Hebrews 8 - Yupik Bible

Agayulirten͞gunerput Qilagmelnguq

¹ Qalarutkellerput waniwauguq: tamakucimek Agayulirten͞gunermek pingqertukut Angayuqauviim Aqumllertaan tallirpilirnerani aqumgalriamek qiliim ucurnarquciani.

² Kevgiullruuq agayulirten͞gunruluni Tanqinqukacaarmi, pelatekami Atanrem piliallrani, yuum unatiikun pilimanrilngurkun.

³ Tua-i agayulirten͞gunret tamarmeng elkarcimaut tuniarkauluteng cikiutnek ekuagarkanek-llu; taumek una-llu Agayulirtevvut camek tun'arkangqerrsunaqmiuq.

⁴ Waniwa maanelkuni nunami, agayulirten͞guyanrituq watqapik, agayulircetangqerran alerquutet aturluki cikiutnek tun'ilalrianek.

⁵ Tamakut agayuviim qilagmiutaam ayuqestassiigutkai tarenraqluki-llu. Moses-aam naparteqatanrani Pelatekaq Atanrem Uitavia, Agayutem ayuqucirtullrua qanerluni, “Atam waniwa ca tamalkuan caliaqenqegcaqiu nasvicimallrucirpetun ingrimi.”

⁶ Tau͡gaam maa-i Christ-aq caliarkicimauq ak'allaam assinerpiinek, tuaten akquyun, akunlairtullermikun caliaqellni, assinruciatun, assinrulriami tusngallengqerrami akqutmi.

⁷ Wani-wa ciuqliq akquyun canganarqutailkan, allamek pinarqenricartuq.

⁸ Tua-i cangakngamiki qanellruuq: “Erenret tekiciiqut, qanertuq Ataneq, nutaramek akqutmek elkarcillerkaqa Israel-aam yuini, Judah-m-llu yuini.

⁹ Ciuliarita akqutkellrata ayuqenrilkiinek, ernermi tuani unataitgun tass'uqluki Egypt-aamek anutellemni; ciumurtenrilata akqutemni, taumek ilangcinritanka, qanertuq Ataneq.

¹⁰ Maa-inguuq akquyun piarkaqa Israel-aam yuini taukut erenret kinguatni, qanertuq Ataneq: Umyugaitnun alerquutenka elliciqanka, igaulluki-llu ircaqruitnun, Agayutekciqaatnga-llu, wiinga-llu yukciqanka.

¹¹ Ilateng-llu anelguteteng-llu ayuqucirturngaitait waten qanerluteng, ‘Nallunriciu Ataneq,’ waniwa tamarmirrluteng nallunriciiqaatnga mik'ngermeng angeng'e'rmeng-llu.

¹² Takumcukciqngamki picurlautait, assiilnguit-llu umyuaqenrirluki.”

¹³ Nutaraq akqun qanrutekngamiu, ciuqliq qanrutkaa atuunrirniluku. Atuunrilria-llu ak'allaurtellria piunrirarkaurtuq.