Amos 8 - Yupik Bible

Tangrruaq Issratmek Atsanek Imalegmek

¹ Allamek cali tangrruarcetaanga Quyinrulriim Atanrem. Tuani tangertua issratmek atsanek imalegmek.

² Ataneq aptuq, “Amos, camek tangercit?” Kiugaqa, “Issratmek atsanek imalegmek.” Atanrem qanrutaanga, “Iqua tekitaat yum'a Israel-aam yuin. Umyuaqa ciminqiggngaitaqa anucimirqecetaallerkaatnek.

³ Tuani ernermi yuarutet atuqait angayuqam eniini tuquillret nepeksaguciiqait. Tuqumalriit temait piciatun tamiini uitaciqut. Egqaqciqait nepailcaarluteng.”

Israel-aam Piunrillerkaa

⁴ Niicugniciu una, elpeci tutmaucilalriani nuuqitellrianek piunringnaqluki-llu nunami arrsaulriit.

⁵ Waten qanrut'lartuci elpecen̄ek, “Nerinisngialliqutekaput tanqilriit erenret iquklitlerkaat mukaarkauteput tunenaluki. Qaku erneq uitayaraq iquklitqatarta, ataam cali tuneniaryalriakut? Nutaan cat akiit ilaluki tunlarniaput, uspernek piciunrilngurnek aturluta, usperissuuteput teglegissuutngurrluki kiputellrianun wangkutnek.

⁶ Tun'ilarniartukut akiilngurnek mukaarkanek akiturrluki. Nalaquskumta-llu arrsaulriamek angutmek akiilnguirciigalngurmek, aluilitaungraagnek akilirisciiganani, kipuciiqerput pistekarkauluku.”

⁷ Ataneq Israel-aam Agayutii, ukvernarcariluni waten qanellruuq, “Wiinga nalluyagusngaitanka assiitellriit caliarit.

⁸ Taumek-llu nuna pekciiquq, nunami yuut tamarmeng nanikuaciqut. Nuna tamarmi arulacimaciquq; mayuraqluni atraraqluni-llu Kuigtun Nile-atun.

⁹ Ernermi tuani akerta tevirceciiqaqa erenrem qukallrani nuna-llu tan'gericiquq erenrani. Wiinga, Quyinrulria Ataneq qanertua.

¹⁰ Anglaniyaraci tungmagciyaraurceciiqanka angnirnarqellriit yuaruteci angniilngurnun nepeksagutelluki. Nuyaci qiurceciiqanka missuullernek-llu aturtelluci, ayuqeciquci-llu angayuqaagtun kiingan irniamegnek tuquillertun. Tauna erneq angniitnaqciquq iquklilluni.

¹¹ “Pillerkaq agiirtuq ayagcecillerkaqa piitnamek nunamun. Yuut kaigciqut, tau͡gaam neqkamek pivkenateng. Kaigciqut meqsugluteng-llu niicuumirluteng Atanrem qaneryaraanek. Wiinga, Quyinrulria Ataneq qanertua.

¹² Yuut ayagaciqut Dead Sea-mek Mediterranean-aamun uivluteng-llu negeqvamek calaramun. Tamiini yuaraciqsaaqut Atanrem qaneryaraanek, tau͡gaam nalaqusngaitut.

¹³ Tuani ernermi angutet arnat-llu segganqeng'e'rmeng iqularciqut meqsuum ugaani.

¹⁴ Ukvernarcarilalriit-llu agayutnguarikun Samaria-m, qanerluteng, ‘Dan-am agayutiikun’ wall'u ‘Beersheba-m agayutiikun’, taukut yuut iquciqut makngairulluteng.”