Genesis 15 - Yupik Bible

Agayutem Akqut'liallra Abram-aaq Pillgutekluku

¹ Taum kinguakun Abram-aaq cam alairvikellrua (tangerrluni camek) niilluku-llu Ataneq qanelria ellminun, “Alingenrilu, Abram. Aarnarqelriamek capkuciumaciqamken nunulirarkauluten-llu angelriamek.”

² Tau͡gaam Abram-aaq kiuguq, “Ataneq Agayun nunuliuten-mi wangnun cauciqa irniarunii? Eliezer-aaq kiingan Damascus-aarmiu kinguverkaqluku.

³ Yugkamnek nakmiin cikiqsaitarpenga, pistem̄a-llu tau͡gaam iliita aklunka paitaqciqai.”

⁴ Ataam-llu Ataneq qanertelluku ellminun niitaa: “Pistem̄un Eliezer-aamun tukuuteten kinguvarngaitut; elpet nakmiin qetunraan kinguvanertaqciqan.”

⁵ Atanrem ellamun anutaa qanerluni-llu, “Qilak pagna kiaresgu, naaqluki-llu agyat piyugngakuvki. Tuaten amllertalrianek kinguvengqerciquten.”

⁶ Abram-aam ukvekaa Agayun. Tuaten-llu pillra pitekluku Atanrem ilukegcitkaa ciuniurluku-llu.

⁷ Tua-llu Atanrem qanrutaa, “Wiinga Atanruunga anutestellren ciuliqaggluten Ur-amek Babylonia-mi cikirnaluten mat'umek nunamek pikarpenek.”

⁸ Tau͡gaam Abram-aam aptaa, “Ataneq Agayun, qaillun-mi wiinga nallunriciiqsia piksagutarkaucia mat'um nunam?”

⁹ Kiugaa, “Taiskina kuluvagmek, qusngim angucaluanek, qusngirngalngurmek-llu, tamarmeng allrakungelrianek pingayunek, yaquliyagaagnek-llu malrugnek.”

¹⁰ Abram-aam-llu taukut tamalkuita taitai Agayutmun. Qupraarluki-llu ellii akiqliqaqluki, yaqulgek tau͡gaam qupevkenakek.

¹¹ Yaqulget-llu tuqumalrianek tau͡gaam nertulit mit'ut taukut ungungssit nuniitnun, tau͡gaam Abram-aam alingcira'arluki ayagcetai.

¹² Akerta-llu teviryartullrani Abram-aaq qavartuq mamtulriamek; alingem-llu tull'uku.

¹³ Atanrem-llu Abram-aaq qanrutaa, “Pinritevkenateng kinguveten allanruciqut nunakenrilkem̄eggni, teguaruluteng, nangcimaluteng-llu allrakuni yuinaat yuinaat (400) aturluki.

¹⁴ Tau͡gaam anucimirqecetaarciqaqa atanruvik teguaruviat, tamatum-llu kinguakun tamaaken anciqut tukuutnek amlleqapigtellrianek ang'aqluteng.

¹⁵ Elpet-llu tuquciquten uitanqegciluten; qunguumaciquten ak'allak'acagaurrluten.

¹⁶ Yugpet kinguvallrita cetamaingit maavet uterciiqut; Amorite-at anevkarngailamki maaken anagutengkata tau͡gaam assiilngillermegteggun.”

¹⁷ Akerta tevirraartelluku tan'gerian aruvilria kenilleq keneq-llu qukaatgun sagingalriit ungungssit temaita ayagtuq.

¹⁸ Taum nalliini Ataneq akqut'liuq Abram-aaq aipaqluku qanerluni, “Kinguverpenun man'a nuna cikiutekciqaqa Egypt-aamek ayagluku Kuik Euphrates engelekluku,

¹⁹ nuniit ilakluku Kenite-at, Kenizzite-at, Kadmonite-at,

²⁰ Hittite-at, Perizzite-at, Rephaim-aat,

²¹ Amorite-at, Canaanite-at, Girgashite-at Jebusite-at-llu.”