Genesis 12 - Yupik Bible

Agayutem Qayagaurutii Abram-aamun

¹ Atanrem qanrutaa Abram-aaq, “Nakmiin nunan, tungayaten, atavet-llu enii unilluki ayii nunamun allamun nallunairarkamnun elpenun.

² Kinguvengevkarciqamken amllernek, tamakut-llu atanruvigpaurciiqut. Atawaqerceciiqamken atren-llu angelriarurtelluku, atawaqautngurrniartuten.

³ “Atawaqaasqilriit elpenek atawaqerceciiqanka, aniqlaasteten-llu aniqlaaciqanka. Elpegun-llu atawaqerceciiqanka nunam yui.”

⁴ Abram-aaq allrakungluni yuinarnek pingayunek akimiarmek cipluku (75) ayallruuq Haran-aamek Atanrem pisquciatun; Lot-aam-llu maliggluku.

⁵ Abram-aam malikluki nuliani, nurr'ani-llu Lot-aaq, tukuuteteng, pisteteng-llu tamalkuita pikliutelteng Haran-aami, ayagtuq Canaan-aam nuniinun. Canaan-aam-llu nuniinun tekicameng,

⁶ Abram-aaq ayagtuq nunakun tamaaggun tekilluku napa Moreh-mi kenciknarqelria, tanqilriaruluni Shechem-aami. Tamatum nalliini Canaan-aarmiut tamaani nunami cali uitallruut.

⁷ Ataneq alairtuq Abram-aamun qanrulluku-llu, “Man'a nuna cikiutekaqa kinguverpenun.” Abram-aaq-llu ekuaviliuq tuani Atanermun alairvikestellerminun.

⁸ Taum kinguani ayagtuq ungalatmun qemililriamun nunamun calaralirnerani Bethel-aam. Tuani-llu pelatekartuq Bethel-aaq kanaknalirneqluku, Ai-aq-llu calaralirneqluku. Tuani-llu cali ekuaviliuq agayuluni-llu Atanermun.

⁹ Abram-aaq cali ayagtu'rtuq, ciunequ'urluku Canaan-aaq.

Abram-aaq Egypt-aami

¹⁰ Tau͡gaam piitnallruut Canaan-aami, taumek Abram-aaq ayallruuq Egypt-aamun uitaqeryarturluni, piitnaq tamaani anagucan.

¹¹ Tekiteqataameng Egypt-aamun nuliani Sarai-a qanrutaa, “Elpet-tang kenegnaqapigtellriaten.

¹² Tangerqunegteggen Egypt-aarmiut umyuarteqciqut, ‘Una nulirqellinia.’ Tuaten-llu umyuarteqluteng tuquciiqaatnga elpet unguvavkarluten.

¹³ Qanqina wangnun nayagaqniluten, elpenek picirluteng elluarrlua ciuniurniaraatnga tuqutevkenii.”

¹⁴ Tua-i Egypt-aamun itran Egypt-aarmiut tangrraat nulirran kenegnartacia.

¹⁵ Atanerruarin angayuqam tangrramegteggu qanrutkaat kenegnartacia angayuqamun; eniinun-llu Sarai-a agulluku.

¹⁶ Tua-i Sarai-a pitekluku angayuqam Abram-aaq elluarrluku ciuniuraa, cikirluku-llu qusnginek, qusngirngalngurnek, kuluvagnek, ciulvagnek, pisten̄ek, ungungssinek-llu qulugnelegnek.

¹⁷ Tau͡gaam Atanrem nangteqnarqelriit cangerliit tuc'etai angayuqamun yugnun-llu eniini uitalrianun, Sarai-a Abram-aam nulirra pitekluku.

¹⁸ Taumek angayuqam Abram-aaq aqvavkaraa qanrulluku-llu, “Ciin waten pisia? Ciin qanrutenricia nuliqniluku?

¹⁹ Ciin qanellrusit nayagaqniluku? Wiinga-llu teguyaaqluku nuliqnaluku. Waniwa nulian; teguluku ayii!”

²⁰ Angayuqam-llu yuut alerqurai Abram-aaq piluku, ayagcetaat-llu nulirra malikluku, cautai-llu tamalkuita malikevkarluki.