Acts 25 - Yupik Bible

Caesarea-mun Qaillukuaresquq

¹ Atanruviminun elkarcami erenret pingayuatni, Festus-aaq Caesarea-mek mayurtuq Jerusalem-aamun.

² Tuani agayulirten͞gunret Jews-aat-llu ciulirnerita Paul-aaq elliinun picetaarutaat, kaigavikaat-llu

³ taitesqelluku Jerusalem-aamun, ellaita tumyarani nayurluteng alapen'errluku tuqutnaluku.

⁴ Festus tau͡gaam kiuguq Caesarea-mi itengqaarkauniluku, ellii-llu ak'anuivkenani tamaavet ayakatarniluni,

⁵ “Taumek nallunritestaini maligeskicia picetaarutniarci picurlautiinek.”

⁶ Tua-i-llu erenret qulen pelluumariqerluki, Caesarea-mun atrartuq. Unuaquan-llu qanercetaarviim aqumllertaani aqumluni, Paul-aaq ellimertuutaa taitesqelluku.

⁷ Taingan-llu, Jews-aat Jerusalem-aamek atrallret kassugulluku nangengqaut amllernek-llu picetaarutaat pinarqelrianek, tau͡gaam nallunairisciiganateng picetaaruteklermeggnek.

⁸ Paul-aaq ellminek anagyaaqluni qanertuq, “Picurlaksaitua Jews-aat alerquutaita tungiitnun, agayuvigmun-llu, Caesar-aamun-llu watqapik.”

⁹ Tau͡gaam Festus-aam, Jews-aat umyugaat narurcuumiinaku, Paul-aaq aptaa, “Jerusalem-aamun-qaa ayagyugtuten, qanercetaarumaluten-llu makunek ciuqamni?”

¹⁰ Paul-aam kiugaa, “Caesar-aam qanercetaarvian aqumllertaan ciuqerrani nangengqaunga, wani qanercetaarumaarkaungama; Jews-aat tungiitnun camek picurlautaitua, nallunritarpenga.

¹¹ Picurlallrukuma, camek-llu tuqutnarqutkamnek atullrukuma tuqutaullerkamnek, qessangaitua; tau͡gaam picetaarutait piciunrilkata, yuum tunngaitaanga ellaitnun, Caesar-aamun qaillukuaresqumaunga.”

¹² Festus-aaq-llu, qaillukuartet qallatellgutkerraarluki qanertuq, “Caesar-aamun qaillukuaresqellriaten, Caesar-aamun-llu ayagciquten.”

Agrippa-m Apqauraa

¹³ Taum kinguani, ataneq Agrippa nuliani-llu Bernice Caesarea-mun tekituk Festus-aamun nunallutek.

¹⁴ Akaarnun-llu tamaancamek, Festus-aam atanermun Paul-aaq qanrutkaa, qanerluni, “Angucetangqertuq Felix-aam itengqavkaqiinek

¹⁵ Jerusalem-aamun tekitellemni, tauna agayulirten͞gunret Jews-aat-llu ciulirnerita kaigatkaat, picirkiisqelluku.

¹⁶ Tau͡gaam kiullruanka Roman-aani alerquumanritukut yuk picetaarumalria picirkiisqelluku qanercetaarraarpek'naku picetaarutestain ciuqerratni, elliinek-llu qanerniarraarcetevkenaku picetaarutkellratnek.

¹⁷ Taumek tekicata, pinaciarpek'nii unuaquan tamaa qanercetaarviim aqumllertaanun aqumlua una taitevkallruaqa.

¹⁸ Ciuqerrani picetaartai nangercameng, umyuaqenrilkemnek picetaarutaat;

¹⁹ ukverumacimegteggun ayuqenritlerteng pitekluku, Jesus-aaq-llu pitekluku yuunrilleq, Paul-aam tau͡gaam qanrutkaqluku unguvaniluku.

²⁰ Ayuqucingenrilamku man'a pillrat aptellruaqa Jerusalem-aamun ayagyugngacianek tuani qanercetaarumaarkauluni.

²¹ Tau͡gaam Caesar-aamun qanercetaaresqen͞gan, itengqavkaraqa ayaucetlerkamnun Caesar-aamun.”

²² Agrippa-llu qanertuq Festus-aamun, “Angun tauna tungaunii niicugyaaqaqa.” Kiugaa-llu, “Unuaqu niiciiqan.”

²³ Unuaquan Agrippa nuliani-llu Bernice tangllermegnegun ucurnaqlutek qanercetaarvigmun itertuk, ilakluki anguyagtet atanrit nunarpiit-llu ciulirnerit. Festus-aam-llu ellimerrucaku Paul-aaq itrutaat.

²⁴ Festus-llu qanertuq, “Angayuqamten̄i Agrippa, tamarpeci-llu quyungqallgutemten̄i, yuk una tangrrarci Jews-aat tamarmeng picetaarutellrat Jerusalem-aami maani-llu, qayagpagaluteng unguvavkayunaitniluku.

²⁵ Tau͡gaam tuqutesqutkaanek nataqutenrilama, ellii-llu Atanvagmun qanercetaaresqen͞gan ayagcetarkaurtaqa.

²⁶ Tau͡gaam qaillun igaucirkaitua atanemnun una pitekluku, taumek ciuqerpecen̄un taivkaraqa urenkutmek elpenun, Angayuqamten̄i Agrippa, apqaurumarikuvgu igautekangnayuklua.

²⁷ Itengqalria ayagcecunailan picetaarutai nallunairraarpek'naki.”