Hebrews 6 - Yupik Bible

Ukverkun Pektayiitesqun

¹ Taumek, ciuqliit arcaqalriit Christ-am elitnaurutai uitalluki ciumuruskilaut taqmigiinallerkarput ukvemta tusnganra. Pulenglluku elkarrnavkenaku ayuqucilinqigcaraq tuqum caliarinek, ukveq-llu Agayutem tungiinun,

² anglluryaram-llu ayuqucirtuutii, unatnek-llu pategviksaraq, tuqumalriit-llu maktellerkaat, qanercetaarumallerkaq-llu nangyuilnguq.

³ Agayutem pisqumakakut tuaten piciqukut.

⁴ Wani-wa yuut taringumarillrulriit uigumariluku-llu Agayutem cikiutii, Anerneq-llu Tanqilria piksagucimariluku,

⁵ uigumariluku-llu Agayutem qaneryaraan assiucia, tekitarkam-llu nunakam piniucia.

⁶ Tamakut avvluteng kingupiarqata, ataam umyualinqigtellerkaatnun ullautesciigatut, ellmeggnek Agayutem Qetunraa ussukcautenqigcamegteggu, caunrilken͞gamegteggu-llu.

⁷ Nuna ellallugmek mel'alria naugikuni naucetaanek caliaqestain atu'urkaitnek, Agayutmek atawaqercecimauq.

⁸ Tau͡gaam cukilananek naunerrlugnek-llu naugikuni, catngunrituq aniqlaamaarkauluni; iquani-llu ekuamaciquq.

⁹ Tuaten qanengramta, elpeci piluci umyuartequtamci atawaunrulriamek, anirtuutmek iqulegmek.

¹⁰ Agayun elluanritenrilami nallunguanritaa caliarci kenkillerci-llu nasvallerci ellii pitekluku, Agayumalriit kevgiuravciki man'a engelkarrluku.

¹¹ Tua-i piyuumiutamci ayuqluci piyuumillerci nasvaasqelluku neryuniurutem taringeluaqallrakun iquklitlerkamun.

¹² Qaategtesqumavkenaci-llu, tau͡gaam maligtaquluki, ukverkun utaqalgiutekun-llu akqutmek pingqerrarkat.

¹³ Agayutem akeqngamiu Abraham-aaq, angneminek asguranairtekailami ellminek asguranaillruuq.

¹⁴ Qanerluni, “Piciulriamek atawaqerceciiqamken ulevkarluten-llu.”

¹⁵ Tuaten Abraham-aaq utaqalgiarallermikun akqutmek pinguq.

¹⁶ Yuut angnemegteggun ukvernarcarilaryaaqut, qalliussaagutaitni-llu cat ukvernarcautekun asguranairut'lartut.

¹⁷ Taumek Agayutem nalirrugnailngurmek nasvicuaki akqutem paitaqestekai picirkiurami cimiyuilucianek, ukvernarcautmek tapiraa.

¹⁸ Wangkuta anagturvikestaini tengruluta neryuniurun ciuneqekvut akurturnaurput cimiyuilnguq, malruk tumeklukek, akqun ukvernarcarin-llu, taukugnegun Agayun iqlusciigalan.

¹⁹ Man'a neryuniurun tarnemta kicaqaa asvailnguuluni, pektayiinani-llu neryuniurun atalria iluqlianun kenciknarqelriim, capkutam ilulirneranun.

²⁰ Jesus-aam maryartestemta itervikellranun wangkuta pitekluta agayulirten͞gunrurrluni nangyuilngurmek, Melchizedek-aatun.