Amos 7 - Yupik Bible

Tangrruaq Petgertayulinek

¹ Tangrruarcetellruanga Quyinrulriim Atanrem. Tuani tangrraqa ellii pilivkarluku petgertayulirugarnek, angayuqam avgutkain can'get kepumallrata kinguaraakun, allat-llu canyagaat naugarrluteng.

² Tangrruamni tangrranka petgertayulinun nerevkarluki cungagcetellriit naumalriit tamalkuita nunami, tua-i-llu wiinga qanertua, “Quyinrulriami Ataneq, au͡g'ariski yut'en! Qaillun piluteng unguvaciqat? Mikvakaameng pinianateng-llu!”

³ Ataneq umyualinqigtuq qanerluni-llu, “Tangellren tuaten pingairutuq.”

Tangrruaq Kenermek

⁴ Allami cali tangrruarcetaanga Quyinrulriim Atanrem. Tuani tangrraqa uptellrani anucimirqecetaaqatarluki yun'i kenerkun. Kenrem ekuagaa imarpikayak nunam acianelnguq, nuna-llu cali ekuangluku.

⁵ Tua-llu qanertua, “Uitaqaa, Quyinrulria Ataneq! Qaillun unguvaciqat yut'en? Mikvakaameng pinianateng-llu!”

⁶ Ataneq umyualinqigtenqiqtuq qanerluni-llu, “Una cali pingairutuq.”

Tangrruaq Nakercisuutmek Pelacinagmek

⁷ Atanrem tangrruarcetenqigtaanga. Tuani tangrraqa nangengqavkarluku qacarnerem caniani, piliaqumallrem aturluni nakercissuutmek pelacinagmek, tegumiangqertuq-llu nakercissuutmek pelacinagmek.

⁸ Aptaanga, “Amos-aaq, camek tangercit?” Kiugaqa, “Nakercissuutmek pelacinagmek.” Tua-llu qanertuq, “Aturaqa nasvagluku yum'a qacarnertun nakrialngurtun ayuquciat. Umyualinqigtenqiggngaitua anucimirqecetaaqatallemnek.

⁹ Isaac-aam kinguvrin agayularviit piunriumaciqut. Tanqilriit-llu agayuviit-llu Israel-aami imenrurciiqut. Angayuqam-llu Jeroboam-aam angayuqrullran kinguvallra arulairceciiqaqa.”

Amos-aankuk Amaziah-llu

¹⁰ Amaziah, Bethel-aam agayulirtii, kalikarmek ayagceciuq Jeroboam-aamun Israel-aat angayuqratnun: “Amos-aam inglulilaraaten yuut akuliitni. Qalartellermikun nuna piunrirceciiqaa.

¹¹ Waten qanlartuq: ‘Jeroboam-aaq tuquciquq anguyagkun, Israel-aam-llu yui ayaucimaluteng nunameggnek teguarurrluteng.’”

¹² Amaziah-m qanrutaa Amos-aaq, “Prophet-aaq usuuq, tuaten pitanariaten! Uterrluten Judah-mun qaneryariuryartua. Akilirtelluten ellaitnun.

¹³ Qaneryariunermek taqi wani Bethel-aami. Una angayuqam agayuvikaa, angayuqauviim yuin tamarmeng agayuvikluku.”

¹⁴ Amos-aaq kiuguq, “Wiinga prophet-aarunritua akingellerkaqa pitekluku. Qusngiliurten͞guunga, figs-aat-llu napaitnek aulukisten͞gulua.

¹⁵ Tau͡gaam Atanrem tegullruanga qusngiliurten͞gullemnek alerqurlua-llu tailua qalarucartuusqelluki Israel-aam yui.

¹⁶ Taumek niicugni Atanrem qanellranek elpenun. Qanrutarpenga taqesqellua qaneryariunermek, qalarutesqevkenaki-llu inglulirluki Israel-aam yui.

¹⁷ Taumek, Amaziah, Ataneq qanertuq elpenun, ‘Nulian nunarpagni akissuurciiquq, irniaten-llu anguyagkun tuquluteng. Nunauten avgumaciquq allanun-llu cikiutekumaluni, elpet-llu tuquluten agayumanrilnguut nuniitni. Israel-aam-llu yui ilumun ayaucimaciqut nunameggnek teguarurrluteng.’”