Daniel 11 - Yupik Bible

¹ Elliin caliarkaqaa ikayurarkaulua akiurullua-llu.

² Wani-wa-llu elpenun qanrutkarkaqa piciulriaruluni.” An'gilaq qanertuq, “Pingayun cali angayuqat Persia-mun angayuqauciqut, cetamangqerrarkauluteng-llu ellaitni tukuunrulriamek. Tukuutmikun pinirikuni inglulirarkaugaa Greece-am angayuqra.

Angayuqauvikek Egypt-aankuk Syria-llu

³ “Tua-i-llu angayuqertangciquq pinilriamek nunanek amllernek atanirturiarkamek umyuani aturluku.

⁴ Tau͡gaam pininruqallran nalliini nunat ataniumak'ngai quyungqanrirciqut cetamainguluteng-llu avegluteng. Angayuqat kinguvanrilnguut elliinek atanirturiciqut eniini, tau͡gaam elliitun pinirtangaunateng.

⁵ “Egypt-aarmiut angayuqrat pinilriaruciquq. Tau͡gaam anguyagtain atanrata iliit elliini piningqenruarkauguq nunat-llu atanirtuq'ngai amllenruarkauluteng.

⁶ Allrakut qavcin kinguatni Egypt-aam angayuqra ililiuciiquq Syria-m angayuqranun paniminek-llu nulirturtelluku. Tau͡gaam ilikellrak ak'anun pingaunani, tauna-llu arnaq, uinga-llu, irniara-llu, pistai-llu tamarmeng tuqucimaarkauluteng.

⁷ Kinguakun tamatum ak'anun pivkenani taum arnam tungayiin iliit angayuqrurciiquq. Anguyagluku-llu Syria-m angayuqra cirlakluku-llu.

⁸ Egypt-aamun-llu ut'rulluki taukut agayutnguarit, suulutaat-llu qerrirlit elliitek'lallrit tamakunun. Allrakut-llu aturluki anguyaksaunani uitaqararkauluni.

⁹ Tamatum kinguakun Syria-m angayuqran anguyagciqaa Egypt-aaq tau͡gaam cirliqluni ataam utertarkauluni.

¹⁰ “Syria-m angayuqran qetunrai upciiqut anguyagnaluteng quyurciluteng anguyagterugarnek. Taukut ayagciqut ulerpagtun ayalriatun ciuneqluku asvairqumalria inglukestem̄eng uitaviat.

¹¹ Egypt-aam-llu angayuqran qenqerrluni anguyagciqaa Syria-m angayuqra teguaqsagulluki-llu anguyagterugai.

¹² Egypt-aarmiut angayuqrata ucuryagutekciqaa cirlakillni tuqurqiluni anguyagterugarnek, tau͡gaam tuaten cirlakiurluni pingaunani.

¹³ “Syria-m angayuqra uterrluni quyurciciquq anguyagterugarnek ciuqlirmi amllenrulrianek; allrakut-llu qavcin kinguatni ayagarkauluni anguyagyarturluni, anguyagterugarnek maligluni, anguyagcuuterugarnek-llu ang'aqluni.

¹⁴ Tamatum-llu nalliini amlleret yuut ingluksaguciiqaat Egypt-aarmiut angayuqrat. Elpet-llu nunalgutvet ilait aaryuyuilnguut inglulitaarciqut man'a tangaallren nasvaumalria piciurcetengnaqluku, tau͡gaam cirlakumaarkauluteng.

¹⁵ Nutaan-llu Syria-m angayuqran anguyagciqaa asvairqumalria nunarpak teguluku-llu. Egypt-aam-llu anguyagtai anguyanrirciqut, pininqengraiceteng piniaruciiqngameng.

¹⁶ Syria-rmiut curullret ciuneteng umyugiurutkeciqait ingluliurtekaiciiqngameng. Akqutkumallermi-llu nunami uitaarkauluni ataniumaluku tamalkuan.

¹⁷ “Tua-llu Syria-m angayuqra picirkiurciquq anguyagyugluni anguyagten̄i tamalkuita aturluki. Piunringnaqkuniu inglukestem̄i angayuqauvia iliksugluku piciqaa paniminek-llu nulirtuusqelluku; tau͡gaam picirkiuraa piciurrngaituq.

¹⁸ Tamatum kinguani nunat imarpiim cen̄iinelnguut anguyagciqai amlleret-llu cirlakluki. Tau͡gaam yaaqvarmium anguyagtet atanrata cirlakluku ucuryagtesciigalivkarciqaa, ucuryagutellra elliinun utertelluku.

¹⁹ Tauna angayuqaq uterciiquq kingunerminun asvairqumalrianun nunamini. Cirlakumallruami-llu niitnaunqiggngaunani.

²⁰ “Taum-llu angayuqam kinguakun allamek angayuqertangciquq, taum-llu atanerruani ayagcetarkauluku yuut nangcecarturluki akiliqurautetgun angayuqauvini tukuurcetnaluku. Tau͡gaam tauna angayuqaq ak'anun pivkenani tuqucimaarkauluni, anguyagkun wall'u yuut tangvallratni pivkenani.”

Assiitellria Angayuqra Syria-m

²¹ An'gilam egmircillni ciumurulluku qanertuq, “Taum cimirkaa Syria-m angayuqerkaa assiitqapiarararkauguq angayuqruyugnaicaaqeng'ermi-llu usvituyarrluni alapen'errluki angayuqrurtarkauluni.

²² Inglulirtai-llu tamarmeng, Agayutem-llu Agayulirten͞guneqengraani, piunriumaarkauluteng.

²³ Iliksuguarluki allat atanruviit ukvertelarciqai; piniriarkauluni-llu atanruvigmun yugkilngurmun atanirturten͞gunge'rmi.

²⁴ Tukurliq nuna piqatarraarpek'nani curugciqaa, canek-llu ciuliami piksailkaitnek pilararkauluni. Avgutarkauluki-llu maligngasten̄i tegukengaqellerminek anguyagaqami. Picirkiularciquq anguyagnaluni tau͡gaam amllermek pillerkangqerrngairuciiqluni.

²⁵ “Uluryayugpek'nani quyurciarkauguq amllernek anguyagten̄ek anguyagnaluku Egypt-aarmiut angayuqrat. Tau͡gaam ellii-llu upciiquq nutaan anguyagterugarnek akiurnaluni, tau͡gaam iqluurumaciqngami atanruvimi yuikun Egypt-aarmiut angayuqrat anagngaituq.

²⁶ Cacetuqutekluki ayuqucirtuastain picurlagavkarluku anguyagtai tuqurqeciqait nangluki.

²⁷ Taukuk-llu angayuqak aqumgaciquk ataucimi estuulumi nernalutek, tau͡gaam umyuarrliqucamek ellmegnun iqluuruciiquk. Piyullertek unakngaitaak, piyullragnek pillerkaa cali tekiteksailan.

²⁸ Tauna Syria-m atanra uterciiquq tukuuluni anguyagkun piksagutellerminek, umyuamikun-llu cumiggluni piunrirnaluku Agayutem yuin agayumaciat. Umyuani aturluku piciquq nutaan-llu kingunerminun uterrluni.

²⁹ “Pillerkiurumallermini cali anguyagciqaa Egypt-aaq tau͡gaam ciunganicetun pingaunani.

³⁰ Sun'at Rome-amek tekilluteng inglulirciqaat, tauna-llu alingluni pinricen̄ararkauluni. “Uterciiquq tauna eq'urrluni piunringnaqerkauluku-llu Agayutem yuin agayumaciat. Agayumacimek-llu tamaaken avtellret pisquciat maliggluki piarkauluni.

³¹ Anguyagtain-llu ilaita menuurciiqaat Agayuvigpak, unuaquaqan-llu elliiyarat ekuagiluteng taqevkarluki elkarrluku-llu tuavet Uluryanarqellria Assiitqapigtellria.

³² Angayuqam-llu taum iqluquluki yuksaguciiqai imkut agayumacimeggnek pegcillret, tau͡gaam Agayutem maligngastai pektayiitarkaugut ingluliurutarkauluteng-llu.

³³ Yuut-llu ilait umyuartulriit ilateng ayuqucirturciqait. Tau͡gaam cali ak'anun pivkenateng tuqucimalarciqut anguyagkun, ilait-llu ekuamaluteng, ilait-llu uayaumaluteng itertauluteng tuaten.

³⁴ Tuqurqumallermeng nalliini Agayutem yui amllenrilngurkun ikayuumaciqut, amlleret-llu ilautelarciqut ellaitnun ellmeggnek tau͡gaam arcaqakellerteng pitekluku.

³⁵ Ilait-llu tamakut umyuartulriit tuqucimaciqut, tau͡gaam tuaten pillratgun yuut menuircaumaarkauluteng iquklitlerkaq Agayutem pillerkiuraa tekilluku.

³⁶ “Angayuqra-llu tauna Syria-m umyugiulriaruciquq; ellminek-llu quyinrulriarurrluni agayutni tamalkuitni, alangaanarqellrianek-llu qalartarkauluni inglulirluku Artuqailnguq Agayun. Tuaten-llu piyugngaarkauluni Agayutmek anucimirqecetaarumallerkani engelkarrluku. Agayutem picirkiurani cakanirpek'naku tuaten piarkaungami.

³⁷ Taum-llu atanrem ciuliami agayutait cakngaunaki, agayun-llu arnat kenkek'ngaat; cakngailamiki agayutet tamalkuita ellminek angenrurrluni tamakuni piami.

³⁸ Qigcikarkauluku tau͡gaam agayun asvairqumalriit qaunqestiit. Elliivikciqaa-llu suulutaamek qerrirlimek-llu teggalquqegtaarnek-llu allanek-llu cikirarkauluku agayun ciuliami agayuvikeksailkiit.

³⁹ Teguvkanritengnaqkuniu asvairqumalria nunani yugnek ilalirluni piciquq agayutulinek tangnerranarqellriamun agayutmun. Atanruciminek ciuniurten̄i takarnarqucirciqai, caliarkitaqluki quyilrianek nunakaitnek-llu nunuliraqluki.

⁴⁰ “Angayuqran Syria-m iquklitniarallra canimellikan, Egypt-aam angayuqran anguyagciqaa, Syria-m-llu angayuqran pinirtacini tamalkirrluku akiurarkauluku anguyagcuutmikun akalrialegteggun, horse-aatgun, sun'arugarteggun-llu. Anguyagarkauluki nunat amlleret ulerpauskiitun ayuqlirivkarluki.

⁴¹ Imna-llu Nuna Akqutkumalria cali anguyagarkauluku yugnek tiissitsaarugarnek tuqurqiluni. Tau͡gaam Edom-aaq, Moab-aq, Ammonite-at-llu nunautiita ilii anguyagngaunaki.

⁴² Anguyakuniki-llu tamakut Egypt-aaq pinrilngaunaku.

⁴³ Ayautarkauluki-llu Egypt-aam tukuutai suulutaat qerrirlit-llu, allat-llu cali qununarqellriit; cali-llu cirlakarkaulukek Libya-nkuk Sudan-aaq-llu.

⁴⁴ Tau͡gaam niiskuni qanemcinek calaramek negeqvamek-llu alingem tuciiqaa callugarkauluni-llu pitacimitun, tuqurqiluni amllernek yugnek.

⁴⁵ Pelatekarpani-llu naparrluki akuliignun imarpiim ingrim-llu Agayuvigpiim uitavian; tau͡gaam tuquarkauluni ikayurtekaunani.”