Acts 3 - Yupik Bible

Peter-aam Piyuayuilnguq Canrircetaa

¹ Caqerlutek Peter-aankuk John-aaq-llu Agayuvigpagmun mayurtuk piicagyarturlutek piyaramegni, sass'ami qulngunrita'armi.

² Yugmek-llu ullauciut yuurqaanerminek piyuayuilngurmek. Tauna unuaquaqan ellilaraat Agayuviim amiigan canianun, Kenciknarqelriamek aprumalriamun, elliinek kaigasqelluku yugnek agayuyalrianek.

³ Taum tangrramikek Peter-aankuk John-aaq-llu itqatalriik Agayuvigmun, carrarmek cikiisquq.

⁴ Peter-aam John-aam-llu tangvakaraak qanrulluku-llu, “Tangvagkuk.”

⁵ Elliin-llu kell'arutak camek cikirnayukluni.

⁶ Tau͡gaam Peter qanertuq, “Akimek suulutaamek-llu piitua, tau͡gaam pingqerrutacimtun cikiqataramken, Jesus-aam Christ-am, Nazareth-aarmium atrakun piyuagi.”

⁷ Tallirpilirnerakun-llu teguluku nangertaa; egmian-llu it'gai cingillri-llu sagtut.

⁸ Nangerquangami nangerngaqertuq piyualuni-llu, ilaklukek-llu itertuq Agayuvigmun, piyualuni qecgaurluni tuaten, Agayun-llu nanrarluku.

⁹ Tamarmeng-llu yuut tangrraat piyuallrani Agayun-llu nanrallrani.

¹⁰ Elitaqaat-llu taungucia Agayuviim amiigani kenciknarqelriami aqumgaluni kaigalalleq; irr'ikaat-llu alangaarutekluku-llu tuaten elliucia.

¹¹ Tua-i-llu Peter-aankuk John-aaq-llu teggutekngakek, yuut quyurrvikagket Solomon-aam Elaturraanek aprumalriami, irr'iqapiggluteng.

¹² Peter-aam-llu tangrramiki qalarutai, “Israel-aarmiuni ukuni, ciin irr'ikseciu una? Ciin-llu tangvagcecikuk, piyuangevkalliamegnegu pinimegnegun wangkuk, elluarucimegnegun-llu?

¹³ Agayutiita Abraham-aam, Isaac-aam-llu, Jacob-aam-llu, ciuliamta Agayutiita, ucurnarivkallrukii yun'i Jesus-aaq, tauna tunllerci pikenrillerci-llu Pilate-aam takuani, angicungraaku taum.

¹⁴ Elpeci tau͡gaam pikenrillruarci tauna Kenciknarqelria, Ellualria-llu, tuqucituli tau͡gaam angitesqumaluku.

¹⁵ Tuqutarci-llu unguvam Atanra; tauna Agayutem tuqumalrianek makcetaa; wangkuta-llu nallunairisten͞guukut taumun.

¹⁶ Atra taum ukvervikluku tuaggun atrakun una yuk pinirimauq, tangvak'ngarci nallunrilkessi-llu; cikiutiin-llu ukverem una canrircetaa piniriluku-llu tangrrucirpecetun tamarpeci.”

¹⁷ “Ilamaa, nallunritamci nallumatacirpecetun tuaten pillruuci ciulirneci-llu.

¹⁸ Tau͡gaam tuaten piciurtuq Agayutem picirkiullra prophet-aatgun qanrutkumalria, Christ-aq nangteqarkauniluku.

¹⁹ Taumek umyualinqigci, cauluci-llu, assiilnguci au͡gaumanaurtut, pinirimanaurtuci-llu Agayutmek,

²⁰ ayagcetnauraa-llu Christ-aq elpecen̄un apertuumalria tauna Jesus-aaq.

²¹ Tauna qiliim ciuniurarkaugaa, erneq imna engelkarrluku cam tamalkurmi elluarillerkaa, Agayutem qanrutkellra ellualriatgun prophet-aatgun ak'a imumi.

²² Moses-aaq qanellruuq, ‘Ataneq Agayun prophet-aamek kelgiarkauguq ilavci iliitnek, wiinga kelellrucimitun, tauna niisngaarkaugarci canek tamalkuitnek elpecen̄un qanllerkainek.

²³ Niicunrilnguut-llu prophet-aamek taumek, tamarmeng, yuut akunliitnek piunrirarkaugut pinrilngurmek ilaunateng.’

²⁴ Cali-llu prophet-aat tamarmeng, Samuel-aamek ayagluteng, qaneryarameggni man'a qanrutkaat.

²⁵ Elpeci kinguveqaiceci prophet-aat; akqutiin-llu Agayutem, ciuliavcen̄un Abraham-aamun qanellrani waten, ‘Kinguverpegun nunam yui tamarmeng atawakumaarkaugut.’

²⁶ Agayutem, unguircecamiu Yun'i, elpecen̄un ciumek ayagcetaa, atawaqercetnaluci cauvkarnaluci tamarpeci assiilngiumallerpecen̄ek.”