Acts 6 - Yupik Bible

Ikayurten̄ek Malrunlegnek Cucuklillrat

¹ Ernerni taukuni ukvelriit amlleriata, Jews-aat Greek-aarmiut, cangayugtut Hebrews-aanun, aipainertateng pitekluki, elluarrluteng aulukumanrilata.

² Tua-i-llu taukut qulen malrugnek cipnelget yugugaat ellmeggnun taisqait, qanerluteng-llu, “Atawaunrituq wangkuta Agayutem qaneryaraa urenkenrilkumteggu, estuuluni kevgarturluta.

³ Taumek, ilamtaa, akunlevcen̄ek yuaqici angutnek malrunlegnek nallunailngurnek, Anernermek Tanqilriamek pilegnek, elisngalrianek-llu. Taukut wangkuta cingumanauput caliamun mat'umun.

⁴ Tau͡gaam wangkuta tengrunaurtukut kesianek piicagglainarluta, qaneryaraq-llu qalarutekluku.”

⁵ Tamana-llu qanellrat yuut tamarmeng atawakaat, Stephen-aaq-llu cucukaat, angun ukvertulria Anernermek-llu Tanqilriamek muirumalria; Philip-aaq-llu, Prochorus-aaq-llu, Nicanor-aq-llu, Timon-aaq-llu, Parmenas-aaq-llu, Nicolaus-aaq-llu, qaneryaramun caulleq Antioch-armiu.

⁶ Elitnaurat-llu ciuqerratnun taitait, taukut-llu piicauqaarluki unatmeggnek patgait.

⁷ Qaneryaraq-llu pikanirtuq, ukvelriit-llu amlleriqapigtut Jerusalem-aami. Agayulirtet-llu amllelriit qaneryaraq niisngakiit.

Stephen-aaq

⁸ Stephen-aaq-llu, naklekutmek pinimek-llu muirumaluni, angelrianek nallunailkutanek irr'inarqelrianek-llu piuq yuut akuliitni.

⁹ Tua-i ilait nangertut elitnaurvigmi, Libertines-aat, Cyrenians-aarmiunek ilaluteng Alexandrians-aat-llu, Cilicia-rmiut, Asia-rmiut-llu, qanellrakun Steven cirlakualuku.

¹⁰ Tau͡gaam elisngacia puqigluni-llu qalarucia caperqaat.

¹¹ Tua-i-llu angutnek iqluarkanek yuartut, taukut qanertut, “Niitellruarput qacungakitnek qalartelluku Moses-aamun Agayutmun-llu.”

¹² Yuut-llu aakulagcetait, ciulirneret igatulit-llu, ullagaat teguluku-llu, qaillukuarten̄un-llu ayautaat.

¹³ Nallunairisten̄ek-llu iqluulrianek nangerciut, taukut qanertut, “Angun una arulaiqsaunani qallatuq qacungakitnek agayuvigmun uumun ucurnarqelriamun, alerquutnun-llu.

¹⁴ Wani-wa niitellruarput qanertelluku waten, imum-gguq Jesus-aam Nazareth-aarmium agayuvik man'a piunrirciqaa, cimirluki-llu piciryarat Moses-aam pisqellri wangkutnun.”

¹⁵ Tuani-llu tamarmeng qaillukualriit tangvauraraat, kegginaa-llu tangrraat, tuarpiaq an'gilam kegginaatun ayuqluni.