Hebrews 9 - Yupik Bible

Akquyutem Nutaram Kenegyagutestii

¹ Taungung'e'rmi ciuqliq akquyun, ayuqucirtuutengqellruuq agayuyaramek agayuvigmek-llu nunamiutarmek.

² Tua-i Pelatekaq Atanrem Uitavia taqellruat; elaqliq imangqellruuq kenurrarvigmek stuulumek-llu, kelipanek-llu tangrresqutnek; tauna aterpagingauq Tanqilriamek Enemek.

³ Capkutam tunglian tunuani enetangqertuq aterpagingaluni Tanqilriit Tanqinratnek,

⁴ imangqerrluni aruviarvigmek suulutaamek, Akqutem-llu Yaassiiganek, avatmikun suulutaamek qallircimaluni. Ilua cali egacetangqertuq suulutaamek, manna-mek imarluni, Aaron-aam-llu ayaruanek naugaarillermek, akquyutem-llu alerquutainek.

⁵ Qaingagni-llu cherubim-aagnek ucurnarqelriignek pitarluni naliumaluku takumcukutem aqumllertaa. Tamakut watua qanrutkesciigataput ayuquciqapiicetun.

⁶ Makut taqumariata, agayulirtet kesianek it'lartut elaqlianun Pelatekam Atanrem Uitavian caliateng agayuyarat aturluki.

⁷ Iluqlianun tau͡gaam agayulirten͞guneq it'lartuq allrakumi ataucirqumek, augmek-llu tegumiaritevkenani, tamana cikiutekluku ellminek pitekluni, yuut-llu picurlautait pitekluki.

⁸ Mat'ukun Anernerem Tanqilriim nallunairaa iluqlirmun Agayuvigmun ikirucimaksaitellerput elaqlian napallran taktaciatun.

⁹ Mat'um nalliini atuqengamten̄un tangrrutnguluni. Tamana aturluku cikiutet ekuagarkat-llu tunumalriit natlugneriucesciigataat umyuaqegtaarii cikiutekestiita.

¹⁰ Makunek tau͡gaam caliangqertut: neqkanek, mermek-llu, ayuqenrilngurnek-llu eruryaranek, temem picirkiutai, nutaram atullerkaan engeliinun.

¹¹ Tau͡gaam Christ alairami atu'urkanun assilrianun Agayulirten͞gunruarkauluni, angenrulriakun qaqimalriakun Pelatekakun Atanrem Uitaviakun, unatetgun taqumanrilngurkun.

¹² Tanqilriamun enemun itellruuq ataucirqumek pinqiggviinani, qusngit augitgun kuluvayagaat-llu augitgun pivkenani, elliin tau͡gaam nakmiin aumikun, nangyuilngurmek anirtuumallerkarput unakluku.

¹³ Wani-wa yuut menuurcimalriit qusngit kuluviit-llu augitgun kuluvayagaat-llu araitgun ciqertautem assiilnguiruskaki kemgem menuirutlerkaanun.

¹⁴ Qaillun pitalriamek augan Christ-am, ellminek Agayutmun tunellrem Anernerkun nangyuilngurkun pinerrlugutaunani, menuirciqau umyuaqegtaarci assiilngurnek caliarpecen̄ek Agayutem unguvalriim kevgiullerkaanun?

¹⁵ Taumek ellii akunlairturten͞guuq nutaramun akquyutmun, kelgumalriit pingesqelluki akqumalriamek paitarkameggnek nangyuilngurmek, tuqulriartangqerran aviucugngaluki assiilnguitnek akquyutem ciuqliim qulliliumakai.

¹⁶ Paitarkam kalikartaa piciurtarkaukan paitarkiutestiin tuqumarillra nallunairumanarquq.

¹⁷ Wani-wa paitarkam kalikartaa tuqulriartangqerqan tau͡gaam aturarkaurtelartuq, paitarkiutestiin unguvallrani aturciiganani.

¹⁸ Taumek-llu ciuqliq akqun augunrilngurkun piciurcimanrituq.

¹⁹ Nauwa Moses-aam Alerquutet tamalkuita qanrutkumariamiki yugnun, kuluvayagaat qusngit-llu augatnek tegutellruuq mermek avuluku, qusngim melqurranek aturluni urungalngurmek-llu kalikat ciqertarai yuut-llu.

²⁰ Qanerluni, “Maa-inguuq akqutem auga Agayutem alerquutekellra elpecen̄un.”

²¹ Tuaten-llu cali ciqertalaraa Pelatekaq Atanrem Uitavia assigtat-llu tamaita agayuvigmi atulallrit.

²² Ilumun, Alerquutet aciatni cat tamaklagmeng augkun menuirucimaut, aunraucetaunaku-llu au͡g'aricetaituq assiilngurmek.

²³ Tuaten tamakut pakemkumiutaat tarenraqengraitki menuircimanarqellruut makutgun piciryaratgun, tau͡gaam pakemkumiutaat, makut assinritnek cikiutnek pinarqut.

²⁴ Wani-wa Christ-aq itellruan, unatetgun piliaqumalriamun agayuvigmun pivkenani, pipiulriim tarenraanun, tau͡gaam qilagmun engellilluni, maa-i Agayutem ciuqerrani uitaluni kaigalluta.

²⁵ Tuaten-llu pulenglluni ellminek cikiuteknavkenani agayulirten͞gunertun allrakuaqan it'lalriatun kenciknarqelriamun aukenrilkem̄inek tegumiarluni.

²⁶ Tuatnaarkaukuni pulengtaq nangteqellruyartuq nunam piurteqarraallranek. Tau͡gaam maa-i alairumallruuq ataucirqumek taqluni ernerkiurumalriit nangellratni, assiilnguq au͡g'arnaluku ellminek cikiuteklermikun.

²⁷ Elkaringaciatun-llu yugnun tuquarkauluteng ataucirqumek, kinguani-llu qanercetaarumaarkauluteng.

²⁸ Tuaten-llu Christ-aq, ataucirqumek cikiutekumaluni, amlleret assiilnguit ayaulluki, tekitenqigciiquq-llu, assiilnguq caliaqenqiggnavkenaku, tau͡gaam anirturarkauluki nerinikesten̄i.