Acts 22 - Yupik Bible

Paul-aam Qanerniallra Yuut Ciuqerratni, Itercecimallra-llu

¹ “Ilamaa, atamaa-llu, ukuut, niicugnicia qanerniallemni.”

² Hebrews-aat qaneryaraatgun qalarucateng murilkekanirtut, qanrutai-llu,

³ “Wii Jews-aat ilakaatnga; Tarsus-aarmiuni yuurtellrulua, Cilicia-melngurmi, maani tau͡gaam anglillruunga, Gamaliel-aam-llu ciuqerrani elitnaullruunga ciuliamta piciryarait maligtaquluki, ilunglua-llu Agayutem tungiinun, elpecicetun watua.

⁴ Man'a-llu ukverumaciq nutaraq nangtellruaqa tuqumun, ayuqmun angutet arnat-llu qilleqluki itercivignun tun'aqluki.

⁵ Nallunritaanga Agayulirten͞gunrem, ukut-llu Qaillukuartet, ellaita kalikanek piyunarqucinek cikillruatnga ilamten̄un Damascus-aami, tamaavet qimallret qillerrluki ut'rutnaluki maavet Jerusalem-aamun anucimirqecetaarumallerkaatnun.

⁶ Tua-i-llu ayallemni Damascus-aarmiut mallgiluki, erenrem qukaqngalkiini alqunaq pakmaken tanqigpalla'artuq avatemnun.

⁷ Iqullruunga-llu nunamun, erinamek-llu niillua wangnun qanelriamek, ‘Saul, Saul, ciin nangpakarcia?’

⁸ Tua-i-llu aptaqa, ‘Kituusit, Ataneq?’ Kiugaanga-llu, ‘Jesus-aaruunga Nazareth-aarmiu elpet nangtellren.’

⁹ Malima-llu tanqik tangerrsaaqaat, alingluteng-llu, tau͡gaam qanrutestem̄a erinii niitenritaat.

¹⁰ Aptaqa-llu, ‘Ataneq, qaillun pisqumasia?’ Atanrem-llu kiugaanga, ‘Nangerrluten, Damascus-aamun itra, tuani qanrucimaciquten qaillun pillerkarpenek.’

¹¹ Tanqigpiim-llu cikmircecanga, malima tass'uqlua Damascus-aamun tekiutaatnga.

¹² “Angucetangqertuq tuani Ananias-aamek atengqerrluni, Alerquutet qigcikestiitnek, Jews-aat-llu tamakumiut elluakekiitnek.

¹³ Elliin ullagaanga, canimni-llu nangerrluni qanrutaanga, ‘Ilamaa, Saul-aaq, tangerrsaurten!’ Egmian-llu uicama tangvagaqa.

¹⁴ Qanertuq-llu, ‘Ciuliamta Agayutiita nakmikaaten pisqutni nallunritesqelluku, tangrresqelluku-llu Ellualria tauna, erinii-llu niitesqelluku tungaunaku.

¹⁵ Yugnun nallunairisten͞guciquten elliinek tangllerpenek, niitellerpenek-llu.

¹⁶ Camek tua-llu atanqaarcit? Nangerrluten angllurcetevkaa, assiilnguten-llu erurtelluki, Atanrem atra kaigavikluku.’

¹⁷ “Tua-i-llu Jerusalem-aamun utercama Agayuvigpagmi piicainanemni nalluyaakua;

¹⁸ tangrramni qanrutaanga, ‘Jerusalem-aarmiut patagmek uniski; wangnek nallunairillren ciuniurngailatgu.’

¹⁹ Qanellruunga-llu, ‘Ataneq, nallunritaatnga elitnaurvigni ukveqesteten itercet'lauciitnek piqertuarluki-llu.

²⁰ Stephen-aaq-llu tuqutaullrani auga kuvellratni, wii-llu ilautellruunga tuaten pisqumaluku, tuqutestain-llu aturait qaunqelluki.’

²¹ Qanrutaanga-llu, ‘Ayii, yaaqvanun ayagcetqataramken Jews-aarunrilngurnun.’”

²² Una engelkarrluku niicugniiyaaqaat, tau͡gaam tuaten qanran qayagpagtut, “Ayagceciu nunamek au͡g'arluku! Unguvakaunrituq.”

²³ Qayagpiita-llu aturateng-llu yuugarrluki, nunamek-llu miluquluteng,

²⁴ anguyagtet Atanrata ellimertuutaa itrutesqelluku anguyagtet eniitnun, yuvriisqelluku-llu piqertuarluku, nallunrirnaluku ciin yugnun tuaten qayagpagayuciatnek.

²⁵ Tapengyagnek qillercatni Paul-aam aptaa atanerruaq nayurten̄i, “Alerquumauci-qaa yuk Roman-aartaungraan piqertualaasqelluku qanercetaarumavailgan?”

²⁶ Man'a niicamiu atanerruam, anguyagtet atanrat qanrucarturaa, “Mulngaki camek pillerkarpenek, yuk tauna Roman-aartaungan.”

²⁷ Taingami anguyagtet atanrata aptaa, “Nalqigusnga, elpet-qaa Roman-aaruuten?” Kiugaa, “Aa-ang!”

²⁸ Anguyagtet atanrat qanertuq, “Wiinga akilirpaglua tamakuurtellruunga.” Paul-aaq kiuguq, “Tau͡gaam wii tamatuulua yuurtellruunga.”

²⁹ Tua-i piqertuartekaqsaaqellrin pegtaat, ellii-llu anguyagtet atanrat alinguq nallunriamiu Roman-aarucia, elliin-wa qillercetellruamiu.

³⁰ Unuaquan, picetaaryuucia Jews-aanun nallunricuamiu, angitaa qillercimallranek, agayulirten͞gunret-llu Qaillukuartet-llu quyurtesqai. Paul-aaq-llu atraulluku ciuqerratnun.