Genesis 8 - Yupik Bible

Ulem Entellra

¹ Agayutem cakaanritaa Noah, angyarpagmetellgutai-llu; anuqengevkaraa nunam qainga meq-llu entengluni.

² Camaken ulvelriit taq'ut, qilagmi-llu ikirtellret patuluteng, ellalluk-llu arulaircecimaluni.

³ Meq-llu enqu'rtuq arulaiqsaunani erenret yuinaat malrunelgen qulnek cipluku (150).

⁴ Iralut malrunelgatni, ernengqerluku akimiaq malrugnek cipluku angyarpak nunallituq Ararat-am ingriinun.

⁵ Meq aciqsigiinartuq, iralut-llu qulngunritariit ayagnian kangrit ingrit alairluteng.

⁶ Erenret-llu yuinaak malruk kinguagni Noah-m ikirtaa angyarpiim egalra,

⁷ tengevkariluni-llu tulukarugmek. Tauna tengaurtuq angitaarluni nunam kinernatkaanun.

⁸ Cali anevkariuq allamek yaqulegmek nunatangucia paqnakluku,

⁹ tau͡gaam mer'em cali nuna patumiiku misvigkailami utertuq angyarpagmun; Noah-m-llu teguluku.

¹⁰ Ernerni malrunlegni uitarraarluni tauna yaqulek utertelleq ataam anevkaraa.

¹¹ Atakuan tauna utertuq keggmiarluni olive-aam napam cuyaanek; tua-i Noah nallunrirtuq nunatangucianek.

¹² Cali erenret malrunelgen kinguatni ayagcetenqigtaa yaqulek. Tayima-llu utertevkenani.

¹³ Noah allrakungluni tiissitsaam avga, yuinaat talliman ataucimek cipluku (601), iralum ciuqliim ayagnillrani, nuna meriutuq; Noah-m-llu angyarpak qilairaa tangerrluku-llu meriutellinilria.

¹⁴ Iralum-llu aipaani, ernengqerluku yuinaq malrugnek cipluku (22), nuna kinraa.

¹⁵ Agayutem-llu Noah qanrutaa,

¹⁶ “Yuuci angyarpagmek elpet, nulian, qetunraten-llu nulirtuumarmeng.

¹⁷ Tamalkuita anuski ungungssit mikellriit angelriit, yaqulget-llu, irniluteng amllerinaurtut nunam qaingani.”

¹⁸ Tua-i Noah, nulirra, qetunrai, qetunrain-llu nulirrit an'ut angyarpagmek.

¹⁹ Tamarmeng-llu ungungssit mikellriit angelriit, yaqulget-llu an'ut ayuqellriit quyungqaaqluteng.

Noah Elliiluni Ekuagiuq

²⁰ Tua-llu Noah ekuavigmek piliuq. Atauciuqaqluki ungungssinek yaqulegnek-llu menuilngurnek tegutuq, ekuagiluni-llu cikiutekluki Agayutmun.

²¹ Atanrem-llu narngamiu aruviim tepii ilukegciuq umyuarteqluni-llu, “Aniqlaanqiggngaitaqa nuna yuk pitekluku. Yuk assiilngurmek umyuangqelaan ayagyuallerminek ayagluni. Unguvalriit-llu tamalkuita piunrinqiggngaitanka tuaten pillrucimtun.

²² Nuna piullrani taqngaituq nauceciineq quyurcineq-llu wall'u nengla kiiq-llu, kiak uksuq-llu, erneq unuk-llu.”