Acts 19 - Yupik Bible

Ephesus-aamun Paul-aaq Tekituq

¹ Tua-i-llu Apollos Corinthia-melnginanrani, Paul-aaq nunakun keluqvaarkun ayagluni Ephesus-aamun tekituq, elitnaurartangqellriamun,

² apluki-llu, “Ukvengllerpecen̄i-qaa Anernermek Tanqilriamek pingellruuci?” Qanertut-llu elliinun, “Qang'a, Anernermek Tanqilriamek niiteksaitukut.”

³ Qanertuq-llu ellaitnun, “Camun-mi angllullruceci?” Qanertut-llu, “John-aam angllurceciyaraanun.”

⁴ Paul-aaq-llu qanertuq, “John-aaq angllurcecilartuq umyualinqigtesqutem angllurceciyaraanun, qanerluni yugnun ukvervikesqelluku kingunemikun tekitarkaq, Jesus Christ-aq.”

⁵ Makunek-llu niicameng, angllurcetevkartut atranun Atanrem Jesus-aam.

⁶ Paul-aam-llu unatminek pategvikngaki, Anernerem Tanqilriim tusvikai; qallalluteng-llu alungutetgun, qaneryariurluteng-llu.

⁷ Taukut-llu angutet amllertaut qula malrugnek cipluku.

⁸ Agayuvigmun-llu iterluni, qallatuq ancurturpek'nani iraluni pingayuni, ciumuarulluki taringevkangnaqluki Agayutem angayuqauvia pitekluku.

⁹ Tau͡gaam ilait asvailameng, ukveryugpek'nateng-llu, ukverumalriit inglukait iqluurutekluki yugugaat ciuqerratni, taumek elliin avtai, elitnaurat-llu malikluki qaneryariurluni Tyrannus-aam elitnaurviani erenret tamaitni.

¹⁰ Tuaten caliurtut allrakugni malrugni, Asia-melnguut-llu tamarmeng Jews-aat Greek-aat-llu Atanrem Jesus-aam qaneryaraa niitaat.

¹¹ Agayutem-llu caliari irr'inarqelriit Paul-aakun nasvaumalartut.

¹² Ilait-llu Paul-aam atullrinek perriutainek wall'u manuilitanek, ayaulluteng ilateng naulluulriit tamakunek agturtelluki assirivkalarait apquciitnek, anernerrluut-llu anevkalarait.

¹³ Tua-i-llu Jews-aat ilait, tuunritulit, cali Atanrem Jesus-aam atrakun anernerrlugnek anevkaringnaqsaaqut naaqilluki waten: “Jesus-aakun, Paul-aam qanrutkellrakun ellimerturamci anesqelluci.”

¹⁴ Jews-aat agayulirten͞gunrata Sceva-m qetunrai malrunelgen tuatnallruut.

¹⁵ Tau͡gaam anernerrluum kiugai, “Jesus-aaq nallunritaqa, Paul-aaq-llu nallunritaqa; tau͡gaam elpeci cauceci?”

¹⁶ Anernerrlulgem-llu curukarai callugluki cirlakualuki-llu; taumek enemek tuaken anqertut matarmeng aknirqumaluteng-llu.

¹⁷ Tamana niitaat Ephesus-aarmiut tamarmeng Jews-aat Greek-aat-llu. Taumek civuurangut, Atanrem-llu Jesus-aam atra takarnariuq.

¹⁸ Amlleret-llu ukvengelriit ullautut apervikualuteng caliateng-llu maniluki.

¹⁹ Amlleret-llu tuunritulit kalikateng quyurtait, ekualuki-llu yuut takuatni, akillrit-llu quyuita naaqngamegteki, akit tiissitsaat yuinaak malruk qulnek cipluki (50,000) amllertaut.

²⁰ Tuaten Agayutem qaneryaraa amlleriqapigtuq saggluni-llu tamiinun.

²¹ Makut kinguatni, Paul-aaq Anernerkun nasvicimiimi, pillerkiurtuq Macedonia Achaia-llu tumkerraarlukek Jerusalem-aamun ayagyugluni, qanerluni, “Tangrrumarikumki, Rome-amun cali ayagarkaugua.”

²² Taumek ilagni ikayurtegni Timothy Erastus-aaq-llu, Macedonia-mun ayagcetak, ellii tau͡gaam uitaluni Asia-mi.

Demetrius-aam Pek'ngarcecillra Ephesus-aami

²³ Tamatum nalliini ukverumalriit nepliutengait.

²⁴ Yuut iliit Demetrius, suuluciiyurta, caliaminek qivruyugluni piuq; yuguanek agayutnguanek calilaami, agayutseng Diana ayuqeliluku; tuniaqelarai-llu, calillgutminek-llu ilaluni tamakut unangutkelarait tukuurutekluki.

²⁵ Tua-i quyurcetai calillgutni, qanrulluki, “Ukuut, nallunritarci caliamteggun tukuurucirput.

²⁶ Maa-i tau͡gaam tangrrarci niitaqluku-llu Paul-aam caliara, wani Ephesus-aami kiimi pivkenani, tau͡gaam Asia-mi tamiini, yuut caucaki ukverrluki agayutngunritniluki unatetgun piliaqumalriit.

²⁷ Taumek caliarput man'a kiingan aaqenritarput caunrirnayukluku, tau͡gaam Diana-m-llu agayuvia cali qigcikenrirnayukluku, ucurnarqucia-llu piunrirnayukluku agayutemta arnam, Asia-rmiut nunam-llu tamarmi caumaviata.”

²⁸ Makunek niicameng eq'uqertut, qayagpagluteng-llu, “Ucurnarquq Diana Ephesian-aat agayutiit!”

²⁹ Tamarmirrluteng-llu tamakumiut nep'ngartut ayuquciinateng. Paul-aam-llu ilak pektellgutek, Gaius Aristarchus-llu teguagket Macedonia-rmiuk, quyurrvigmun-llu itrullukek.

³⁰ Paul-aaq-llu itqataryaaquq. Tau͡gaam ilain elitnaurat pivkanritaat.

³¹ Ilaita-llu Asia-rmiut ciulirnerita yugnikestain, qanrucetaat itresqevkenaku quyurrvigmun.

³² Yuut-llu ayuqenrilngurnek qayagpagtut ayuquciinateng, nalluluteng-llu ca pitekluku quyurucimeggnek.

³³ Tuani Alexander-aaq qamurluku yuut akuliitnek antaat, ilain Jews-aat cingluku. Ellii-llu Alexander elucira'artuq qanerniarutnaluki yuut.

³⁴ Tau͡gaam elpekngatgu Jews-aarucianek, ataucikun yugugaat qayagpagtut sass'agni malrugni taqesciiganateng waten, “Ucurnarquq Diana Ephesian-aat agayutiit!”

³⁵ Nunarpiit-llu igartiita cayaqlirluki nepairamiki, qanertuq, “Ukuut Ephesian-aani! Kia nallunritenritau Ephesian-aat ciktaarvikekiit Diana, agayutiit ucurnarqelria, ayuqeliumallra-llu yuguaq pakmaken qilagmek igtelleq?

³⁶ Taumek makut asgurakviilata, qiperrlukaunricaaquci umyuarci-llu piciatun maligartevkenaku.

³⁷ Wani-wa ukut angutet quyurutaci, camek agayuvignek tegleksailengraata, agayutevcen̄ek-llu caunrilkiksaunateng.

³⁸ Taumek Demetrius calillgutai-llu yugmun camek pitengqerquneng, alerquucetangqertuq, cuqcistetarluni-llu, picetaaruskilitki ellmeggnek.

³⁹ Tau͡gaam camek allamek apyutkangqerquneng, tamakut qaillukuarvigmi picirkiumaarkaugut.

⁴⁰ Man'a alingurnarquq unuamek atullerput, quyurarucimten̄ek neplillemten̄ek-llu apqaurumakumta kiucirkaiciiqngamta.”

⁴¹ Tuaten qanrraarluni, yuut quyungqallratnek ayagcetai.