Esther 1 - Yupik Bible

Queen Vashti-m Narurtaa Angayuqaq Ahasuerus-aaq

^1-2 Ahasuerus-aaq atanrullruuq nunanun yuinaat arvinlegen malrunlegnek cipluku (127) amllertalrianun India-mek ayagluni Ethiopia tekilluku.

³ Allrakut atanrurqaanerminek pingayuatni nerevkariuq kelegluki atanerruani, pisten̄i, anguyagtem̄i-llu atanrit Persia-mi Media-mi-llu, yuut-llu piuranrit nunat-llu ataniumak'ngami atanrit.

⁴ Iraluni arvinlegni tangaavkallrui angayuqauvimi tukuutai, tangnirqetacia-llu ucurnarqucia-llu.

⁵ Taum kinguani tauna angayuqaq cali nerevkarinqigtuq nunarpagmi Susa-mi kelegluki tamalkuita angutet tukuungraata arrsaungraata-llu. Agayunrek akuliik aturluku nerevkarillruuq, nerluteng-llu naucetaarviani angayuqam eniin.

⁶ Tauna-llu nerevkarivia tangnircaumaluni capkutarluni qiuglinek qatellrianek-llu 'lumarrarnek, qillrusngaluteng 'lumarraqegtaarmek purple-aamek naparyanun teggalquqegtaarnun. Aqumlleri qerrirliuluteng suulutaaruluteng-llu, cailkaq-llu tutmallrat qalliliumaluni qatellrianek teggalquqegtaarnek, kavirlinek feldspar-anek, qerrircetellrianek mother of pearl, qiuglinek-llu turquoise-aanek.

⁷ Merkait-llu saskarluteng suulutaarrlainarnek tamarmeng qaimegteggun ayuqevkenateng, merkameggnek-llu nuuqitevkenateng.

⁸ Tau͡gaam meryuumiilnguq merngaunani qessangraan-llu pivkaumangaunani; atanrem pisten̄i alerqullruamiki yuut piyugtaciicetun pivkaasqelluki.

⁹ Vashti-llu cali angayuqam nulirra tamaani angayuqam eniini nerevkarillruuq arnaullgutminek kelgiluni.

¹⁰ Erenret malrunelgatni angayuqam taangiqu'urluni pisten̄i Mehuman, Biztha, Harbona, Bigtha, Abagtha, Zethar, Carcas-aaq-llu taisqai.

¹¹ Alerqurluki-llu nuliani Vashti nasqerrutii at'elluku taicesqelluku kenegnaqapigcan, kenegnartacia ilaminun tangrresqelluku.

¹² Tau͡gaam Vashti angayuqam alerquutiinek pistet qanrutengraatni niitenrituq, angayuqaq ullagyuumiinaku. Angayuqaq-llu qenqerrluni.

¹³ Angayuqam piciryaraqngamiu kangiiyugaqami alerquutmeggni qaillun cam pimaarkaucia ayuqucirtuasten̄i taivkarluki nallunriciiqngatgu qaillun picirkarteng.

¹⁴ Ukut angutet ayuqucirtuastem̄ini ciumek tangerturalallinii camek piaqami, malrunelgen atanerruari Persia-m Media-m-llu, quyinkacagauluteng calialget tuani angayuqauvigmi: Carshena, Shethar, Admath, Tarshish, Meres, Marsena, Memucan-aaq-llu.

¹⁵ Waten qanrutai, “Alerquutet aturluki qaillun pimaarkauga angayuqam nulirra Vashti niitenrilaku angayuqam Ahasuerus-aam alerquutii pistem̄ikun qanrucarturcetengraani?”

¹⁶ Tua-llu Memucan-aam qanrutai angayuqaq atanerruat-llu: “Vashti-m caunrilkenritaa angayuqaq nalliikun, tau͡gaam atanerruari-llu tapqulluki, tuaten-llu cali angayuqauviim angutai tamalkuita.

¹⁷ Tuaten pillra Vashti-m arnat nallunriqunegteggu uiteng caunrilkengciqait. Waten qanlarciqut, ‘Angayuqam Ahasuerus-aam nuliani Vashti alerqurluku taisqellrungraani niitellrunritaa.’

¹⁸ Nulirrita angayuqam atanerruarin Persia-mi Media-mi-llu Vashti-m ayuqucillra niiskunegteggu unugpailgan uimeggnun nallunrirceciiqaat. Arnat-llu tamiini uiteng qigcikenrirciqait, uingitaa-llu nuliateng qenrutengluki.

¹⁹ Kitaki piyunakekuvgu angayuqruuten, picirkirikina Vashti ciuqerpenun tainqigngairutelluku. Igautelluku-llu alerquutaitnun Persia-rmiut Media-rmiut-llu cimirciigaliluku. Vashti-m-llu enii allamun elliini assinrulriamun teguvkarluku.

²⁰ Man'a picirkiun niiskunegteggu angayuqauvigpet yuin tamarmeng, arnat qigcigyaguciiqait uiteng tukuungraata arrsaungraata-llu.”

²¹ Memucan-aam qanellra angayuqam atanerruartuumarmi assikngamegteggu angayuqaq tuaten pillruuq.

²² Nunanun tamaitnun qaneryaramek ayagcecillruuq taringellerkaatgun igaryarait-llu aturluki, qanrulluki uingulria tamarmi atanruarkauniluku eniini qanqan-llu piugarkamek qanerciqniluku.