Daniel 7 - Yupik Bible

Daniel-aam Tangaallerminek Aperturillra ( 7.1—12.13 ) Daniel-aam Cetaman Ungungssit Tangellri

¹ Allrakumi ciuqlirmi Belshazzar-aaq angayuqaullrani Babylon-aami, qavangurtullruunga canek-llu tangaalua unugmi. Qavanguqa igautaqa, waniwa cauciit

² unugmi taumi tangellrenka: Anuqnek piciatun anuqlilrianek qailingevkarluku imarpik.

³ Cetamanek-llu ayuqenrilngurnek ungungssirpagnek tangerrlua nugelrianek imarpigmek.

⁴ Ciuqliat yugtutulitun ayuqluni yaqulegpinraagnek yaqurluni. Tangvainanemni-llu yaquk qecuumalutek. Ungungssiq-llu tauna nangercecimaluni nangertuq yugtun, yuum-llu umyugaanek cikiumaluni.

⁵ Aipaa-llu ungungssim taqukatun ayuqluni nangengqaluni kingulirneregnegun ipiigmikun. Tauna-llu keggmiangqertuq pingayunek tulimanek, qanrucimaluni-llu waten, “Piyugtacirpetun kemegmek neri!”

⁶ Tangvainanemni-llu cali alla ungungssiq alairluni. Tauna kuskarpagtun leopard-aatun ayuquq tau͡gaam tunumikun cetamanek yaqulgem yaquinek yaqurluni, cetamanek-llu qamiqurluni. Takarnarqucingqellriatun-llu tauna ayuqluni.

⁷ Tangvainanemni cali cetamiit ungungssit alairtuq. Tauna piniqapigtuq, alingnaqluni cakneq; cavignek kegguterluni, keggmaq'ngaqluni ciqumlluki, ciqumqaarluki tutmautaqluki. Ciumini ungungssitun alaillertun ayuqenrituq; qulnek-llu cirunerluni.

⁸ Taukut-llu cirunri irr'iknginanemni tangertua cirunecuayaarmek pugelriamek taukut cirunret akuliitgun. Pingayun-llu cirunret qecugtelluki enairluki. Tauna-llu ciruneq yinraagnek iiluni qanerluni-llu, qalarrluni-llu cakneq ucuryaggluni.

Tangertuq Akwarpak Unguvallermek

⁹ Tangvainanemni-llu atanruviit aqumlleret nekaitnun ellimallruut. Tauna-llu imna akwarpak unguvalleq aqumluni taukut iliitnun. Tauna aturangqertuq qanikcartun qatertalriamek, nuyarluni-llu qusngim melquqegtaaraitun ayuqellrianek. Aqumllera-llu akalrialiumaluni, ekurpagluni.

¹⁰ Keneq-llu tuaken carvanirluni anluni. Tiissitsaarugaat-wa yuut tuanlluteng kevgiuryuumaluku, naaquciilnguut-llu yuut ciuqerrani nangengqaluteng. Qanercetaarillerkaq ayagnian kalikat ikirtait.

¹¹ Tangvainanemni taukut, niitela'arqa imna cirunecuayaaq cali ucuryaggluni qalartellria. Tangvainanemni-llu taukut ungungssit cetamiit tuqucimaluni, temii-llu kenermun egtaat piunrirluku.

¹² Imkut-llu allat ungungssit piniatnek allurcimaluteng, tau͡gaam cuq'lirluki qaillun pitalriamek unguvavkaumaarkauluteng.

¹³ Tuani-llu unugmi tangaallemni tangertua yugtun ayuqellriamek. Amirlumek caqumaluni agiirtellriamek, taumun-llu akwarpak unguvalriamun ciunian ullautaat elliinun.

¹⁴ Cikiumaluni-llu piyunarqucimek, takarnarqutmek, pinimek-llu, atanruvillgutkenrilngurnun, nauvillgutkenrilngurnun, qaneryarallgutkenrilngurnun-llu kevgiuresqelluku. Atanruarkauluni-llu akwarpak, angayuqauvia-llu iquklisngaunani.

Tangaallri Nalqigcimaut

¹⁵ Tangaallma unugmi uitacurlagcetaanga, cakneq-llu umyuassuugartellua.

¹⁶ Tuani-llu nangengqalriit iliit ullagluku aptaqa cauciitnek makut tangellma. Tua-i taum qanrutaanga nalqigullua tamakunek.

¹⁷ Qanertuq, “Ukut cetaman ungungssit tangelten cetamaugut angayuqauviit naugarkat maani nunami.

¹⁸ Tau͡gaam Angtatailnguum Agayutem yui pinimek cikiumaciqut pikameggnek akwarpak tayima.”

¹⁹ Tua-llu nallunrikaniryugluku piaqa ungungssit cetamiita caucia, ilamitun ayuqenrilnguq, uluryanaqluni cakneq, kegguterluni cavignek cetugluni-llu punernernek; keggutmikun cetumikun-llu ciqumciaqluni, ciamqaarluki tutmautaqluki it'gaminek.

²⁰ Cali-llu nallunriryuganka cauciit qulen cirunret qamiqurrani, tauna-llu alla ciruneq naulleq akuliitgun cirunret pingayun qecugtelluki, iingqerrluni qanerluni-llu ucuryaggluni qalarrluni, alingnarqenruluni taukuni ilamini.

²¹ Tangvainanemni-llu taum cirunrem anguyagai Agayutem yui cirlakluki-llu.

²² Imna-llu unguvalria iquilngurmek taiguq, cuqcillermini-llu ingluarvikai Angtatailnguum Agayutem yui. Tua-i-wa Agayutem yuin pinimek akurtullerkaat tekican.

²³ Waten nalqigcilria qanertuq, “Tauna ungungssit cetamiit cetamakaqaat angayuqauviit nunami, angayuqauvigcetun-llu allatun ayuqngaunani. Nuna tamalkuan cirlakciqaa, ciqumtarkaugaa tutmaulluku-llu.

²⁴ Imkut-llu qulen cirunret, tuaken angayuqauvigmek qulnek angayuqertangciqliniuq, allamek-llu cali angayuqertangarkauluni taukut kinguatgun; taukucetun ciuqlircetun ayuqenrilngurmek, piunririarkauluni-llu pingayunek angayuqanek.

²⁵ Tauna-llu qalarciiquq inglulirluku Angtatailnguq Agayun, nanglluki-llu Agayutem yui. Cimingnaqciqai-llu agayumalriit piciryarait alerquutait-llu, Agayutem-llu yui ataniumaarkauluki cetamiit avegluku allrakuni.

²⁶ Nutaan-llu pakmani qilagmi cuqcistet quyurqaarluteng tauna pinianek uayarciqaat piunriqapiggluku-llu.

²⁷ Piniit ucurnarquciit-llu tamarmeng nunami angayuqauviit tunumaciqut Angtatailnguum Agayutem yuinun. Piniq akurtullerteng pikciqaat nangyuilngurmek, nunami-llu atanirturilriit tamarmeng kevgiulriaruarkauluteng ellaitnun, niisngaarkauluki-llu.”

²⁸ Waten mat'um qanrutkumallra taktauq. Wiinga-llu alingem ugaani kegginaqa qakiluku, makut-llu yugmun qanrutkellruvkenaki.