Daniel 5 - Yupik Bible

Belshazzar-aam Nerevkarillra

¹ Caqerluni Angayuqaq Belshazzar-aaq kelgiuq tiissitsaanek takarnarqellrianek nerevkariluni-llu, mellgutekluteng-llu wine-amek.

² Merainanermeggni, Belshazzar-aaq alerquiguq taitesqelluki suulutaat qerrirlit-llu saskat qantat-llu atami Nebuchadnezzar-aam tegullri Jerusalem-aami Agayuvigpagmek. Belshazzar-aam tamakut aqvavkarai elliin, atanerruarin, nulirrin, allat-llu arnain aturluki mer'analuteng.

³ Tamaa-llu suulutaat saskat qantat-llu taitait, tamarmeng-llu aturluki mer'aluteng

⁴ nanrarluki tuaten agayutet suulutaamek, qerrirlimek, punernermek, cavigmek, muragmek, teggalqumek-llu piliaqumalriit.

⁵ Alqunaq yuum unatai alairtut igarluteng-llu angayuqam eniin qacarneranun, kenurrat ciqinqallratnun. Belshazzar-aam-llu tangvagluki unatet igallratni.

⁶ Alingalliimi qak'iqertuq ciisquk-llu qiivlutek.

⁷ Qayagpagluni taivkaasqai angalkut agyatgun-llu ciunerkarcutulit. Taingata-llu qanrulluki, “Ilavci ukut igat naaqsugngakaki nalqigullua-llu cauciitnek aturiumaciquq qesurlimek uyamiliumaluni-llu suulutaamek takarnarqutmek, atanret-llu angayuqauvigmi pingasuiqerkauluku.”

⁸ Angayuqam ayuqucirturtai taiyaaqut, tau͡gaam igat naaqesciigatait nalqigutesciiganaku-llu angayuqaq cauciitnek.

⁹ Tua-i Angayuqaq Belshazzar-aaq uuqassugartuq, kegginaa-llu qakivsiarluni, tamakut-llu takarnarqellriari qaillun picirkaunateng.

¹⁰ Nulirran angayuqam niilluki neplillratni angayuqaq ilai-llu nerviatnun iterluni qanrutai, “Unguvamakina angayuqaaq! Alingenrilu qak'iqrutkevkenaku-llu.

¹¹ Angucetangqertuq angayuqauvigpeni anerneratnek tanqilriit agayutet pingqellriamek Atavet angayuqaullran nalliini, una angun ayuqucingumalriarullruuq, umyuartuluni-llu agayutet umyuartuyaraacetun. Atavet-llu Nebuchadnezzar-aam, ciulirnerurtellrua angalkunun agyatgun-llu ciunerkarcutulinun.

¹² Yuut allat pisciigalkait piyugngallrui umyuartuluni-llu, qavangunek tuaten nallunarqellrianek nalqigciyugngaluni; aqvavkarru una Daniel-aaq, angayuqam Belteshazzar-aamek acillra, elliin qanruciiqaaten mat'um kangianek.”

Daniel-aam Nalqigtai Igat

¹³ Daniel-aaq egmianun taitaat angayuqamun, angayuqaq-llu qanertuq elliinun, “Daniel-aaruuten-qaa, Jews-aat teguat iliit Judah-mek atama taitellra?

¹⁴ Niitellruunga anerneratnek tanqilriit agayutet pingqerrniluten, elisnganiluten umyuartuluten-llu.

¹⁵ Angalkut ciunerkarcutulit-llu taivkallruyaaqanka naaqesqelluku una igaq nalqigutesqellua-llu kangianek, tau͡gaam kangianek qanrutesciigataatnga.

¹⁶ Niitellruamken nallunarqellrianek nallunairiyugnganiluten nalqigciyugnganiluten-llu cauciilngurnek. Naaqsugngakuvki ukut igat nalqigullua-llu kangiatnek, qesurlimek aturiumaciquten, takarnarqucilegmek-llu suulutaamek uyamilirluten, pingayuqciqaatgen-llu atanirturilriit angayuqauvimni.”

¹⁷ Daniel-aam kiugaa, “Nunuliutekaten avaliqiki wall'u allamun cikiutekluki. Naaqiciiqamken iganek nalqigulluten-llu kangiatnek.

¹⁸ “Angtatailnguum Agayutem angayuqaurcetellrua aatan Nebuchadnezzar-aaq angelriaruvkarluku ucurnarqellriaruvkarluku-llu.

¹⁹ Angqapigcan-llu atanruvillgutkenrilnguut yuit, qaneryarallgutkenrilnguut-llu uulegtelallruut alikluku. Tuquciyugaqami tuqucilallruuq, unguvavkariyugaqami-llu unguvavkariaqluni. Piyukni-llu takaqelallrua, piyukni-llu cali caunrilkaqluku.

²⁰ Tau͡gaam ellminek pivaksagucan, asvairucan-llu, nangcilangluni tuaten, au͡gaumallruuq atanruvianek aqumllermek ucurnarqucianek-llu allurcimaluni.

²¹ Ayagcecimallruuq yuut akuliitnek, umyuara-llu ungungssim umyugaatun ayuqliriluni. Yuilqurmiutaat ciulviit ilagarluki uitaluni, ner'aqluni canegnek kuluvagtun, qavaraqluni ellami, yukutam-llu temii meciraqluku. Cayaqlirluni nallunrillrua Angtatailngurmun Agayutmun piurtelauciit yuut angayuqauviit, cikiuteksugngaluki-llu kitumun imumun piyullerminun.

²² “Elpet tau͡gken, qetunraani, elpenek pivakenriqsaituten, nallunrilngerpeki makut.

²³ Ayuqucirpegun ingluliran qiliim Atanra taitelluki-llu saskat qantat-llu Agayuvigpagmek tegullrit. Aturluki-llu elpet, takarnarqelriartaten, nuliaten, arnauteten-llu wine-amek mer'aluci, nanrarluki tuaten agayutet piliaqumalriit suulutaamek, qerrirlimek, punernermek, cavigmek, muragmek, teggalqumek-llu, agayutet tangerciigalnguut wall'u niitesciiganateng, camek-llu nalluluteng. Tau͡gken nanrarpek'naku Agayun pillerkiurumasten unguvallerkarpenek tuqullerkarpenek-llu, callerpet-llu tamalkuan ataniumastii.

²⁴ Tamakut pitekluki Agayutem unatet alaircetai igartelluki-llu makunek.

²⁵ “Waniwa ukut igallri: ‘Naaqun, naaqun, uqamaltaciq, avgumalriit.’

²⁶ Wani-wa-llu nalqigutii: naaqun, Agayutem naaqumai angayuqauvigpet ernertarkai iquklitelluku-llu;

²⁷ uqama, uqamaltassiarcuutegnegun uqamaltassiarumallerpeni uqgetsiyaagtuten;

²⁸ avgumallerkaq, angayuqauviin avverqumauq cikiutekumaluni-llu Medes-aanun Persian-aanun-llu.”

²⁹ Egmianun Belshazzar-aam alerqurai pisten̄i Daniel-aaq ac'ecesqelluku qesurlimek aturamek, uyamilirluku-llu suulutaamek takarnarqutmek. Atanernun-llu pingasuiqsagutelluku angayuqauvigmi.

³⁰ Tuani-llu unukuan Babylonia-m angayuqra, Belshazzar-aaq, tuqucimallruuq;

³¹ Darius-aam-llu Mede-armium, allrakui yuinaat pingayun malrugnek cipluku (62) amllertaluteng, atanruvik teguluku.