Isaiah 1 - Yupik Bible

¹ Ukut kalikat imangqertut qalaruteklukek Judah-nkuk Jerusalem-aaq-llu Agayutem nallunrircetellrinek Isaiah-mun Amoz-aam qetunraanun, ukut angayuqrullrata nalliini: Uzziah, Jotham, Ahaz.

Agayutem Nunurai Yun'i

² Ataneq qanertuq, “Nunaa, qilaak-llu, niitegu qanelqa! Mikelnguut anglicallrenka inglulitut wangnun.

³ Kuluviit nallunrit'larait pikesteteng, ciulviit-llu nallunritaqluku nani pikestem̄eggnun nerqelaucirteng; Israel-aaq tau͡gaam camek nalluuq, yuunka taringesciigatut.”

⁴ Assiilngurtulriit angayuqauviim yui, yuut assiilngurmek caknaatellget, assiilngurmek caliangqellret kinguvrit, qetunrait-wa yugnun calilalriit elluanrilngurteggun! Unitellruat cakaarluku Ataneq, caunrilkellruat Tanqilriara Israel-aam, tua-i arenqianateng cakneq keneksunairulluteng.

⁵ Ciin ingluliqurluci pivakarceci? Anucimirqecetaaresquci-qaa cali? Qamiqun tamarmi naulluutengqertuq, ircaqun-llu pinianani.

⁶ Qamiqurpenek ayagluni it'garpenun temen natlugnerilngurmek pitaituq. Qain patumauq qiunernek, pupignek, callalrianek-llu kilinernek. Eruumaksaunateng kilineten nemrumaksaunateng-llu. Iinrumek-llu ellivikumaksaunateng.

⁷ Nunasi navguumauq, nunarpaci-llu ekuavkaumaluteng. Takurpecen̄i-llu allanret yiiraat nunan, cat-llu tamalkuita navgurluki.

⁸ Jerusalem-aaq kiimi uitaqertuq, nunarpak kassugusngaluni inglukestem̄inek; piunriumayukaarluni murilkestem necuariitun naucetaarvigmelngurtun.

⁹ Artuqailnguum Atanrem yuut ilait unguvavkallrunrilkaki, Jerusalem-aaq tamaq'apiarmi piunriumallruyartuq, Sodom-aankugtun Gomarrah-llu.

¹⁰ Jerusalem-aaq, atanirturteten yut'en-llu ayuqut Sodom-aarmiucetun Gomorrah-rmiucetun-llu. Niicugniciu Atanrem qanellra elpecen̄un. Murilkiciu Agayutemta elitnaurutii.

¹¹ Ellii qanertuq, “Umyuartequci-qaa piyugyukluki tamalkuita ekuagarkat elliitek'lalci wangnun? Taqsuqutanka qusngit ekuagilalci uquit-llu assinrita ungungssiarautevci. Taqsuqutanka augit angucalut kuluviit, qusngit-llu, qusngirngalnguut-llu.

¹² Kia qanrutaci makunek wangnun taitelaasqelluci agayuyarturaqavci? Kia-llu qanrutaci tarritesqelluci Agayuvigpamni?

¹³ Elliinginaq elliitnek taitelartuci. Eq'uyagutaqa aruviarmek kumarciyararci. Taqsuqutanka Iraluni Nutarani Quyurtaaryaraci, Sabbath-aaci-llu, agayulallerci-llu; assiilngurpecen̄ek tamarmeng assiirucimiita.

¹⁴ Eq'ukanka Iralumi Nutarami Quyurtaaryaraci agayunerpaci-llu; uqamailnguurtut wangni, wiinga ang'aqualnguanka.

¹⁵ “Unateci nalukuvciki piicagluci, tangvagngaitamci. Piicaumang'e'rpeci niicugningaitua, tua-i-wa unateci patumiita augmek.

¹⁶ Erurci elpecen̄ek iqairulluci. Taqiciu man'a assiilnguq tamalkuan takumni atullerci. Aa-ang, assiilnguliunrirci,

¹⁷ elilluci-llu piciulriim atullerkaanek. Elluam atullerkaa murilkelluku; ikayurluki nangcimalriit, elliraat yurnakluki, anagyaaqulluki-llu aipainret.”

¹⁸ “Tailuten watua, qanellguteknaurtukuk, qanertuq Ataneq; assiilnguten kavirlitun meciusngalriatun ayuqengraata, wiinga erurciqamken qatertariluten qanikcartun. Meciumallren kavirpagtun pingraan, qat'riciquten qusngit melquacetun.

¹⁹ Niisngakuvcia tau͡gaam, nerlarciquci assilrianek nunam naugillrinek.

²⁰ Tau͡gken ingluliquvcia, tuquarkauguci. Wiinga, Ataneq qanertua.”

Nunarpak Assiilngurtulria

²¹ Nunarpak ciungani piciuluni pilleq akissutun ayuqliriuq! Yugyallruyaaquq ellualrianek yugnek, tau͡gaam watua tuqutarayulit kiimeng uitaviksagutaat.

²² Jerusalem-aaq, ayuqellruyaaquten qerrirlitun; tau͡gaam watua cakaunrilngurtun ayuquten; wine-atun assilriatun ayuqellruyaaquten, tau͡gaam maa-i mermek avumalriatun wine-atun ayuqliriuten.

²³ Ciuliqagteten inglukilriarurtut yugnikesteksagulluki teglengalriit; assiilngurkun akinek cikiutnek-llu akurturaqluteng. Anagyaaquciyuitut elli'irnek qanercetaarvigni, wall'u niicugniyuunateng aipainret arenqialluguteteng qalarutkaqatki.

²⁴ Taumek watua, niicugniciu Ataneq Artuqailnguq, Israel-aat pinilria Agayutiit, qanertut: “Akinaurciqamci, elpeci inglumni, arenqiallugtem̄ek-llu pinqiggngaitarpecia.

²⁵ Uitasngaitamci. Menuircarciqamci cavik menuircaumalauciatun, aug'arciqaqa-llu tamalkuan menulirteci.

²⁶ Cikirciqamci atanirturtekarpecen̄ek alerquastekarpecen̄ek-llu ak'a pik'lallerpecetun ayuqellrianek. Nutaan Jerusalem-aaq aterpagcimaciquq ellualriamek, piciulriamek-llu nunarpagmek.”

²⁷ Ataneq ellualriaruami, anirturciqaa Jerusalem-aaq tamalkuita-llu tuanelnguut umyuarnayagucilriit.

²⁸ Tau͡gaam piunrirciqai tamalkuita assiilngilriit ingluliculriit-llu ellminun; cakaarten̄i tamalkuita tuquciiqai.

²⁹ Ciinllugguaraciquci agayulallerpecen̄ek napanun nauceciilallerpecen̄ek-llu qigcignarqelrianek naucetaarvignek.

³⁰ Aruciquten qakinertun napatun, naucetaarvigtun-llu yuum merqessuilkiitun.

³¹ Paulayagaam kumartelauciatun canek, tuaten-llu yuut pinilriit ellmeng caliamegteggun assiitellriatgun piunriumaciqut, kia-llu imum arulaircugngangaitaa piunriumallrat.