James 4 - Yupik Bible

Nunamiutaat Ayarinarqenriluciat

¹ Cam calluavkalartaci, inglukulluci-llu? Aglumacit-qaa pivkaqsaitaiceci avatevciuggun?

² Aglumalartuci piinaci-llu. Ayarilartuci pingqerrsugyaaqluci-llu, tau͡gken pingesciiganaci, inglukutelartuci tau͡gken unangeksaituci, kaigaksailavci.

³ Kaigalaryaaquci unangeksaunaci-llu, iqlutun kaigalaavci aglumacirpeciuggun anglaniteknaluki.

⁴ Elpeci akusrarutekilriani! Akusrarutekevkalriani-llu, nalluarci-qaa ellarpiim kenkellra inglukiyaraucianek Agayutmun? Taumek kina imna ellarpagmek kenkilria Agayutem inglukestekaa.

⁵ Umyuartequci-qaa qaneryaraq piciunrilngurmek qaneryukluku, “Anernerem wangkutni uitalriim yurnakaakut?”

⁶ Tau͡gaam Agayutem naklekicia angenruuq. Taumek qanertuq, “Agayutem caukenritai ellmeggnek pivakellriit, tau͡gaam naklekai ellmikutuulriit.”

⁷ Taumek elpecen̄ek Agayutmun tunici; tuunrangayak inglukluku, elliin-llu qimagciqaaci.

⁸ Malkanirru Agayun, elliin-llu malkanirciqaaten; carrirciki unateci assiilngurtulriani; caarrluirluki-llu ircaquci elpeci malrugnek umyualegni.

⁹ Iluteqici angnirpek'naci-llu, qialuci-llu engelallerci mumiggli angniitmun, angnillerci-llu kiaresngiatmun.

¹⁰ Elpecen̄ek caunrilleksagulluci Atanrem tangerqiini, elliin-llu nalugciqaaci.

¹¹ Ilamaa, iqlutun uputaaruteksaunaci pici. Kina imna iqlutun upucilria anelgutminek, cuqluku-llu, alerquutet-llu upuciiqai cuqluki-llu. Alerquutet-llu cuqeskuvki maligtaqunrirciqaten cangakngavki.

¹² Ataucimek alerquucilriartangqertuq anirturiyugngalriamek piunririyugngalriamek-llu; cauyuksit ilavnek cuqcilriami?

¹³ Atam, ukuut piciqliaralriani qanerluci, “Unuamek wall'u unuaqu ayagciqukut nunarpagnun tuanlluta-llu allrakumi ataucimi, kipulluta tuniarluta unangluta-llu.”

¹⁴ Unuaqullerkaa tau͡gaam nalluarci. Cauga unguvasi, taitugtun ayuquq carrarmi alaiqacuaqalriatun, tayimngurrluni-llu.

¹⁵ Waten tau͡gaam qanernaqsaaquci, “Atanrem pisqumakakut yuuciqukut, caliluta-llu.”

¹⁶ Tau͡gaam watua angnirtuci pivakellerpeciuggun. Tuaten angniryaraq atawaunrituq.

¹⁷ Taumek assilriamek atullerkaminek nallunrilngermiu, atunritestiinun assiilnguuguq.