Acts 27 - Yupik Bible

Rome-amun Paul-aaq Ayautaat

¹ Tua-i-llu Italy-mun ayagarkaurcamta angyakun, Paul-aaq allat-llu itengqalriit tunait anguyagtet atanratnun Julius-aamun, Augustus-aam kevgaanun.

² Adramyttium-aarmiutarmun-llu angyamun ekluta ayagtukut Asia-m mengliikun pinaluta, ilangqerrluta Aristarchus-aamek Macedonian-aarmiumek, tauna Thessalonica-mek taillruluni.

³ Unuaquan-llu Sidon-amun arulairtukut, Julius-aam-llu Paul-aaq kusgukluku, angitaa ilainun ukvellgutainun ullautesqelluku, ellaitnun aulukesqelluku.

⁴ Tuaken-llu ayiimta Cyprus-aam uqrakun tengalrartukut, anuqa pairrnaqngan.

⁵ Cilicia Pamphylia-llu kituumariamtekek, Myra-mun tekitukut Lycia-m iliinun.

⁶ Tuani anguyagtet atanrata angyaq Alexandria-mek kingunelek tangrramiu Italy-mun ayalria, tuavet ekevkaraakut.

⁷ Ayiimta-llu cukavkenata ernerni amllerni, cayaqlirluta Cnidus tekitarput, anuqa-llu piyunailan Crete-am uqrakun piukut,

⁸ cingik-llu Salmone mallegluku kiturarput; kangiqutaq-llu assilria tekilluku, nunat yaaqsinrilkiitni Lasea-rmiut.

⁹ Cukailameng, tengalrallerkaq-llu alingnariluni, anuqeturian, Paul-aam aarcirturai,

¹⁰ qanerluni, “Ukuut, taringevkaumaunga, ciumuaqumta nangtequaciqukut cakneq, tamarnayukluki uciput, angyarput-llu, unguvavut-llu.”

¹¹ Tau͡gaam anguyagtet atanrata angyam kap'itainaa, pikestii-llu ingluarvikaak, Paul-aam qanellri catkevkenaki.

¹² Tau͡gaam uqisvik tauna pivigkilan, angyam-llu uksuucetlerkaa tuani tengrukenrilatgu, amlleret ayagyugtut Phoenix-aamun tekingnaqsugluteng uksinaluteng tuani; tamana qikertami Crete-ami uitauq kanavalirnerani.

¹³ Ungalamek-llu anuqliarallrani, pinarqucukluteng kicairluteng tengalrartut Crete-aq mallegluku.

¹⁴ Tau͡gaam akanuivkenaki cayukautai alingnarqelriamek.

¹⁵ Anuqem-llu unakngaku angyaq, asgurciiganani-llu, tengcetarput.

¹⁶ Qikertam-llu Cauda-m uqrani pillemten̄i, angyacuar tagurassuun pegnem unakarput;

¹⁷ mayurqaarluku angyamun ilakluku nuqyucirarput ilavkugnek, qau͡gyamun-llu tagautnayukluteng ilangarciut caniqiluteng-llu atercetut.

¹⁸ Qailiussiyaagamta-llu, unuaquan angyaq uciiqaniraat.

¹⁹ Erenret-llu pingayuatni angyam aklui egqaqaput.

²⁰ Ernerni amllerni akerciqsaitellrani, agyat-llu alaiteksaunateng anuqlissiyaagluni-llu, ciunerkairutukut.

²¹ Nereksaicimiimeng ak'anun, Paul-aaq nangertuq qukaatnun qanerluni, “Ukuut, maligartellrukuvcia, Crete-amek-llu ayanrilkuvci picurlagyanritukut cagmarivkenata-llu.

²² Tau͡gaam eguaquramci caceturici; ilamta unguvii cagmarngaituq, angyaq tau͡gaam.

²³ Unuk Agayutem an'gilaa canimni nangerngallruan, kevgiuqengama pikestem̄a-llu,

²⁴ qanerluni, ‘Alingevkenak, Paul, Caesar-aam ciuqerranun nangerciiquten. Tangerrluku-llu Agayutem maliten tamalkuita elpenun tunumai unguvaluki.’

²⁵ Taumek caceturici, Agayun ukveqngamku qanrucimacimtun, tuaten piciqngan.

²⁶ Tau͡gaam qikertamun tagauciiqaakut.”

²⁷ Erenret akimiarunritaraatni unuan, picimcetun atertaakut Adria-mi. Unuum qukaqngalkiini angyiurtet paqnayugtut nunamun mallgucukluteng.

²⁸ Et'utassiallratni-llu yuinarnek yagnengqertuq, yaaqvaqaniameng-llu et'utassianqigtellratni akimiarnek yagnengqerrluni.

²⁹ Tua-i-llu teggalqitnayukluteng, cetamanek kicartut kingukun, errnercirluteng-llu.

³⁰ Angyiurtet anagturnaluteng angyacuar atrarcaaqellratni, ciunganek kicaq ayaucuguarluku,

³¹ Paul-aam anguyagtet atanrat ilai-llu qanrutai, “Ukut angyami ekumauranrilkata anirtuumangaituci.”

³² Taumek anguyagtet angyacuaraam ilavkui kepluki igcetaat.

Imarpigmi Cakviullrat Tagaucimallrat-llu

³³ Errnginanrani-llu Paul-aam tamalkuita qarutaarai neresqelluki qanerluni, “Wani-wa ernerni akimiarunrita'arni uitalriaci nerqegtaqsaunaci,

³⁴ taumek eguaquramci neresqelluci, temevci piniutekaqngaku, cagmalriartangqerrngailan-llu qamiquvci nuyaqengraatki.”

³⁵ Tuaten qanrraarluni, kelipamek tegutuq, Agayutmun-llu quyatekluku tamarmeng takuatni itumcimariamiu, ner'uq.

³⁶ Tamarmeng-llu caceturiut nerluteng-llu ellait.

³⁷ Angyamelngurni amllertaukut (276).

³⁸ Camirrluteng-llu nerumariameng, angyaq uciiqaniraat mukaarkat egqaqluki imarpigmun.

³⁹ Mecignarian-llu, nuna elitaqenritaat, tau͡gaam kuigmek tangertut cen̄aqeggluni; umyuartequt-llu tuavet itengnaqnaluteng.

⁴⁰ Taumek kicat uskurait kepait cakaarluki, angilluki-llu alulam qillerqutai, cayugiluteng-llu tengalrartut cen̄am tungiinun.

⁴¹ Carvanrek quyurtellragnun tekiararulluteng, ugirtuq angyam ciunga pektesciiganani, kingua tau͡gaam qairet navguraat.

⁴² Tua-i-llu anguyagtet qaneryaaqut itertat tuqutesqelluki, iliit kuimarluku qimagnayukluku.

⁴³ Tau͡gaam atanrata Paul-aaq qunukluku tuaten pivkanritai; ellimerturluki-llu kuimaryugngalriit ciumek mermun qeckarluki tagesqelluki nunamun.

⁴⁴ Ilait-llu tuskatgun angyam-llu navenrikun pingnaqesqelluki. Tuaten piluteng tamarmeng cavkenateng nunamun tekitut.