Acts 28 - Yupik Bible

Qikertami Malta-mi Anirtuumallrat

¹ Tagumariamta-llu, nallunrirarput qikertaq Malta-ullinilria.

² Tamakumiut-llu nutem elluarrluta ciuniuraitkut tamamta, keneq-llu kumarrluku matneqesqelluta ellallian nengllirluni-llu.

³ Paul-aaq-llu muragnek quyurciluni kenermun elliillrani ciissirpak puqlam anevkaani unataikun keggaa.

⁴ Tamakumiut-llu tangrramegteggu ciissiq, Paul-aam unataini agalria, ellmeggnun qanruyutut, “Una yuk tuqutarayuliulliniuq, cavkenani tagengraan akinaurutem unguvavkanrilkii.”

⁵ Tau͡gaam elliin, ciissiq evcuutaa kenermun, natlugtevkenani-llu.

⁶ Taukut-llu murilkaat, puvqerrnayukluku wall'u alqunaq tuqunayukluku, tau͡gaam tangvauraqeryaaqvimeggnek caarkaunriqercan umyuarteng cimiraat qanerluteng-llu, agayutnguniluku.

⁷ Tamatum nuniini qikertam atanra Publius, nunautengqertuq. Taum ciuniuraakut aulukluta ernerni pingayuni elluarrluta-llu ilaliurluta.

⁸ Taum-llu nalliini Publius-aam aatii naulluuguq puqlaniryaramek, augmek tuaten anaraluni. Tuavet Paul-aaq itertuq piicaulluku, unatminek-llu pategvikluku canrircetaa.

⁹ Tuatnallran-llu kinguani allat apqucilget iluvartut canrircecimaluteng-llu.

¹⁰ Tamakut yuut cikirturaitkut amllernek. Ayakataamta-llu nuuqairulluta taquitaitkut.

Rome-amun Tekitut

¹¹ Iralut-llu pingayun kinguatni ayagtukut angyakun Alexandria-rmiutarkun tauna uksurcetellruluni qikertami tuani, atengqerrluni-llu “Malrignek,” Castor-aankugnek Pollux-aaq-llu.

¹² Syracuse-ami-llu erniukut ernerni pingayuni.

¹³ Tuaken-llu qiptaarluta Rhegium-aamun tekitukut, ungalamek anuqlian ernerpak Puteoli-mun engellilluta.

¹⁴ Tuani ukvellgutemta unayaqaitkut agayunerrluta uitasqelluta. Tua-i-llu Rome-armiut tungiitnun ayagtukut.

¹⁵ Tuaken ukvellgutemta niicamegtekut, pairrsaagaitkut tuniarviim nuniini Appius-aami, allanivigtalegmi pingayunek. Paul-aam tangrramiki, Agayun quyavikaa caceturiluni-llu.

¹⁶ Rome-amun-llu tekicamta, anguyagtet atanrata itertat tunai tarikestet atanratnun, Paul-aaq tau͡gaam allakaan uitavkaraat anguyagtem̄ek tarikescirluku.

¹⁷ Erenret-llu pingayun kinguatni Paul-aam Jews-aat ciulirnerit quyurcetai; quyumariata-llu qanrutai, “Ilamaa, yuut tungiitnun ciuliamta-llu piciryaraatnun narurrnamek pillrunrilnge'rma itertaulua taicimaunga Jerusalem-aamek Rome-amun.

¹⁸ Taukut qanercetaarraarlua, angiteqataryaaqaatnga camek tuqutesqutkamnek nataqvikenrilamegten͞ga.

¹⁹ Tau͡gaam Jews-aat inglulicata, qaillun-llu piviilama Caesar-aamun qanercetaaresqellruunga; pinarqelriamek qanerkaicaaqua ilamnun.

²⁰ Taumek man'a pitekluku kelegcetamci tangerrnaluci qallatellguteknaluci-llu. Tua-i Israel-aam neryuniurutii pitekluku kalivnerciumiima.”

²¹ Ellaita-llu qanrutaat, “Kalikam Judea-mek tekiteksaitaakut iqukluten, tekitelange'rmeng-llu cangalngurmek qanrutkeksaitaatgen.

²² Tau͡gaam niicugamteggen ukverucirpenek. Niitelaryaaqaput makucit tamiini cangakumallrat.”

Rome-ami Qalarucilallra

²³ Tua-i-llu pillerkiurarteng erneq tekican, yugyagluteng ullagaat; elliin-llu qalarutai nallunairiluni Agayutem Angayuqauvianek ukvercetengnaqluki Jesus-aamun igausngaciatun Moses-aam prophet-aat-llu igaitni, unuakumek ayagluni unugvianun.

²⁴ Ilaita qanrutkumalriit ukveqait, ilaita-llu ukveqevkenaki.

²⁵ Umyuallgutkenrilameng-llu ayagtut, Paul-aaq qanrumarian waten, “Elluatun Anernerem Tanqilriim qanrutkaaci Isaiah-kun prophet-aakun ciuliamten̄un qanerluni,

²⁶ ‘Ullagluki ukut yuut, qanruski: Niiquryaaqeciquci, ayuqucingengaituci, tangerrlainang'e'rpeci-llu, taringengaituci.

²⁷ Yuut ukut ircaqruit elpegiutut, ciutait-llu umgumaut, iingit-llu cikmirluteng, iimegteggun tangrrarkaunrirluteng, ciutmegteggun-llu niitarkaunrirluteng, umyuamegteggun-llu ayuqucingenrirluteng, umyualinqiggluteng wangnun caunayukluteng, canrirtelluteng-llu.’

²⁸ Tau͡gaam man'a nallunrilkiciu, Agayutem anirtuutii ayagcecimacia Jews-aarunrilngurnun, ellaita-llu ciuniurciqaat.”

²⁹ Makunek qanrumarian Jews-aat ayagtut qanemyuugaqapiggluteng.

³⁰ Paul-aaq-llu allrakugni malrugni navramini enemi uitauq, ciuniuraqluki-llu tamalkuita ullagten̄i.

³¹ Qalarutekluku-llu Agayutem Angayuqauvia, elicungcautekluku-llu Ataneq Jesus Christ-aq, alingevkenani, yuum-llu inerquqsaunaku.