Acts 11 - Yupik Bible

¹ Judea-mi uitalriit apostle-aat ukverumalriit-llu niitut Jews-aarunrilnguut ciuniuriciatnek Agayutem qaneryaraanek.

² Peter-llu Jerusalem-aamun tekican nuugiryaram piciryaraqestain qanemyuugautaat,

³ qanerluteng, “Nuugiumanrilnguut ilalilaraten nerellgutekluki-llu.”

⁴ Peter-aam tau͡gaam nalqigutai ca tamalkuan qanrutekluku ayagniqarraallranek, qanerluni,

⁵ “Joppa-mi uitalua piicallemni nalluyaakellruunga, tangrruarlua-llu assigtamek atralriamek 'lumarrarmek kangiramikun cetamanek uskurarluni, ciuqamnun-llu tull'uni.

⁶ Maaten meciknaurluki tangrranka ungungssit cetamanek ipilget, qunguturat yuilqurmiutaat-llu ciissit-llu.

⁷ Erinamek-llu niillua wangnun qanelriamek, ‘Peter, makten, nalaciluten-llu neri.’

⁸ Tau͡gaam kiullruaqa, ‘Qang'a, Ataneq, wani-wa elluanrilngurmek nerqaqsaitua menuulriamek-llu.’

⁹ Tau͡gaam erinam qanrutenqigtaanga pakmaken qilagmek, ‘Agayutem menuirutellra elluanrilleksaqunaku.’

¹⁰ Pingayurqunek tua-i waten piuq, ataam-llu taukut tegumaut pakmavet.

¹¹ Tuani-llu angutet pingayun enemun uitavimnun tekitut Caesarea-mek ayagcecimalriit ullaglua.

¹² Anernerem-llu qanrutaanga maligcesqelluki nalirrugtevkenii. Ukut-llu angutet arvinelgen wanelnguut ilakellruanka, angutem-llu taum eniinun tekitukut.

¹³ Elliin-llu qanrutaakut an'gilamek tangellruniluni enemini nangengqalriamek, taum-llu qanrutaa, ‘Joppa-mun-gguq ayagcecikina aqvavkarluku Simon-aaq tauna Peter-aamek at'lek.

¹⁴ Elliin qaneryaramek qanruciiqaaci anirtuutekarpenek, enelgutvet-llu tamarmeng pikaatnek.’

¹⁵ Qalarucamki-llu Anernerem Tanqilriim tutai, imutun wangkutnun tut'eqarraallruciatun.

¹⁶ Atanrem-llu qaneryaraa neq'akaqa qanrutkelallra man'a, ‘John-aaq angllurcecilartuq mer'mek, tau͡gaam elpeci anglluumaarkauguci Anernerkun Tanqilriakun.’

¹⁷ Taumek Agayutem cikiaki wangkucicetun pitarrluki ukveqarraanemten̄i Atanermun Jesus Christ-amun, calua wii Agayun asgurakciqsia?”

¹⁸ Makut Peter-aam qanellri niicamegteki qanerviitut, Agayun-llu nanraraat qanerluteng, “Tua-i Jews-aarunrilnguut-llu Agayutem cikillinii umyualinqigtem̄ek unguvallerkaatnun.”

Gospel-aam Qalarutkumallra Cyprus-aami Antioch-ami-llu

¹⁹ Imkut tau͡gaam Stephen-aam tuqutellra engelekluku nangcimalriit yaaqvanun sekavtut Phoenicia-mun tekilluteng Cyprus-aamun-llu Antioch-amun-llu, qaneryaraq qalarutekluku Jews-aanun tau͡gaam.

²⁰ Tau͡gken ilait Cyprus-aarmiut Cyrene-armiut-llu Antioch-amun tekicameng, Greek-aat-llu qaneryaraqegtaarmek qalarutait, Atanermek Jesus-aamek.

²¹ Atanrem-llu pinian ikayuumakai, yugugaat-llu ukvelriit, Atanermun caugut.

²² Tuaten piciat qaneryarauluni Jerusalem-aarmiut ukverumalriit ciutaitnun tekituq, taukut-llu Barnabas ayagcetaat Antioch-armiunun.

²³ Tekicamiki Agayutem-llu naklekicia tangrramiu quyatekai qarutaarai-llu tamalkuita Ataneq kevgiuresqelluku pektayiinaki.

²⁴ Wani-wa ellualriaruami, Anernermek-llu Tanqilriamek pingqerrluni ukvermek-llu. Atanermun-llu ukvelriit amlleriut patagmek.

²⁵ Tarsus-aamun-llu ayagtuq Saul-aaq yuarluku.

²⁶ Nataqngamiu-llu Antioch-amun ut'rutaa, allrakumi-llu ataucimi agayuviit ilalilarakek yuut-llu amllelriit elicungcalarakek. Tuani-llu Antioch-ami ukvelriit Christian-aanek aterpagteqarraallruit.

²⁷ Taum nalliini prophet-aat tekitut Jerusalem-aamek Antioch-amun.

²⁸ Iliit-llu Agabus, Anernermun pisqumacimitun nangertuq, qanrutekluku piitnaq tekitarkaq nunanun. Tamana-llu piciurtuq Claudias-aaq atanrullrani.

²⁹ Taumek elitnaurat umyuallgutekluteng, picirkiullruut pingqerrutacimegcetun tuyuryugluki ilateng Judea-melnguut ikayuutekaitnek.

³⁰ Tuaten-llu piluteng, ciulirneritnun ciunicetait Barnabas-aakun Saul-aakun-llu tuyuqluki.