Ezra 1 - Yupik Bible

Cyrus-aam Alerqurai Jews-aat Utertesqelluki

¹ Allrakut ciuqliatni Cyrus-aaq Persia-m angayuqra angayuqrullrani, Atanrem qanrutkellni prophet-aakun Jeremiah-kun piciurcetellrua. Cyrus-aaq ellimellrua picirkirisqelluku mat'umek igaulluku ayagcecesqelluku naaqesqelluku nani tamiini angayuqauvimini yuut tamalkuita niitelluki:

² “Waten qanertuq Cyrus-aaq Persia-m angayuqra: Atanrem, Qiliim Agayutiin, atanrurcetellruanga ataniuresqelluku ellarpak tamalkuan, piyunarqucilirlua-llu agayuvigpagmek agayuvilisqelluni Jerusalem-aami Judah-melngurmi.

³ Agayutem nayurlici tamarpeci yum'ini. Ayagarkauguci Jerusalem-aamun nautenqiggluku-llu Atanrem Agayuvigpii, Agayutiin Israel-aam, Agayun agayularviktukiit Jerusalem-aami.

⁴ Nunameggnek ayaucimallret yuin iliit ikayuryukan utertellerkaminun, nunalgutain ikayurnarqutiinek ikayurarkaugaat qerrirlinek suulutaamek-llu, aturyugarkainek tumemini, ungungssinek-llu atmagturtekaanek, cali-llu ayaucetarkauluku elliitnek cikiutekainek elliitekluki Agayutem Agayuvigpiinun Jerusalem-aami.”

⁵ Tua-llu ciulirnerit Judah-m Benjamin-aam-llu ilakelriartagken, agayulirtet Levite-at-llu, allat-llu Agayutem umyugillri ayaasqelluki, uptut ayagnaluteng nautenqiggnaluku Atanrem Agayuvigpii Jerusalem-aami.

⁶ Tamarmeng-llu nunalgutaita ikayurluki cikirait canek amllernek: qerrirlinek qantanek, suulutaamek, aturyugarkaitnek, ungungssinek-llu atmagturtekaitnek, allanek-llu piksunarqellrianek, elliitnek-llu Agayuvigpagmun.

⁷ Angayuqam-llu Cyrus-aam ellaitnun utercetellrui Nebuchadnezzar-aam tegullri qantat saskat-llu Agayuvigpagmek Jerusalem-aami agayutnguami-llu agayuviatnun ellillruluki.

⁸ Tamakut tunai Mithredath-aamun, ciuliqagtiitnun akiliurcet, taum-llu naaqellrui tunqatallerminiki Sheshbazzar-aamun nunam atanranun Judah-mi.

^9-10 Wani-wa ukut naaqellri: suulutaat qantat elliissuutet 30 (yuinaq qulmek cipluku) qerrirlit qantat elliissuutet 1,000 (tiissitsaat) allat qantat 29 (yuinaq akimiaq cetamanek cipluku) suulutaat qantacuaraat yuinaq qulmek cipluku (30) qerrirlit qantacuaraat 410 (yuinaat yuinaat qulnek cipluki) allat-llu qantat 1,000 (tiissitsaat)

¹¹ Quyurmeng naaqellrit suulutaat qerrirlit-llu qantat amllertaluteng tiissitsaat talliman yuinaat-wa yuinaat (5,400), cali allanek ilaluteng Sheshbazzar-am ayautellrinek ayallermini allanek maligluni nunameggnek ayagcecimallernek Babylon-aamek Jerusalem-aamun.