Acts 16 - Yupik Bible

Timothy-m Angllullra

¹ Tekituq-llu Derbe-mun Lystra-mun-llu, tuani elitnaurartangqertuq, atengqerrluni Timothy. Taum aanii Jews-aat ilakaat ukverumaluni, tau͡gaam aatii Greek-aaruuq.

² Tauna apenqegcimaluni ilamini Lystra-rmiuni Iconium-aarmiuni-llu.

³ Paul-aam maliksugaa, nuugirtelluku-llu Jews-aat tuanelnguut pitekluki, tamarmeng nallunrilatgu aatii Greek-aaruan.

⁴ Nunarpiit tumekluki ayallermegni, alerquutet taukunun nallunrircetait Jerusalem-aami apostle-aat ciulirneret-llu picirkiutekellrit.

⁵ Tuaten agayuviit ukverkun pinirimaut, ilangaqluteng-llu unuaquaqan.

Paul-aam Unayaqumallra Macedonia-mun

⁶ Pelluumariatgu Galatia Phrygia-llu, Anernerem Tanqilriim inerqurai qalarutkesqevkenaku qaneryaraq Asia-mi.

⁷ Mysia-mun-llu tekicameng Bithynia-mun ayakataryaaqut, tau͡gaam Anernerem pivkanritai.

⁸ Mysia-llu kiturluku Troas-aamun atrartut.

⁹ Alairvikaa-llu Paul-aaq unugmi nangengqaluni, angutem Macedonia-rmium kaigavikluku qanerluni, “Tailuten Macedonia-mun ikayuryarturkut.”

¹⁰ Tangrrumariaku-llu alailleq egmianun pillerkaiturtukut ayallerkamten̄un Macedonia-mun, Atanermun elpengcaucirput ukveqluku qaneryaraq qalarutkesqelluku ellaitnun.

¹¹ Tuaken Troas-aamek angyakun ayagtukut nalletmun Samothrace-aamun, unuaquan-llu Neapolis-aamun.

¹² Tuaken-llu Philippi-mun, nunarpaunrulriamun Macedonia-mi, Roman-aat-llu quyurngaviatnun; tuantellruukut-llu akaarnun.

¹³ Tua-i-llu Sabbath-aami nunarpagnek an'ukut kuigem cen̄iinun piicagyarturvik'lallratnun, aqumluta-llu, arnat-llu tuavet ullautellriit qalarulluki.

Lydia-m Ukvelriarurtellra

¹⁴ Arnat-llu iliit Lydia-mek atengqellria, 'lumarraqegtaarnek qesurlinek tunenialria, Thyatira-rmiu Agayutem qigcikestii, taum niicugniakut. Agayutem-llu ircaqruakun elpengevkaraa murilkevkarluki Paul-aam qanellri.

¹⁵ Anglluumariami ilani-llu, kaigavikaakut qanerluni, “Elpecen̄i nangrunailkuma piciukuma-llu Atanermun, enemnun tailuci tuanetniartuci.” Qacucesqumanrilan-llu niitarput.

Paul-aam Silas-aam-llu Itengqallrak Philippia-mi

¹⁶ Cat iliitni piicagyartullemten̄i, nall'arkengukut neviarcarmek caarrluum itrumavikekiinek ciunerkarcutulimek. Tauna atanrin tukuurutek'laraat ciunerkarculallrakun.

¹⁷ Taum Paul-aaq kingunrakun maligtaa wangkuta-llu, qayagaluni, “Ukut angutet Agayutem Quyinrulriim kevgaqai, apertuutaitkut-llu anirtuumallerkamten̄ek.”

¹⁸ Tuaten pilartuq ernerni amllerni. Tau͡gaam Paul-aam niitellnguyagucamiu, tuiggvikluku anernerrluk qanrutaa, “Ellimerturamken atrakun Jesus-aam Christ-am, taumek ani.” Egmianun-llu an'uq.

¹⁹ Atanrin-llu elpekngamegteggu akingutkelallerteng tayimngurtellinian, Paul-aaq Silas-aaq-llu teguagket tuneniarvigmun-llu qamurlukek atanernun.

²⁰ Cuqcisten̄un-llu ullaullukek qanerluteng, “Ukuk angutek Jews-aak pillugqeqapigtait nunaput.

²¹ Elitnaurilutek piciryaranek wangkutni inerquusngalrianek, atuqauvkenateng-llu wangkutni Roman-aarmiuni.”

²² Yugugaat-llu quyurrvikagket, cuqcistet-llu aturakek allgurait matarrlukek, piqertuaresqellukek-llu.

²³ Amllernek-llu qiurqumariamegtekek, itercivigmun itertagket, qaunqista-llu ellimerturluku pengegnairlukek pisqellukek.

²⁴ Taum-llu ellimertuumacimitun itertak iluqlirmun cingillekegnegun kalivnercirlukek.

²⁵ Unuum-llu qukallrani Paul-aaq Silas-aaq-llu piicagtuk yuarutnek-llu aturlutek Agayun nanrarluku. Itercimallgutkenka-llu niitagket.

²⁶ Alqunaq-llu nuna pekterpagtuq, iterciviim tusnganri tuaten arulalluki; egmian-llu ikirtuqat angpartut ellmeggnek, itengqalriit-llu kalivnerit au͡g'artut.

²⁷ Iterciviim-llu tarikestii tupakarluni tangrramiki ikirtuqat angparingaluki, nuussirpani amua ellminek tuqutnaluni, itengqalriit qimagyukluki.

²⁸ Tau͡gaam Paul-aam qayagpagaa, qanerluni, “Agu, aknircaqunak elpenek, wani-wa wangkuta tamamta maantukut.”

²⁹ Tua-i-llu kenurramek pisqelluni itertuq iluqlirmun, Paul-aam Silas-aam-llu ciuqerragnun palurrluni uuleggluni-llu.

³⁰ Itercivigmek-llu anevkarraarlukek aptak, “Ukuuk, qaillun pilua anirtuumaciqsia?”

³¹ Tua-i qanrutaak, “Atanermun Jesus Christ-amun ukvera, tuaten anirtuumaarkauguten, ilaten-llu.”

³² Tua-i Agayutem qaneryaraa elliinun qalarutkaak enelgutainun-llu.

³³ Unugmi-llu tuani piqertuarumalkek erurai, nutaan-llu angllurcetevkarluni, ilani-llu.

³⁴ Eneminun-llu taillukek, nerevkarak, angnirluni-llu Agayutmun ukvengameng ilani-llu.

³⁵ Ercan-llu, Atanret ayagcetaat tegusta, alerqurluku, “Angutek taukuk ayagcecikek.”

³⁶ Qaunqistem-llu Paul-aaq mat'umek qanrutaa, “Atanret antesqaicetek, taumek ayagtek umyuarniurpek'natek.”

³⁷ Tau͡gaam Paul-aam kiugaa, “Piqertuallruitkuk camek pitaunanuk, Roman-aarungramegnuk, itertellrulunuk-llu, waniwa-qaa tau͡gken anteqatarlunuk iirturluteng? Qang'a! Ellmeggnek tailuteng ancarturlitkuk.”

³⁸ Tegustet-llu qanrutkaat man'a atanernun. Taukut-llu umyuarniullagtut niicameng Roman-aaruciagnek.

³⁹ Tungaunateng-llu anesqessarturagket, anullukek-llu, kaigaviklukek tuaken nunanek ayaasqellukek.

⁴⁰ Itercivigmek-llu anngamek, Lydia-m eniinun itertuk; tangrramegneki-llu ilatek caceturqaurakek ayaglutek-llu.