Acts 9 - Yupik Bible

Saul-aam Umyualinqigtellra

¹ Tua-i Saul-aaq qalarqu'rtuq nangetnaluki tuqutnaluki-llu inglukluki ukut Atanrem elitnaurai agayulirten͞gunernun-llu ayagluni.

² Kalikanek-llu cikiisquq piyunarqucimek, nasvagarkaminek agayuvignun Damascus-aami, tua-i pairkengani ukvelriit tumemini, angutngungraata wall'u arnaungraata, elliin qilleqluki Jerusalem-aamun ayautnaluki.

³ Tua-i ayallermini Damascus-aarmiut malleggluki, alqunaq tanqik tanqigpallartuq avatiinun, kingunerluni qilagmek.

⁴ Ellii-llu iquuq nunamun, ellminun-llu qanelriamek niituq, “Saul, Saul, ciin nangpakarcia wii.”

⁵ Tua-i-llu aptaa, “Kituusit, Ataneq?” Kiugaa-llu, “Jesus-aaruunga, nangeskengan, cingilegmun tukayunaituten.”

⁶ Ellii-llu uuleggluni alangaarami qanertuq, “Ataneq qaillun pisqumasia?” Atanrem qanrutaa, “Nangerten, nunanun-llu itra, tuani qanrucimaciquten qaillun pillerkarpenek.”

⁷ Angutet-llu taukut pektellgutai nangengqaut qanerviinateng, erinamek niicaaqngameng tau͡gken camek tangerpek'nateng.

⁸ Saul-aaq-llu maktuq nunamek; tua-i iigni uicaaqak tau͡gaam tangrrutesciiganatek, unataikun-llu tass'uqluku tekiutaat Damascus-aamun.

⁹ Pingayunek-llu ernirluni camek tangeqsaituq, tuaten-llu nereksaunani meqsaunani-llu.

Ananias-aamun Angllullra

¹⁰ Tua-i tuani elitnaurartangqertuq Damascus-aami, at'legmek Ananias-aamek, Atanrem-llu qavanguakun qanrutaa, “Ananias-aaq.” Elliin-llu kiugaa, “Wantua Ataneq.”

¹¹ Atanrem qanrutaa, “Makluten ayii pekcaramun, Nalqilriamek aterpagcimalriamun, Judas-aam-llu eniini apqauqina yugmek Saul-aamek at'legmek, Tarsus-aarmiumek; tangerrluku, ellii tauna piicagtuq.

¹² Qavangumikun-llu tangellruuq yugmek itlermek atengqerrluni Ananias-aamek, taum-llu unatminek pategvikaa cikmiumallranek tangerrsaurcelluku.”

¹³ Tua-i Ananias-aam kiugaa, “Ataneq, tauna yuk niitela'arqa amllerqunek, qaillun amllertalriamek assiilngurmek taqucianek yugpenun Jerusalem-aami.

¹⁴ Wani-wa-llu ellii piyunarqucimek pillruuq agayulirten͞gunernek qilleqnaluki tamalkuita elpet aterpet apaastai.”

¹⁵ Tau͡gaam Atanrem qanrutaa, “Ayii, tua-i ellii wani-wa cingilguarkaq cucukumalria wangnun, atqa qalarutkesqelluku Agayumanrilngurnun, atanernun-llu Israel-aam-llu kinguvrinun.

¹⁶ Tua-i wiinga nasviciiqngamku qaillun amllertalriamek nangteqerkaucianek atqa wii pitekluku.”

¹⁷ Tua-i Ananias-aaq ayagtuq, itrami-llu enemun unatminek pategvikaa qanerluni-llu, “Anelgutmaa usuuq Saul-aaq, Atanrem Jesus-aam, elpet taillerpeni alairvikestevvet tumevni, ayagcetaanga, tua-i wani-wa tangerrsaurcesqumaluten, Anernermek-llu Tanqilriamek pingesqelluten.”

¹⁸ Tamaa-llu iigkenek igqaqut qelten͞galnguut tangerrsaurtuq-llu tamaa, nangercami-llu angllurcetevkartuq.

¹⁹ Nerngami-llu pinirivkaumauq. Ernerni-llu qavcini, elitnaurat ilakluki Damascus-aami uitauq.

²⁰ Tamaa-llu elitnaurvigni (Agayuvigni) qalarutkaa Jesus-aaq, Agayutmun Qetunraqniluku.

²¹ Niitestain-llu tamarmeng irr'ikaat qanerluteng, “Imuunrituq-qaa Jerusalem-aami piunriringnaqsaaqelleq Jesus-aam atran apaastainek? Tamana-llu pitekluku maavet tekitellruyaaqluni qilleqluki ayautnaluki agayulirten͞gunernun.”

²² Saul-aaq-llu tukniriinartuq, Jews-aat-llu qanerviirai nalqigulluki Christ-auniluku tauna.

²³ Erenret-llu amlleret pelluata, Jews-aat qaillukuartut tuqutnaluku.

²⁴ Tau͡gaam man'a picirkiuraat nallunriraa Saul-aam. Amiiget-llu kellucaaqait ernerni unugmi-llu, tua-i tuqutnaluku.

²⁵ Elitnaurain tau͡gaam teguat, unugmi assigtamun ekluku qacarnerkun aqevlerrluku atrartaat.

Jerusalem-aami Nallunairillra

²⁶ Jerusalem-aamun-llu tekicami, elitnauranun ilaliutengnaqsaaquq. Tau͡gaam taukut tamarmeng alikaat ukveqevkenaku-llu elitnauraucia.

²⁷ Barnabas-aam tau͡gaam ikayuraa, apostle-aanun-llu ullaulluku, nalqigulluki-llu qaillun Atanermek tangellrucianek tumyarami, qalarucillranek-llu elliinun, qaillun-llu qaneryariullrucia Damascus-aami alingunani Jesus-aam atrakun.

²⁸ Tua-i tamana engelekluku ilaksagutaat, tekitaqluni ayagaqluni-llu Jerusalem-aami.

²⁹ Qalaruciaqluni alingunani Atanrem atrakun, qalartelartuq-llu inglukluki Greek-aat Jews-aat-llu; tau͡gaam ellaita tuqutengnaqsaaqaat.

³⁰ Tau͡gaam ilain niicamegteggu Caesarea-mun atrautaat tuaken-llu Tarsus-aamun ayagtelluku.

³¹ Agayuviit tau͡gaam Judea-mi tamiini, Galilee-ami-llu Samaria-mi-llu uitanqegcingut pinirimaluteng-llu Anernerkun, yuuluteng-llu Ataneq qigcikluku, qarucimaluteng-llu Anernerkun Tanqilriakun amlleriinartut.

Peter-aam Anirturillra Aeneas-aamek

³² Piuq-llu, Peter nunat ullagtaallermini, agayumalriit Lydda-mi uitalriit tekitai.

³³ Yugmek-llu tuani tangertuq atengqerrluni Aeneas-aamek, tauna inarrvigminek makteksaitellruuq pingayunlegnek uksurluni tua-i pektesciigalami.

³⁴ Peter-aam tua-i qanrutaa, “Aeneas-aaq, Jesus-aam Christ-am canrircetaaten, makluten inartessuuteten kitugeski.” Tamaa-llu maktuq.

³⁵ Tamarmeng-llu Lydda-rmiut Sharon-aarmiut-llu tangrraat, ellait-llu Agayutmun caugut.

Peter-aam Unguircecillra Dorcas-aamek

³⁶ Ukverumalriartangqertuq-llu Joppa-mi arnamek Tabitha-mek at'legmek. (Mumigcimallrakun-llu piaqluku Dorcas-aamek, wall'u “tuntuyagamek.”) Tauna assilrianek caliangqelartuq naklekiluni kusgurtarluni-llu.

³⁷ Tua-i-llu tamatum nalliini naulluullruuq tuquluni-llu. Temii-llu erurraarluku qullirmun elliat.

³⁸ Tamana-llu Lydda, Joppa-mek canimelan elitnaurat niicamegteggu Peter-aam tuanlucia, angutek malruk ayagcetagket kaigavikesqelluku waten, “Uitavkenak ullagkut.”

³⁹ Peter-aam-llu nangerrluni maligtak. Tekican-llu qullirmun mayuutaat, arnat-llu aipainret canianun quyurtut qialuteng nasvilluku-llu ilupernek qaspernek-llu aturanek-llu ayuqenrilngurnek, Dorcas-aam piliaqellrinek unguvallermini.

⁴⁰ Peter-aam tau͡gaam anevkarai tamalkuita, ciisqumiggluni-llu piicagtuq. Temii-llu cauluku qanertuq, “Tabitha, makten.” Elliin tua-i iigni uitak. Peter-llu tangrramiu maktuq.

⁴¹ Peter-aam-llu unatminek teguluku nangertaa, nutaan-llu imkut agayumalriit aipainret-llu taisqelluki ellaitnun tunaa unguvaluku.

⁴² Joppa-melnguut-llu tamarmeng man'a nallunriraat, amlleret-llu Atanermun ukvertut.

⁴³ Peter-llu akaarnun tuantuq Joppa-mi, Simon-aam qatviistem eniini uitaluni.