Hebrews 10 - Yupik Bible

Ekuagarkat Ungungssit-llu Augat Anirtuutngunriluciat

¹ Wani-wa Alerquun, tekitarkat assilriit tarenraatnek tau͡gaam imangqerrami, piciulriamek pipiulriamek pivkenani, ullautellriit natlugneriucesciigatai allamiaqan cikiutngulallerteggun.

² Tuaten-qaa pinrilkan ekuaginermek taqsanritut? Agayulriit natlugneriucimarillrukata, assiilngurmek nalluyartut kinguani.

³ Tau͡gaam ekuagiaqameng neq'angevkaumalartut assiilngurnek allamiaqan.

⁴ Wani-wa kuluviit qusngit-llu augata assiilnguut au͡g'arngailatki.

⁵ Taumek, Christ-aq nunamun tekicami qanellruuq, “Cikiutet ekuagarkat-llu piyuumiutekenritaten, tau͡gaam upyutellruarpenga tememek cikiutekarkamnek;

⁶ cikiutet ekuagarkat assiilnguum-llu cimiutai nunanikenritaten.

⁷ Taumek qanertua, ‘Tangerrluku, tekitua pisquten aturnaluku, Agayun’, igautekumacimtun kalikani.”

⁸ Ava-i qanrami, “Piyunritaten nunanikevkenaki-llu cikiutet, elliitet-llu, cikiutet-llu ekuagarkat, assiilnguum-llu cimiutai” (makut tunumalalriit alerquutet aturluki).

⁹ Kingunerrluku-llu, “Tangerrluku, tekitua pisquten aturnaluku.” Ciuqlia piunriraa elkarrnaluku kinguqlia.

¹⁰ Tamaaggun akquyutekun kenciknarivkaumaukut Jesus Christ-am temiin tunumallrakun ataucirqumek taqluni.

¹¹ Tamarmeng agayulirtet unuaquaqan pulengtaarluteng kevgiulartut tun'iluteng cikiutnek assiilnguirisciigalngurnek.

¹² Tau͡gaam Christ-aq ataucirqumek cikiutekumariami assiilnguut cimiutekaatnun, Agayutem tallirpianun aqumuq.

¹³ Utaqalgirluni inglukestem̄i it'gaminun tusngavikellerkaata engeliinun.

¹⁴ Ataucirqumek cikiuteklermikun kenciknarivkaumalriit natlugneriutai nangyuilngurmek.

¹⁵ Anernerem-llu Tanqilriim nallunairvikaakut, qanrraarluni:

¹⁶ “Maa-inguuq akquyun ellaitnun piarkaqa, erenret taukut kinguatni, qanertuq Ataneq: alerquutemnek ircaqruit ellivikciqanka igaulluki-llu umyugaitnun.”

¹⁷ Kingunerrluku-llu, “Assiilnguit alarutait-llu umyuaqenrirciqanka.”

¹⁸ Makut au͡g'aricimakata, assiilnguum cimiutekaanek pinarqenrirtut.

Kencignarqelriamun Ityunarillerput

¹⁹ Taumek ilamaa, nalirrugtevkenata itrarkaurcamta Kencignarqelriamun Jesus-aam augakun,

²⁰ nutarakun tumyarakun unguvalriakun ikiruyuteklermikun wangkutnun capkutaq kemni tumekluku.

²¹ Piunrulriamek-llu agayulirtengqerramta Agayutem eniini.

²² Ataki ullautelta ircaqumteggun ciqertaumaluta carriulluta assiilngurnek umyuanek, temput-llu eruumaluki merkun menuilngurkun.

²³ Neryuniurutemta nallunairutii pegtenrillaut nalirrugutevkenaku, akqestevvut piciungan.

²⁴ Umyuaqnaurput-llu atunem tengruliutellerkarput, atunem kenkiyaramun caliaqegtaarnun-llu.

²⁵ Quyurtellerkarput qaategutevkenaku, ilait pilauciicetun, tau͡gaam eguaquulluta atunem, Erenrem tekitarkam ukaqsigiinallra cuqluku.

²⁶ Wani-wa piciulria taringumariluku, pitsaqutmek assiilngiqumta assiilnguput cimiutekairuciiqut.

²⁷ Tau͡gaam ciunerkarluta irranarqelriamek qanercetaarutmek, kenermek-llu alingnarqelriamek, narurcilriit piunrirtekaatnek.

²⁸ Yuk Moses-aam Inerquutainek atulria tuqutelaraat, malruk wall'u pingayun yuut nallunairutaitgun.

²⁹ Qaillun-mi pitalriamek arcaqanranek anucimirqecetaarutmek pinarqeciqa yuk Agayutem Qetunraan caunrilkestii, qigcikenricestii-llu akqutem augan menuirutestekellmi, Anernerem-llu takumcutalriim cangacagcestii?

³⁰ Nallunritarput qanlleq waten, “Akinauryaraq wii pikaqa, wiinga akinaurciqua.” Waten-llu, “Atanrem qanercetaarciqai yun'i.”

³¹ Civuuranarquq iqullerkaq Agayutem unguvalriim unatainun.

³² Tau͡gaam neq'erciu ayuqucillerci ciuqvani taringumarillerpeci kinguakun, cakviullerci nangteqluci.

³³ Cat ilaitni yuut ciuqerratni caunrilkumalallerci nanikuavkaumalallerci-llu, cat-llu ilaitni aipaugaqluci tuaten nangcimalrianun.

³⁴ Takumcuk'lallruaci itengqalriit, teguimaaqavci-llu piutevcen̄ek cangalliuqsaitellruuci nallunrilavciu piutengqerrucirci assinranek nang'arkaunrilngurmek-llu.

³⁵ Taumek pegcaqunaciu cacetuquteklerci, tamana nunuliutmek angelriamek iqungqellria.

³⁶ Taumek pektayiilkici, Agayutem pisqutii aturniarci, piksagutniarci-llu akqutkumalria waten,

³⁷ “Ak'anuivkenani tekitarkaq tekiciiquq mulungaituq-llu:

³⁸ yuk-llu ellualria ukvemikun unguvaciquq, tau͡gaam kingupiaqan tarnema nunanikngaitaa.”

³⁹ Wangkuta tau͡gaam ilakenritaitkut kingupialriit piunriumaarkat-llu, tau͡gaam ukverumalriit tarnemegteggun-llu anirtuumalriit.