Amos 9 - Yupik Bible

Atanrem Cuqyutai

¹ Tangrraqa Ataneq nangerngavkarluku ekuaviim caniani, waten-llu picirkiriluni, “Kaugturciki kangrit Agayuvigpiim naparyai tusnganri arulavkarluki. Userqelluki igqaqevkarciki yuut qamiqurritnun. Ilait yuut tuquciiqanka anguyagkun. Kina imna anagngaituq; atauciunge'rmi qimagngaituq.

² Elagluteng ayagyaaqengraata camavet tuqumalriit nuniitnun, teguciqanka. Qilagmun-llu mayuryaaqengraata, atrarciiqanka.

³ Iiqata Ingrim Carmel-aam kangranun, yuarciqanka teguluki-llu. Iiqatnga imarpiim terr'anun, wiinga alerqurciqaqa imarpiim ciissirpii keggesqelluki.

⁴ Inglukestaita-llu ayauskatki teguarurrluki, alerquuciiqanka tuqutesqelluki. Cumigtua piunrirnaluki, ikayurngaunaki.”

⁵ Quyinrulriim Atanrem Artuqailnguum nuna agturaa, nuna-llu pekluni; tamarmeng-llu tamaani uitalriit angniitarkaugut. Ellarpak tamarmi mayulartuq iggluni-llu kuigtun Nile-atun.

⁶ Atanrem eneni piliaqellrua qilagni, nuna-llu qilakucirluku qilagmek. Imarpiit mer'et qayagaularai kuvluki-llu nunamun. Atengqertuq tauna Atanermek!

⁷ Ataneq qanertuq, “Israel-aam yuini, umyuartequtanka yui Ethiopia-m umyuartequtelaucimtun elpeci. Philistine-at taitellruanka Crete-amek Syrian-aat-llu Kir-amek, elpeci taitellrucimtun Egypt-aamek.

⁸ Wiinga, Quyinrulria Ataneq, murilkaqa una assiilngurtulria angayuqauvik Israel-aaq, piunrirciqaqa-llu nunam qainganek. Tau͡gaam piunrirngaitanka tamalkuita Jacob-aam kinguvri.

⁹ “Alerquiciqua arulalluki-llu Israel-aam yui mukaarkatun katagcissuutem iluanelngurtun. Arulaciiqanka atanruviit akuliitni cakarniilnguut au͡g'arluki.

¹⁰ Assiilngiumalriit yum'a akunliitni anguyagkun tuqucimaciqut—tamarmeng waten qanlallret, ‘Agayutem camun pivkarngaitaakut.’”

Israel-aam Ataam Elluarillra

¹¹ Ataneq qanertuq, “Erneq tekiciquq David-aam angayuqauvianek ataam ayuqucillratun elkarcillerkaqa, mat'um nalliini enetun imllertun ayuqellriaruuq. Tumarciiqanka qacarneri ayuqucillracetun. Napartenqigciiqaqa ak'a imumi ayuqucillra ayuqliutelluku.

¹² Tua-i-llu Israel-aam yuin cirlakciqaat ilakuarulleq Edom-aam nunii atanruviit-llu ciungani pikellrenka,” qanertuq Ataneq, mat'um piciurcetestekaa.

¹³ “Erenret tekiciqut,” qanertuq Ataneq, “mukaarkat naulallerkaat cukam ugaani quyurcilriit nuqlitelluki, wine-arkat-llu atsat naugaqluteng cukam ugaani wine-alistet nuqlitelluki. Ingrit kuterpagciqut neqnirqellriamek wine-amek, pengutgun-llu qurrlurluni.

¹⁴ Ut'ruciiqanka yuunka nuniitnun. Napartenqigciiqait imumalriit nunarpiit uitavikluki-llu; nauceciilarciqut wine-arkanek atsanek wine-aitnek-llu mer'aqluku; nauceciilarciqut ner'aqluki-llu nauvkalteng.

¹⁵ Yuunka elkarciiqanka nunamun cikiuteklemnun, tamaaken-llu ayaucimanqiggngaunateng.” Ataneq Agayutsi tuaten qanellruuq.