Genesis 11 - Yupik Bible

Babylon-ami Ena Qertulria

¹ Ellarpiim yui ataucimek qaneryarangqellruut qanellrit ayuqluteng.

² Tua-i ayagallermeggni tamaani calaratmun, tekitut nunamek manigcelngurmek Babylonia-mi tuani-llu nunaliluteng.

³ Qanruyutut-llu, “Kitaki qikulinaurtukut enekanek kenerkun-llu tegg'ivkarluki.” Tua-i qikuutengut enelissuutekameggnek taarmek-llu nepyutkaitnek.

⁴ Qanertut-llu, “Nunalinaurtukut naparciluta-llu qertulriamek qilak tekilluku; caliamta niitnauvkarluta cekavcetenritniaraakut tamiinun ellarpiim iluanun.”

⁵ Ataneq-llu atrartuq tangerrnaluku nuniit tauna-llu qertulria yuut napartellrat.

⁶ Qanertuq-llu, “Ukut yuut atauciurneruut, ataucimek qaneryararluteng. Una waten pillerteng ayagneqluku caperrsuyuiruciiqut camek taqutellerkameggnek.

⁷ Tailuci atrarluta ayuquciirutnarivkarnaurput qaneryaraat taringutesciigali'irrniartut.”

⁸ Tua-i Atanrem cekavtai ellarpiim iluanun, arulairluni nunarpagmek naucillrat.

⁹ Nuniit tauna acillruat Babylon-aamek, tuani Atanrem qaneryarait ayuqenrircetellruaki. Tuaken-llu cekavvluki tamiinun nunam qainganun.

Shem-am Kinguvri

¹⁰ Ukut waniwa kinguvri Shem-am. Allrakuk malruk kinguagni ulerpallran, Shem-aq allrakungluni yuinarnek tallimanek (100) qetunranguq Arpachshad-aamek.

¹¹ Taum-llu kinguani unguvaluni allrakuni tiissitsaam avgani (500) cali-llu allanek irniangluni.

¹² Arpachshad-aaq allrakungluni yuinaq akimiarmek cipluku (35) qetunrangellruuq Shelah-mek;

¹³ taum-llu kinguakun unguvaluni allrakuni yuinaat yuinaq pingayunek cipluku (403) allanek-llu cali irniangluni.

¹⁴ Shelah-llu allrakungluni yuinaq qulnek cipluku (30) qetunrangellruuq Eber-aamek.

¹⁵ Taum-llu kinguakun unguvaluni allrakuni yuinaat yuinaq pingayunek cipluku (403) allanek-llu cali irniangluni.

¹⁶ Eber-aaq-llu allrakungluni yuinaq akimiarunrita'armek cipluku (34) qetunrangellruuq Peleg-amek;

¹⁷ taum-llu kinguakun unguvaluni allrakuni yuinaat yuinaq atauciq qulnek cipluku (430) allanek-llu cali irniangluni.

¹⁸ Peleg-aaq-llu allrakungluni yuinaq qulnek cipluku (30) qetunrangellruuq Reu-amek.

¹⁹ Tuamta-llu kinguakun unguvaluni allrakuni yuinarnek qulnek qulngunrita'armek cipluku (209) cali-llu allanek irniangluni.

²⁰ Reu-aq-llu allrakungluni yuinarmek qula malrugnek cipluku (32) qetunrangellruuq Serug-aamek;

²¹ taum-llu kinguakun unguvaluni allrakuni yuinaat qulen malrunlegnek cipluku (207) cali-llu allanek irniangluni.

²² Serug-aaq-llu allrakungluni yuinaq qulnek cipluku (30) qetunrangellruuq Nachor-amek;

²³ taum-llu kinguakun unguvaluni allrakuni yuinarni qulni (200) cali-llu allanek irniangluni.

²⁴ Nahor-aq-llu allrakungluni yuinaq qulngunrita'armek cipluku (29) qetunrangellruuq Terah-mek;

²⁵ taum-llu kinguakun unguvaluni allrakuni yuinaat talliman yuinaunrita'armek cipluku (119) cali-llu allanek irniangluni.

²⁶ Terah-llu allrakungluni yuinarnek pingayunek qulnek cipluku (70) irnianguq Abram-aamek, Nachor-amek, Haran-aamek-llu.

Terah-m Kinguvri

²⁷ Ukut waniwa kinguvri Terah-m atiita Abram-aam, Nahor-am, Haran-aam-llu. Haran-aaq atakellrua Lot-aam.

²⁸ Haran-aaq-llu tuqullruuq nunami Ur-ami Babylonia-mi, atani unguvainanrani.

²⁹ Abram-aaq-llu nulirturtuq Sarai-amek, Nahor-aq-llu nuliangluni Milcah-mek Haran-aam panianek. Haran-aaq atakluku Iscah-m.

³⁰ Sarai-a-llu irniangyuituq.

³¹ Terah qetunrani-llu Abram-aaq, Lot-aaq-llu nurr'ani, Haran-aam qetunraa, ukurrani-llu Sarai, Abram-aam nulirra, malikluki taukut ayagtuq Canaan-aamun unilluku nunaseng Ur-aq Babylonia-melnguq. Ayallruut tekilluku Haran-aaq tuanlluteng-llu.

³² Tuani tuqullruuq Terah allrakungluni yuinaat qulen tallimanek cipluku (205).