Daniel 9 - Yupik Bible

Daniel-aam Piicautai Yun'i

¹ Darius-aaq Mede-aq, Xerxes-aam qetunraa, angayuqaullruuq angayuqauviani Babylonia-m.

² Angayuqrurtellran ciuqliatni allrakumi prophet-aat igaitnek yuvrillemni nallunrirtua Atanrem qanellranek prophet-aamun Jeremiah-mun, qanerluni, “Jerusalem-aaq imumaluni uitaciquq allrakuni yuinarni pingayuni qulmek cipluku (70).”

³ Piicallruunga-llu cumigglua Atanermun Agayutmun, kaigavikluku, yaglua nereksaunii, missuullernek allua, qamllermi-llu aqumgalua.

⁴ Piicallruunga Atanermun Agayutemnun apervikuatekluki-llu yum'a assiilnguit. Qanerlua, “Ataneq Agayun, elpet angtataituten, wangkuta-llu qigcikamteggen. Akqutkellren pinricen̄arngaitan, kenkerrlainaraten-llu taqsuunaki kenkesteten alerquutvet-llu aturtait.

⁵ “Wangkuta assiilngillruukut, assiitellria-llu atullruarput, piciunrilnguq aturluku inglulitaarluta tuaten, avvluta-llu alerquutevnek picirkiutevnek-llu.

⁶ Niicuunaki-llu pisteten prophet-aat, qanresqellerpenek aterpegun qalarucilriit angayuqamten̄un, atanirturtemten̄un, ciuliamten̄un, nunam-llu yuinun tamalkuitnun.

⁷ Elpet, Ataneq, piciulriarrlainarnek pilartuten, wangkuta tau͡gken kasngunarqutkamten̄ek piaqluta. Man'a-llu tamamta aturarput uitalriani Judah-mi Jerusalem-aami-llu, tamarmeng-llu Israel-aam yuin cekavtellerpet nunanun canimelngurnun yaaqvanelngurnun-llu assiilngillrat elpenun pitekluku.

⁸ Wangkuta angayuqaput, atanirturteput, ciuliaput-llu kasngunarqellriakun assiilngillruut elpenun, Ataneq.

⁹ Elpet takumcutalriaruuten au͡g'ariciaqluten-llu, inglulitaallrungramteggen.

¹⁰ Niisngallrunritamteggen, Ataneq Agayutvut, qanrut'ngerpekut qaillun yuullerkamten̄ek alerquutetgun cikiuteklerpegun wangkutnun pisteten prophet-aat tumekluki.

¹¹ Tamarmeng Israel-aam yuin atullrunritait alerquuteten iqlutmurrluteng-llu, qanrut'ngerpeteng niicugpek'nateng. Taumek aniqlaatet akeqnerrlugutet-llu igausngalriit alerquutaini Moses-aam Agayutem pistiin, tut'ellriit wangkutnun assiilngillerput elpenun pitekluku.

¹² Qanellrucirpetun pillruarpekut ciuliqagteput-llu. Jerusalem-aaq arcaqanrulriamek anucimirqecetaallruan, pinruluku allami nunarpagmi nunam qainganelngurni, yuk piurqaanranek nangteqnarqellriamun tuc'eciiqniluku, pinritevkenak-llu tua-i piarkaullren piciurtelluku.

¹³ Tamarmeng-llu makut nangteqnarqelriit tut'ut wangkutnun igausngacirmegcetun Moses-aam alerquutaini, tau͡gken wangkuta cakaniryugpek'nata piicaksaunata-llu takumcukesqelluta Atanermun Agayutemten̄un, umyualinqiggluta assiilngillemten̄ek, piciulriit-llu qanelten maligtaquluki.

¹⁴ Elpet, Ataneq Agayutemta, anucimirqecetaarutkaq uptellren wangkutnun tuskan; tua-i-wa elluarrlainalriamek calilriaruavet, wangkuta-llu qalarut'ngerpekut niicunrilamta.

¹⁵ “Ataneq Agayutemta, anutestellemta Egypt-aamek pinirpegun, pinin-llu wangkuta nalluyaguteksaitarput. Wangkuta assiilngillruukut alarqaqluta.

¹⁶ Ciungani mat'um akiurut'lallruarpekut, taumek qenrutenriqiu Jerusalem-aaq. Elpet nunarpakngavgu, qemiqngavni qigcignarqelriaruuq. Tamarmeng avaqlimta nunat yuita caukenritaat Jerusalem-aaq yut'en-llu, tua-i-wa assiilngillerput ciuliamta-llu assiitellriamek calillrat pitekluku.

¹⁷ Ataneq, ciuniurru piicauteka takumcuca'arlua piicalqa. Ataam nauskiu Agayuvigpiin, piunriumalleq; yuut tamarmeng nallunrirniaraat elpet Agayutngucin.

¹⁸ Agayutmaa, niiskut tangerrluku-llu qaillun picurlaumatacirput nangteqtacia-llu nunarpiim aterpenek aciumalriim; piicanritukut elluarucirput pitekluku, tau͡gaam piicagtukut elpenun takumcutalriaruavet.

¹⁹ Ataneq, niiskut. Ataneq, au͡g'ariskut. Ataneq niilluta ikayurkut! Atatakutevkenak, yuut tamarmeng nallunrirniaraat Agayutngucin. Una nunarpak yui-llu elpet pikaten.”

Gabriel-aam Nalqigtaa Tekitarkaq Qanrutkumalleq

²⁰ Piicagturallruunga, apervikuatekluki assiilnguunka Israel-aam-llu yuin assiilnguit, takumcucarautekluku-llu Atanermun Agayutemnun ataam napartesqelluku tanqilria Agayuvigpak.

²¹ Piicainanemni-llu Gabriel-aaq, tangelqa ciuqlirmek tangaallemni, tengaurluni atrartuq ullaglua atakuqlirmi elliiyaraata nalliini.

²² Tekicamia qanrutaanga, “Daniel-aaq, ullagamken ikayurluten taringevkarnaluku tekitarkaq qanrutkumalleq.

²³ Piicakarraallerpeni Agayutmun, elliin kiullruaten. Elliin kenkaten, taumek tailrianga qanrucarturluten caucianek. Murilkelluten niicugnikina tangellren nalqigtellemni.

²⁴ “Agayutem cuq'lillrua nunarpagpeci qigcignarqellriim angicimallerkaa assiilngurmek yuinarnek yuinarnek yuinaat-wa cetaman qulmek cipluku (490) allrakunek. Assiilnguut au͡gaumaciqut elluarrluteng-llu cuqciyaraq atungarkauluku, tangellren piciurtesqelluku, Tanqilria-llu Agayuvigpak ataam naaqicimasqelluku.

²⁵ Nallunairturluku una taringekiu: Ayagneqluku alerquucimallra Jerusalem-aam ataam nautesqelluku, engelekluku-llu Agayutem cucukek'ngaan ciuliqagtem tekitellra allrakut yuinaak malruk qulngunrita'armek cipluku (49) pellugciqut. Jerusalem-aaq-llu ataam nauciquq tumyararluni asvairqumaluni-llu, piugarkauluni-llu allrakuni yuinaat yuinaat yuinaq-wa atauciq akimiarunrita'armek cipluku (434), tau͡gaam taukuni allrakuni arenqialliqutet amllerarkauluteng.

²⁶ Taukut allrakut kinguatgun tauna Agayutem cucukek'ngaa ciuliqagta tuqucimaarkauguq pinarqenrilnge'rmi. Pinilegpauluni atanirturilriim anguyagtain piunrirarkauluku nunarpak Agayuvigpak-llu. Iquklitlerkaq tekiciiquq ulerpagtun, anguyak tekiulluku piunrirnarqellria-llu Agayutem uptellra.

²⁷ Tauna-llu atanirturilria pillguciutarkauluni amllernun yugnun allrakuni malrunlegni, tau͡gaam taukut allrakut malrunelgen avkata elliiyaraq ekuagiluni arulairceciiqaa. Cakneq alingnarqellria irranarqellria-llu ellimaarkauluni Agayuvigpiim qertuqaanun tuani-llu uitaarkauluni tuavet ellistellran Agayutem upyutellrakun piunrirnatkaanun.”