tamakut horse-aatun ayuqut; pangalegaqluteng anguyagcuutetun kuunitun.

⁵ Qeckaraqameng ingrit kangritni, nepengqelartut akalrialegtun ekumassuutetun; neplirluteng-llu kinertellriatun canegtun ekuakaitun. Anguyagterugartun anguyakatalriatun caniqliqu'urluteng upingaluteng.

⁶ Tekitniaraata yuut alingem tutai; kegginait qak'iqerrluteng.

⁷ Anguyagtun curugtut; anguyagtetun-llu qacarnerteggun mayurluteng. Ciunerteng ciuneqluku ayagtu'rtut tamarmeng caqircuunateng tumemeggnek.

⁸ Agtullagateksaunateng-llu. Quyurmeng inglumeng caskuita akuliitgun curulartut, cam-llu arulairtesciiganaki.

⁹ Nunarpak curularaat; qacarnerikun mayulartut; enenun mayuraluteng teglengalriatun-llu egalerteggun itraqluteng.

¹⁰ Ciutmurtellratni nuna arulauq qilak-llu uuleggluni. Akerta iraluq-llu tan'gerilutek, agyat-llu tanqiirulluteng.

¹¹ Atanrem erinii tukniluni anguyagten̄i alerqurai. Tamakut anguyagtai niisngalriit elliinun amlleqapigtut pinilriaruluteng-llu. Atanrem ernerkiuraa ucurnarquq alingnarqelriaruluni-llu cakneq! Kina-kiq anagniarta?

Qayagaurun Umyualinqigtesqelluki

¹² Ataneq qanertuq, “Watua wani-wa, cumiggluci umyualinqigci uterrluci-llu wangnun aluviliurluci yagluci-llu nereksaunaci.

¹³ Ircaqurpeciuggun umyuarniullerci alaiceciu angniitellerpeciuggun; aturarpecen̄ek allgurillerci catngunrilan.” Uterci Atanermun Agayutevcen̄un. Takumcutartuq naklegtarluni-llu; nerinisngialliqsuituq akqutkellni-llu pinricen̄ayuunaku; au͡g'aricillerkani upingarrlainalaraa anucimirqecetaarillerkami.

¹⁴ Nallunarquq Ataneq Agayutsi umyualinqigciiqelliuq atawaqertelluci-llu naucetaaci amlleqapiggluki nauvkarluki. Nutaan elliitekangevkarluci elliinun mukaarkanek wine-amek-llu.

¹⁵ Cupu'uryaraq cupiciu Ingrim Zion-aam qainganek; alerquiluci yagyaraq atuusqelluku quyurtesqelluki-llu!

¹⁶ Quyurciki yuut; Yuut quyurrluki; upluki menuircarluteng agayullerkaatnun; ak'allaraat yuut tailluki; quyurrluki mikelnguut mikelnguyagaat-llu. Kassuutnerraraungraata-llu enaitnek taigarkaugut.

¹⁷ Agayulirtet kevgiulriit Atanermun akuliigni ekuaviim Agayuvigpagmun-llu iteryaram, aluviliurluteng piicakilit waten: “Ataneq, yut'en takumcukiki. Allanun atanruvignun caunrilkevkaryaqunakut temciarautekluta-llu qanerluteng, ‘Nauwa Agayutsi?’”

Agayutem Nuna Ataam Naungigivkaraa

¹⁸ Atanrem-llu umyuarniurutkaa nunautni; yun'i takumcukai.

¹⁹ Atanrem-llu kiugai qanerluni, “Waniwa cikiqataramci mukaarkanek, wine-amek, olive-aat-llu uquatnek, elpeci-llu camirciiquci. Allat atanruviit caunrillekngairuciiqaiceci.

²⁰ Au͡g'arciqanka anguyagtet negeqvamek tekitellret, ilait ayagtelluki kinertellriamun nunamun. Ciuqliit ayagceciiqanka Dead Sea-mun imarpigmun, kinguqliit-llu imarpigmun Mediterranean-aamun. Temait tuqumalriit tep'ngeciqut. Piunrirciqanka elpecen̄un pillrat pitekluki.

²¹ “Naucetaarvigni, alingenrici, tau͡gaam nunaniryugci angnirluci-llu tua-i-wa Atanrem caliari elpecen̄un pitekluki.

²² Ungungssiarni, alingenrici. Carr'ilqat cungagiut; napat atsameggnek atsangut, figs-aat-llu wine-arkat-llu atsat amlleqapiggluteng.

²³ “Angnirci, Zion-aam yuini, nunaniryugci umyuaqluki Atanrem caliallri elpecen̄un. Cikillruaci pitalqellriamek ellalluanek uksuarem; ellarvagtelluku uksumi cali-llu up'nerkami ciungani pilauciatun.

²⁴ Mukaarkanek caranglluirivik imartuciquq mukaarkanek; Assigtat-llu mecuiriviit caniatni uryurciqut wine-amek olive-aat-llu uquatnek.

²⁵ Cagmarilci ataam uterceciiqanka allrakuni petgertayulit naucetaaci nerellrit. Wanguuq ayagcecilleq taukunek anguyalrianek elpecen̄un.

²⁶ Nutaan neqkalirciquci camirciiquci-llu. Nanrarciqerci-llu Ataneq Agayutsi, irr'inarqelriatgun aulukestessi. Wiinga yuunka caunrilkumanqiggngaitut.

²⁷ Israel-aam yuini, nallunrirciqerci wangnun nayuucirci wiinga-llu Ataneq Agayutnguciqa elpecen̄un allamek-llu pitailucia. Wiinga yuunka caunrilkumanqiggngaitut.”

Atanrem Ernerkiuraa

²⁸ “Kinguqvaarni anerneqa tuc'eciiqaqa yugnun tamalkuitnun: qetunravci panivci-llu qalarutkeciqaat qaneryaraqa; ciulirneci-llu qavangurtularciqut, ayagyuarpecen̄un-llu cat alaircimalarciqut.

²⁹ Taum nalliini Anerneqa tuc'eciiqaqa pisten͞gungraata, arnaungraata angutngungraata-llu.

³⁰ “Aarcirtuutai erenrem taum alairceciiqanka qilagmi nunami-llu; yuut tuqurquciiqut, ekurpagalriit-wa cali, amirliraqluni-llu puyumek.

³¹ Akerta tan'gericiquq, iraluq-llu kaviriluni augtun Atanrem irranarqelria alingnarqelria-llu ernerkiuraa tekipailgan.

³² Tau͡gaam tamarmeng kaigalriit Atanermun ikayuusqelluteng anirtuumaciqut. Ataneq qanellruciatun, ‘Ilait Jerusalem-aami anagciqut; cucukellrenka wii piunrirngaitut.’”