Hosea 14 - Yupik Bible

Hosea-m Takumcucarautii Israel-aamun

¹ Uterci Atanermun Agayutevcen̄un, Israel-aam yuini. Assiilngurpeci paallacalkarcetaaci paallagtelluci-llu.

² Uterci Atanermun, una-llu piicaun elliinun elliitngukili elpecen̄ek: “Au͡g'arki tamalkuita assiilnguput piicauteput-llu ciuniurluku, wangkuta-llu nanrarciqamteggen akqillrucimcetun.

³ Assyria-m watqapik anirturngaitaakut, anguyagcuutet-llu horse-aat cayairturciigataitkut. Qanenqiggngaitukut watqapik agayutnguamten̄un Agayutekniluki. Ataneq, naklek'laraten yuut allamek cauvigkailnguut.”

Atanrem Akqaa Israel-aaq Nutaramek Unguvallerkaanek

⁴ Ataneq qanertuq, “Wiinga ut'ruciiqanka yuunka wangnun. Kenkeciqanka ircaqumkun tamalkirrlua; qenngutenriranka.

⁵ Ayuqeciqua Israel-aam yuinun ellallugtun kinertellriami nunami. Ikirrluteng naugiciqut naucetaaqegtaartun; pekngaunateng acilqungqerciqut napaitun Lebanon-aam.

⁶ Nalavkenateng naugaariciqut, tangssunaqluteng-llu olive-aat napaicetun. Narnirqeciqut cedar-aatun napaitun Lebanon-aam.

⁷ Ataam uitaciqut aulukutma aciani. Nauceciiciqut mukaarkanek naugiluteng-llu wine-arkat atsaita naucetaarviicetun. Niitnauciqut wine-aatun Lebanon-aam.

⁸ Israel-aam yui agayutngualiunqiggngaituq; Piicautait kiuciqanka aulukluki-llu. Kevraartutun uqisvigkirciqanka; tamalkurmeng atawaqautaita wiinga kangilquqaatnga.”

Iquklitellra

⁹ Kinkut imkut umyuartulriit taringlitki wani igausngalriit, ciuniuqilitki-llu ircaqumeggnun. Atanrem piciryarai piciugut, ellualriit-llu yuut maliggluki yuulartut, tau͡gaam assiilngiumalriit paallacalkaraluteng paallalartut nallungualaamegteki.