Acts 7 - Yupik Bible

Stephen-aam Nallunairillra

¹ Tua-i agayulirten͞gunrem aptaa, “Piciuguq-qaa man'a qanellrat?”

² Elliin-llu kiugai, “Ilamaa, atamaa-llu, niicugnicia! Ucurnarqelria Agayun alairtuq Abraham-aamun Mesopotamia-metellrani Haran-aamun tekipailgan.

³ Qanrulluku-llu, ‘Nunan yut'en-llu uniski upagluten-llu nunamun wii aperturarkamnun.’

⁴ Tua-i an'uq Chaldean-aarmiut nuniitnek, Haran-aami-llu uitaluni. Tuaken, atii tuquan, Agayutem nugtarcetaa nunamun uumun elpeci nunaksaguskengarpecen̄un.

⁵ Nakmiin-llu nunautekaanek cikinritaa cakuinraungraan, wall'u it'gain tusvigkaqengraatgu, tau͡gaam akqaa cikirarkauniluku mat'umek, kinguvrinun-llu, elliin kinguakun akwarpak pikaatnek; tau͡gken Abraham-aaq irniangeksaunani.

⁶ Agayun-llu qanellruuq, Abraham-aam kinguvri ayagarkauniluki nunakenrilkemeggnun, allrakuni-llu yuinaq yuinarni, teguaruluteng nangcimaarkauniluki.

⁷ Nunalgutkelriit-llu taukut pisten͞guvikellrit qanercetaarciqanka, qanertuq Agayun, kinguakun-llu taiciqut kevgiurlua-llu mat'um nuniini.

⁸ “Akquyutmek-llu cikiraa nuugiryaramek. Abraham-aaq-llu qetunranguq Isaac-aamek, nuugirluku-llu erenret pingayunelgatni. Isaac-llu qetunranguq Jacob-aamek, Jacob-aaq-llu ciuliamten̄ek qetunrangqellruuq, taukunek qula malrugnek cipnelegnek.

⁹ Taukut-llu ciuliamta, ilaseng ciknakluku Joseph-aaq, tunellruat Egypt-aarmiunun; tau͡gaam Agayutem nayuraa;

¹⁰ au͡g'aritelaraa-llu nanikuallrinek, cikirluku-llu unganaqmek umyuartumek-llu Pharaoh-m ciuqerranun taingan, Egypt-aarmiut atanerpiita. Taum-llu atanrurcetaa ellminun tungliuvkarluku Egypt-aarmiuni yum'ini-llu.

¹¹ Piitnaq-llu tut'uq Egypt-aarmiunun Canaan-aarmiunun-llu, nangteqluteng cakneq. Ciuliaput-llu taukut neqkamek unangesciigatut.

¹² Tau͡gaam Jacob-aaq niicami tun'arkanek mukaarkanek Egypt-aami, tuavet ayagcetai ciuliaput ciuqlirmek.

¹³ Aipiriata-llu Joseph-aaq nallunrircetuq ellaitnun. Pharaoh-llu taringuq Joseph-aam kingunengqerrucianek.

¹⁴ Joseph-aam-llu ullagcetaa atani Jacob-aaq, taisqelluku, ilai-llu yuinaat pingayun, akimiarmek cipluki.

¹⁵ Tuaten Jacob-aaq upagtuq Egypt-aamun. Tuani-llu yuunrirtuq, ciuliaput-llu cali tuaten.

¹⁶ Tungmagcartularait-llu Shechem-aamun, qungurvigmun-llu elliluki Abraham-aam kipukengaanun Hamor-am qetunrainek Shechem-aarmiunek akinek akilirluku.

¹⁷ “Tau͡gaam Agayutem akqutii Abraham-aamun piciurtarkaurcan, yuut taukut amlleriut patagmek Egypt-aami.

¹⁸ Atanengluteng-llu Egypt-aarmiut, Joseph-aam nallustiinek.

¹⁹ Taum-llu iqlukun umyuartequtai yup'ut nanglluki-llu ciuliaput, irniarit egtelaasqelluki unguvavkaqsaunaki.

²⁰ Taum nalliini Moses-aaq-llu yuurtellruuq, mikelnguqegtaarauluni, iraluni-llu pingayuni atami eniini aulukumallruuq.

²¹ Kiituani egcaaqaat, tau͡gaam Pharaoh-m panian nataqngamiu tegua anglicarluku-llu qetunraqnaluku.

²² Moses-aaq-llu elitnaullruuq Egypt-aarmiut elisngait qaqilluki, maligngayunaqluni-llu qanellmikun caliamikun-llu.

²³ “Yuinaagnek-llu malrugnek allrakungami, umyugaan tekitai ilani Israel-aam kinguvri, paqcugluki-llu.

²⁴ Iliit-llu tangrramiu nangcimalria camek pitkaunani, ilinakaa yuurulluku-llu, nangetruyistii-llu tauna Egypt-aarmiu kaugturaa tuqulluku.

²⁵ Umyuarteqluni anirturtekaucini taringumayukluku ilaminun taukunun, Agayutmek cingumaluni, tau͡gaam taringenritaat.

²⁶ Unuaquan-llu ilagketnek callulriignek tekicami kenegyagutevkangnaqsaaqak qanerluni, ‘Ukuuk, ciin ilakullutek callugcetek?’

²⁷ Tau͡gaam ciumuanran cingqeraa, qanrulluku, ‘Kia atanrurtaten cuqcisten͞gusqelluten-llu wangkugni?

²⁸ Tuquteqatararpenga-qaa tuqucillrucirpetun Egypt-aarmiumek akwauvaq?’

²⁹ Mat'umek qanran, Moses-aaq alingluni qimagtuq Midian-aarmiut nuniitnun. Tuani-llu uitallermini qetunranguq malrugnek.

³⁰ “Allrakut-llu yuinak malruk pelluata, tuani Ingrim Sinai-am yuilqurtaani, an'gilam alairvikaa, kenerkun napayaarmi ekualriakun.

³¹ Tauna Moses-aam irr'ikngamiu malkaniraa, Agayutem-llu eriniinek niituq qanelriamek waten:

³² ‘Ciuliarpet Agayutkaatnga, Abraham-aam-llu Agayutkaanga, Isaac-aam-llu Jacob-aam-llu.’ Moses-aaq-llu uulegtuq alingami tangvagciiganaku-llu.

³³ Agayutem-llu qanrutaa, ‘Sap'akigken yuukek, wani-wa nangengqaviin tauna kenciknarqelriaruuq.

³⁴ Ilumun tangrraqa nangtequciat yum'a Egypt-aami uitalriit, neplillrat-llu niitaqa, waniwa-llu atrartua anirturnaluki. Tua-i kitaki, Egypt-aamun ayagcetnaamken.’

³⁵ Wani-wa Moses-aaq imna, yuin ciuniunritellrat qanerluteng, ‘Kia atanrurtaten cuqcisten͞gusqelluten-llu?’ Tauna Moses-aaq Agayutem ayagcetlinia atanrusqelluku anirturisten͞gusqelluku-llu, ikayuqluku tauna an'gilaq tangellra napayaarmi.

³⁶ Tua-i elliin anutellrui, nallunailkutnek irr'inarqelrianek-llu pirraarluni Egypt-aami, imarpigmi-llu Kavirlimek at'legmi, yuilqumi-llu allrakurrluni yuinaagnek malrugnek.

³⁷ Waniwauguq tauna Moses-aaq Israel-aam yuinun qanlleq waten, ‘Agayun prophet-aamek elpecen̄un kelgiciquq ilavci iliitnek, kelgumallrucimtun wiinga.’

³⁸ Wani-wa-llu cali taunguuq agayumalriani uitalleq yuilqumi, an'gilami-llu qalarucetlermini Sinai-am Ingriani, ciuliamten̄i-llu; nang'arkaunrilngurnek-llu qaneryaranek unangellruuq wangkutnun cikiutekaminek.

³⁹ “Ciuliamta tau͡gaam niisnganritaat, peggluku-llu ellmeggnek. Umyuamegteggun tau͡gaam uterrluteng Egypt-aamun.

⁴⁰ Aaron-aamun qanerluteng, ‘Agayutnguanek pilikut ciuliurtekamten̄ek. Wani-wa una Moses-aaq Egypt-aamek ayaucetlerput qaillun picia nalluarput.’

⁴¹ Kuluvaguamek-llu pilillruut ernerni taukuni. Cikiutnek-llu ekuagiut agayutnguamun taumun, nunaniryuutekluku-llu unatmeng caliaqellrat.

⁴² Tau͡gaam Agayutem ulurai peggluki-llu kevgiuresqelluki qiliim aklurugainun igausngaciicetun prophet-aat kalikaitni, ‘Israel-aam yuini ukuut, ungungssinek-qaa tuqucimalrianek ekuagarkanek-llu yuilqumi cikiqengellruuci wangnun allrakuni yuinaagni malrugni?

⁴³ Moloch-aam-llu pelatekaa napartarci, agayutnguam-llu Rephan-aam agyartaa nalugluku, taukut piliaqelci ciktaarviknaluki. Wiinga-llu ayauciiqamci Babylon-aam yaatiinun.’

⁴⁴ “Ciuliaput pingqellruut Pelatekamek Atanrem Uitavianek yuilqumi. Tauna piliaqumallruuq Agayutem alerqullruciatun Moses-aaq pilisqelluku maliggluku tangellra ayuqucirkaan.

⁴⁵ Kinguqliita-llu ciuliamta tauna tekiutaat Joshua-mek ciuliqagterluteng, nunaksagucartullermeggni agayumanrilnguut, Agayutem anevkallrin, nuniit. Tuaten-llu atulartuq David engelkarrluku.

⁴⁶ David-llu, Agayutem nunanikngani, eneliyugyaaquq Agayutem uitavigkaanek, Jacob-aam Agayutiin.

⁴⁷ Solomon-aam tau͡gaam enelillrua.

⁴⁸ Tau͡gaam Quyinrulria uitanrituq unatetgun pilimalriani. Tuaten prophet-aam qanellratun,

⁴⁹ ‘Qilak atanruvikaqa, nuna-llu it'gama tusngavikaat; qaillun ayuqelriamek eneliciqsia, qaillun-llu ayuqelriamek mernuinercirvingqerciqsia? Ataneq qanertuq,

⁵⁰ Unatma-qaa piliaqenritait tamalkuita makut?’

⁵¹ Elpeci piyunailngurni, ircaqurpeciuggun-llu ciutevciuggun-llu anglluumanrilngurni. Anerneq Tanqilria qessakelararci, ciuliarpecetun, tuaten-llu elpeci pilartuci,

⁵² Naliit prophet-aat nangtellrunritatki ciuliarpeci? Tuqutelarait-llu Ellualriim tekitarkam qanrutkestai, elpeci-llu tauna tunellruarci tuqulluku-llu.

⁵³ Alerquutet ciuniullruyaaqaci an'gilatgun taicimalriit, tau͡gaam atunritaci.”

Tuqutaullra

⁵⁴ Tamana niicamegteggu qenngut, agluquteng-llu keggluki eq'uqercameng tungiinun.

⁵⁵ Tau͡gaam Stephen, Anernermek Tanqilriamek imiumimi, qilagmun ciungqauq. Agayutem-llu ucurnarqucia tangrraa, Jesus-aaq-llu Agayutem tallirpiani nangengqalria.

⁵⁶ Qanertuq-llu, “Tangerrluku, qilak tangrraqa ikingqaluni, Yuum-llu Qetunraa Agayutem tallirpiani nangengqaluni.”

⁵⁷ Taukut tau͡gaam qayagpagtut, ciuteteng-llu umkarluki ataucikun curukaraat Stephen.

⁵⁸ Anqerrutaat-llu nunat elatiitnun teggalqunek-llu miluquluku. Nallunairinguallret-llu aturateng yuugait yun'erra'armun-llu qaunqevkarluki Saul-aamek at'legmun.

⁵⁹ Tuani-llu miluqullratni Stephen-aaq, piicagtuq qanerluni, “Ataneq Jesus-aaq, anerneqa ciuniurru.”

⁶⁰ Ciisqumiggluni-llu qayagpagtuq, “Ataneq, assiilngillrat man'a ellaitnun tuc'ecaqunaku.” Mat'umek-llu qanrraarluni anernerirtuq.