Genesis 10 - Yupik Bible

Noah-m Qetunrain Kinguvrit

¹ Ukut waniwa kinguvrit Noah-m qetunrain Shem-am, Ham-am, Japheth-aam-llu. Ukut qetunrangellruut ulerpiim kinguakun.

² Japheth-aam qetunrai: Gomer, Magog, Madai, Javan, Tubal, Meshech, Tiras-aaq-llu. Ukut ciuliaqait yuut kinguvrita atrinek aprumalriit.

³ Gomer-aaq kinguvengqertuq yuitnek Ashkenaz-aam, Riphath-aam, Togarmah-m-llu.

⁴ Javan-aaq kinguvengqertuq yuinek Elishah-m, Spain-am, Cyprus-aam, Rhodes-aam-llu.

⁵ Ukut ciuliaqellruit yuut imarpiim cen̄iini qikertani-llu uitalriit. Japheth-aam kinguveqluki, yuuluteng ilakutellriit allakarmeng nunameggni, allakarmeng-llu qaneryaramegcetun qalartetuluteng.

⁶ Ham-am-llu qetunrai: Cush, Egypt, Libya, Canaan-aaq-llu.

⁷ Cush-aq kinguvengqertuq yuinek Seba-m, Havilah-m, Sabtah-m Raamah-m, Sabteca-m-llu. Raamah-llu kinguvengqertuq yuinek Sheba-m Dedan-aam-llu.

⁸ Cush-aq-llu qetunrangqellruuq aterluni Nimrod-amek, tauna ciuqlikacagauluni ellarpiim iluani cirlakilriarullruuq pinilriaruluni.

⁹ Atanrem ikayuumiini piculriarullruuq. Taumek waten yuut qanlalriit, “Atanrem piculiuvkaqiliten Nimrod-atun!”

¹⁰ Taum atanirturillra ukunek ayagnillruuq: Babylon, Erech, Accad-amek-llu. Tamarmeng ukut uitaluteng Babylonia-mi.

¹¹ Tamaaken nunamek ayallruuq Assyria-mun nunarpaliluni-llu Nineveh-mek, Rehoboth-Ir-amek, Calah-mek-llu, cali

¹² Resen-aamek, tauna uitaluni akuliigni nunak Nineveh-nkuk nunarpiim-llu Calah-m.

¹³ Egypt-aaq kinguvengqellruuq yuinek Lydia-m, Anam-aam, Lehab-am, Naphtuh-m,

¹⁴ Pathrus-aam, Casluh-m, Crete-am-llu. Crete-aq ciuliaqluku Philistine-at.

¹⁵ Canaan-aam-llu qetunraak Sidon-aaq amaqlia, Heth-aq-llu. Ukuk kinguliakek atkegnegun nallunaitelartut.

¹⁶ Canaan-aaq-llu ciuliaqellruat Jebusite-at, Amorite-at, Girashite-at,

¹⁷ Hivite-at, Arkite-at, Sinite-at,

¹⁸ Arvadite-at, Zemarite-at Hamathite-at-llu. Canaan-aam ilakuralriartai ayuqenrilnguut sagtellruut,

¹⁹ kiituani nuniita ilaksagutaa Sidon-aaq ayagluni-llu ungalatmun Gerar-amun, Gaza-m nunii yaaqsigpek'naku. Tuamta-llu ayagluni calaratmun Sodom-aamun, Gommorrah-mun, Admah-mun, Zeboiim-un-llu yaaqsigpek'naku Lasha.

²⁰ Ukut kinguveqai Ham-am, allakarmeng ilakutellriit yuuluteng nunani ayuqenrilngurni, qalartellrit ayuqevkenateng.

²¹ Anngaa Japheth-aam Shem-aq Hebrews-aat tamarmeng ciuliaqaat.

²² Shem-am qetunrai, Elam, Asshur, Arpachsad, Lud, Aram-aaq-llu ciuliaqluki tuaten yuut aterpagcimalriit.

²³ Aram-aaq kinguvengqertuq yuitnek ukut: Uz, Hul, Gether, Meshek-aam-llu.

²⁴ Arpachshad-aaq atakluku Shelah-m Eber-aam atiin.

²⁵ Eber-aaq malrugnek qetunrarluni. Aipaan-wa atra Peleg, waten aterluni tamatum nalliini ellam yui avgumallrulliniata. Anelgutii aterluni Joktan-aamek.

²⁶ Joktan-aaq kinguvengqertuq yuinek Almodad-am, Sheleph-aam, Hazarmaveth-aam, Jerah-m,

²⁷ Hodora-m, Uzal-aam Diklah-m,

²⁸ Obal-aam, Abimael-aam, Sheba-m,

²⁹ Ophir-aam, Havilah-m, Jobab-aam-llu. Ukut tamarmeng ciuliarluteng Joktan-aamek.

³⁰ Nuna uitaviat Mesha-mek ayagluni Shephar-aam tungiinun qemit calaralirnermi tekilluki.

³¹ Ukut waniwa kinguvri Shem-am. Allakarmeng ilakellriit nunaluteng. Ayuqevkenateng qaneryarait.

³² Makut tamalkuita ilakuralriit kinguveqai Noah-m, ilakuyutetaciicetun atanruviitni; ukunek ayagnirluteng yuut cekavtut nunami ulerpiim kinguani.