Hebrews 2 - Yupik Bible

Angelria Anirtuumallerkaq

¹ Taumek arcaqanranek murilken̄arqaput niitelput tamarnavkenaki.

² Wani-wa an'gilat qanellrit piciukata, assiilnguut-llu, niisnganricaraq-llu akinaurumallrukan,

³ qaillun wangkuta qimagvingqerciqseta anirtuumallerkaq tuaten angtalria cakaaqumteggu? Ciumek Atanerkun qanrutkumallruuq, nallunairumallruuq-llu wangkutnun niitestem̄ikun.

⁴ Agayutem-llu tuaten nallunaillrua nallunailkutetgun, iillanarqelriatgun-llu ayuqenrilngurteggun irr'inarqelrialillermikun, Anernerem-llu Tanqilriim cikiutaikun aruqutekluki piyugtacimitun.

Anirtuutem Atanra

⁵ Nunakaq qanrutkellerput an'gilanun Agayutem ataniumavkanritaa.

⁶ Qanrutkumallruuq nani waten, “Yuk cauga elpet murilken͞gavgu, yuum-llu qetunraa, aulukngavgu?

⁷ Carrarmi aciqsinruvkallruan an'gilani, tau͡gaam nasqerrucillruan ucurnamek takarnarqutmek-llu; unatvet-llu piliari elliinun aulukevkaraten;

⁸ cat-llu tamalkuita it'gain tusngallratnun elkarrluki.” Tua-i-llu cat tamalkuita yugmun elkartellruaki, ca man'a ataniumanrilkiini uitanrituq. Maa-i tangeqsaitaput cat tamalkuita yugmun ataniumavkarluki.

⁹ Tau͡gaam Jesus-aaq tangrrarput, carrarmi an'gilanun aciqsinruvkaumalleq, maa-i nasqerruciumaluni ucurnarqutmek takarnarqutmek-llu, tuqum nangtequtekellra pitekluku, Agayutem takumcukutiikun uignaluku tuqu, yuut tamalkuita pitekluki.

¹⁰ Tua-i pinaqngani, cat tamarmeng aturtiita piurtestiita-llu, amllernek Agayutem yuinek ullaucillermikun ucurnarqellriamun anirtuutmun, maryartestiit piyunailutairaa nangteqellrakun.

¹¹ Waniwa kencignarivkarillra, kencignarivkaumalriit-llu tamarmeng ataucimek ayagnillengqertut. Taumek tunrikenritaa tuqlullerkaat anelgutminek.

¹² Qanerluni, “Atren qanrutekciqaqa anelgutemnun, quyungqalriani, agayuvigmi nanrarciqamken.”

¹³ Waten cali, “Cacetuqutekciqaqa.” Waten-llu, “Wani-wa wiinga, irnianka-llu Agayutem cikiutai wangnun.”

¹⁴ Taumek mikelnguut kemengqerrata aungqerrluteng-llu ellii-llu tuaten ayuqucingqellruuq, tuqullermikun piunrirnaluku tuqum atanra, tua-i Tuunrangayak,

¹⁵ angitnaluki-llu unguvameng taktaciatun tuqum alikellrakun teguarulriit.

¹⁶ Nallunaunani an'gilanek kusguryunrituq, tau͡gaam Abraham-aam kinguvrinek.

¹⁷ Taumek anelgutni ayuqnarqai tamaitgun, takumcutarluni, piciuluni-llu agayulirten͞gunrurrluni kevgiullermini Agayutmun, yuut assiilnguita aviutellerkaatnun.

¹⁸ Ellii tungaunani naspaamallermikun nangteqellruami ikayuryugngai naspaamalriit.