Acts 24 - Yupik Bible

Paul-aam Qanercetaarumallra Felix-aam Ciuqerrani

¹ Erenret talliman kinguatni agayulirten͞guneq Ananias-aaq atrartuq ciulirneret malikluki puqilriamek qanerterluteng Tertullus-aamek, taum Paul-aaq qanrutkaa nunam atanranun.

² Paul-aaq taivkaatgu Tertullus-aam picetaarutaa, qanerluni, “Atanemten̄i Takarnarqelriami, Felix! Elpenek uitanqegcit'ngamta, elluarrluki-llu ukut yuut ataniumiivki,

³ aulukuteten tamiini, erenret-llu tamaitni ciuniularaput quyatekerrlainarluki.

⁴ Tau͡gaam ilangcivkenaku, taqsuqciryuumiinak carrarmek qanerciqua elpenun, tua-i naklegtaucirpetun niiskut.

⁵ Wangkutni una arenqianarquq, Jews-aat-llu ayuqenriqrutkaat nunani tamaitni, ukut-llu Nazarene-anek aprumalriit ciuliqagtekaat.

⁶ Agayuvigput-llu menulingnaqsaaqaa, tau͡gaam tegullruarput qanercetaarnaluku alerquuteput aturluki.

⁷ Tau͡gaam anguyagtet atanrata Lysias-aam curukaraakut, allurrluta-llu,

⁸ alerqurluki picetaarucestai elpenun ullaucesqelluki. Taumek elpenek yuvriqiu, nallunrirluki makut tamalkuita picetaaruyuteput.”

⁹ Jews-aat-llu umyuallguciulluteng piciuniat tamana.

¹⁰ Tua-i-llu Paul-aaq, nunam atanran pisqen͞gani kiuguq, “Nallunrilamken allrakuni amllerni atanrucirpenek ukuni yugni, qanerniallerkaqa ciuqerpeni tengrukaqa.

¹¹ Nallunritarpenga, Jerusalem-aamun agayuyarturlua mayurraanemnek erenret qulen malrugnek tau͡gaam ciptengut.

¹² Kia-llu nall'arteksaitaanga Agayuvigmi yugmek qanekluaraucivkarlua, yugnek-llu ayuqenriqercecivkarlua elitnaurvigni wall'u nunarpagni.

¹³ Nallunairisciigatut-llu makunek picetaaruteklermeggnek.

¹⁴ Tua-i man'a piciuyaaquq qanellrat maligtaqutenritnilua, tau͡gaam ciuliama Agayutiit piicagvik'laraqa ukveqluki-llu tamalkuita alerquutni igausngalriit prophet-aani-llu.

¹⁵ Neryuniurvikaqa-llu Agayun ellaita ukvengqerruciicetun, tuqumalriit maktarkauciatnek ellualriit elluanrilnguut-llu.

¹⁶ Taumek-llu Agayutem tungiinun yugnun-llu cangalutkamnek umyuarniurutaitengnaq'lartua.

¹⁷ Maa-i-llu allrakut ikgetenrilnguut kinguatni taillruunga, ilanka piilutaitnek payuggluki elliitnek.

¹⁸ Tuantellemni Jews-aat ilait Asia-mek taillret nall'artaatnga Agayuvigpagmi menuircaumalua, yugnek maliinii neplircecivkenii-llu.

¹⁹ Taukut tau͡gaam maanelkuneng picurlautemnek nallunrilkengangqerquneng ciuqerpeni qaneryartut;

²⁰ wall'u ukuunge'rmeng nallunrilkengangqerquneng qancurlallemnek qaillukuartet ciuqerratni, watua qanqilit,

²¹ tau͡gaam atauciq qanelqa waten, ‘Tuqumalriit maktarkauciat pitekluku qanercetaarumaunga unuamek?’”

²² Felix-aam-llu makut niicamiki, nallunrilamiu-llu ukveruciat, atatakutai qanerluni, “Anguyagtet atanrat Lysias tekiskan man'a pillerci nallunairuciiquq.”

²³ Atanerruaq-llu ellimerturaa Paul-aaq qaunqesqelluku kelucautevkenaku, ilainun-llu ullagyukatgu kevgiuryukatgu-llu inerquutesqevkenaku.

²⁴ Erenret amllenrilnguut kinguatni Felix ataam taiguq nuliani Drusilla malikluku, tauna Jews-aaruluni. Paul-aaq taivkaraa niilluku-llu qalartellrani Christ-amun ukverem ayuqucianek.

²⁵ Tau͡gaam qalarucani elluaryaramek, pitalqen̄ermek-llu qanercetaallerkamek-llu, Felix uulegtuq qanerluni, “Watua ayii, waten pitalua, urenkessaguskuma cali kelegciqamken.”

²⁶ Neryuniuryaaquq-llu Paul-aamun angitesqumakan akinek cikirnayukluni, taumek akulkunaku taivkalaraa qallatellgutekluku.

²⁷ Tau͡gaam allrakuk malruk kinguagni, Porcius Festus-aam Felix-aaq cimiraa. Felix-aam-llu Jews-aat umyugaat narurcuumiinaku, Paul-aaq itengqavkaraa.