Acts 10 - Yupik Bible

Peter-aankuk Cornelius-aaq-llu

¹ Caesarea-mi-llu yugtangqellruuq Cornelius-aamek at'legmek, atanirturilriaruluni anguyagten̄i, Italian-aarmiut anguyagtaitni.

² Yuk ellualria, Agayun-llu qigcikluku yuulria enelgutetuumarmi, kusgurtarluni yugnek, Agayutmun-llu piicagglainarluni.

³ Ellii erenrani tangrruartuq, sass'aq pingayunun tekilluku. Agayutem an'gilaanek itellriamek ellminun qanerluni, “Cornelius-aaq.”

⁴ Elliin-llu tangvagaa, alingluni-llu qanrutaa, “Camek pisit, Ataneq?” Kiugaa-llu, “Piicauteten caliaten-llu assilriit mayurtut Agayutmun nallunaunateng.

⁵ Taumek ayagcecikina Joppa-mun, aqvavkarluku, Simon, tauna Peter-aamek at'lek.

⁶ Ellii tauna allanruuq Simon-aami qatviistem̄i imarpiim cen̄iini enelegmi.”

⁷ Qalarutestellran-llu an'gilam unicani, Cornelius-aam pistegni taisqak anguyagta-llu ellualria nayurtem̄i iliit.

⁸ Makunek-llu tamalkuitnek univkautai ayagcelluki-llu Joppa-mun.

⁹ Unuaquan-llu, ukut ayallratni nunat ciuneteng yaaqsinrirluki, erenrem qukaani, Peter-aaq mayullruuq enem qainganun piicagyarturluni.

¹⁰ Kaigami-llu neryuumirtuq. Keniutellratni-llu nalluyaakuq.

¹¹ Tangrruartuq-llu qilak ikircimaluku, assigtaq-llu 'lumarraq pakmaken atrartuq cetamanek kangiramikun uskurarluni.

¹² Tauna imangqertuq ungungssinek ayuqenrilngurnek cetamanek ipilegnek, ciissinek-llu, yaqulegnek-llu.

¹³ Erinam-llu qanrutaa, “Peter, makluten, nalaciluten neri.”

¹⁴ Tau͡gaam Peter-aaq qanertuq, “Qang'a, Ataneq, wani-wa qigcikumanrilngurmek nerqaqsaitua menuulriamek-llu.”

¹⁵ Erinam-llu cali qanrutenqigtaa, “Agayutem menuirutellra elluanrilleksaqunaku.”

¹⁶ Pingayurqunek tua-i waten piuq. Ataam-llu assigtaq tauna pakmavet mayurtuq tangrruunrirluni.

¹⁷ Peter paqnayullrani tangrruallmi caucianek, tangerrluku angutet Cornelius-aam ayagcetellri, apyutekngamegteggu Simon-aam enii, amiigmun tekitut.

¹⁸ Qayagaluteng-llu apyutkaat Simon Peter-aamek at'lek tuanlucianek.

¹⁹ Tangrruallni cali umyuaqnginanrani, Peter-aaq Anernerem qanrutaa, “Tangerrluku, angutet pingayun yuaraatgen.

²⁰ Taumek nangerrluten atraa, maliggluki-llu nalirrugtevkenak, wani-wa wii ayagcecamki.”

²¹ Peter-llu atrartuq angutnun taukunun, qanrulluki-llu, “Tangerrluku, wiinga wani-wa yuallerci, cassurluci tekiceci?”

²² Kiugaat, “Cornelius-aam, anguyagten̄i atanrulriim, angutem ellualriim, Agayutem-llu qigcikestiin, Jews-aat-llu tamarmeng elluakek'ngaata, an'gilam ellualriim ellimertuani ullaasqaaten eneminun-llu taisqelluten qaneryaramek elpenek niitnaluni.”

²³ Tua-i itresqai allaneqluki-llu. Unuaquan-llu makcami maliggluki ayagtuq. Ilait-llu ukverumalriit tuaken Joppa-mek maligutut.

²⁴ Unuaquan-llu Caesarea-mun tekitut, Cornelius-aam-llu utaqaluki uitauq tungayani-llu quyurtellruluki yugnikekni-llu.

²⁵ Itran-llu Peter, Cornelius-aam pairrsaagaa palurrluni-llu ciuqerranun ciktaarvikluku.

²⁶ Peter-aam tau͡gaam nangertaa qanrulluku, “Nangerten, allaunritua tau͡gaam yuugua.”

²⁷ Qalaruyucamek-llu itertuk, quyungqalriit-llu yugugaat tangrrai.

²⁸ Tua-i qalarutai, “Nallunrilucirpecetun Jews-aarulriim ilaliqaunricaaqai Jews-aarunrilnguut, allanruqauvkenani-llu ellaitnun. Tau͡gaam Agayutem ayuqucingevkaraanga yuk kituungraan elluanrilkesqevkenaku menuukesqevkenaku-llu.

²⁹ Taumek nalirrugtevkenii ullagamci, pisqumiivcia, casqellua tua-i taisqececia?”

³⁰ Cornelius-aam kiugaa, “Erenret maa-i cetamaurtut, watuatun-llu sass'aq ellinrakun, sass'at pingayuat piicagyaraqa tuani atuamku enemni, alqunaq angun qitngirnarqelrianek aturalek ciuqamni nangengqauq,

³¹ qanerluni, ‘Cornelius-aaq piicallren niicimauq cikiuteten-llu nallunairumaut Agayutem ciuqerrani.

³² Taumek ayagcecikina Joppa-mun, taisqelluku Simon tauna Peter-aamek at'lek. Ellii allanruuq Simon-aami qatviistem̄i, imarpiim cen̄iini enelegmi.’

³³ Tamaa-llu ullagcetamken, tua-i quyanarquten tekicavet. Tamana pitekluku waten amllertaluta quyungqaukut. Agayutem takuani niitnaluki Atanrem qanresqellri elpenun.”

³⁴ Peter-aam-llu qalarutai, “Agayutem ilumun yuum taungucia catkeksaitaa,

³⁵ tau͡gaam qaneryarallgutkenrilengraata, qigcikesten̄i, elluamek-llu calilriit, ciuniularai.

³⁶ Qaneryaraqegtaar taivkallra Israel-aam kinguvrinun, uitanqegcitkaq qanrutekluku, Jesus-aakun Christ-akun, cam tamarmi atanrakun.

³⁷ Qaneryaraqegtaar tauna nallunrilkessi, Judea-mi tamiini, qaneryaraurtelleq Galilee-ami ayagnirluni John-aam angllurcecisqutii engelekluku.

³⁸ Jesus-aaq-wa Nazareth-aarmiu tauna qanrutkumalria Agayutem mingullra Anernermek Tanqilriamek pinimek-llu. Taumek ullagtaarut'lartuq takumcukiluni anirturiaqluni-llu tuunrangayiim nangeskainek, wani-wa Agayutem nayuani.

³⁹ Wangkuta-llu nallunairisten͞guukut calillrinek tamalkuitnek Jews-aat nuniitni Jerusalem-aami-llu. Tau͡gaam ellaita tuqutellruat napamun agarrluku.

⁴⁰ Tauna Agayutem unguircetaa erenret pingayuatni alairtelluku-llu nallunaitqapiggluni,

⁴¹ tamalkuitnun pivkenaku tau͡gaam nallunairtekainun Agayutem pisqumakainun wani-wa wangkutnun, nerellgutkellrinun mellgutkellrinun-llu unguillran kinguani.

⁴² Elliin alerquraakut yugnun qaneryariuresqelluta apertunqegcaasqelluku-llu tauna Agayutmun cingumaniluku, qanercetaaristen͞gusqelluku unguvalrianun tuqumalrianun-llu.

⁴³ Tauna-llu prophet-aat tamarmeng nallunairutkellruat, elliin atrakun ukvelria au͡g'aricimaarkauniluku.”

⁴⁴ Peter makunek qalarrnginanrani, Anerneq Tanqilria tut'uq niitestainun tamalkuitnun.

⁴⁵ Peter-aam-llu malii, Jews-aat ukverumalriit alangaartut Anernerem Tanqilriim tus'ucianek Jews-aarunrilengraata.

⁴⁶ Niicamegteki-llu qaneryaralinqiggluteng qalartellratni, Agayun nanrarluku.

⁴⁷ Peter-aam-llu qanrutai, “Kia-qaa yuum mer'mek qunukuciiqaakut angllurtessuutekaatnek ukut Anernermek Tanqilriamek pingellret wangkucicetun?”

⁴⁸ Tua-i anglluusqai Jesus-aam Christ-am atrakun. Ellaita-llu unayaqaat uitasqelluku ernerni qavcini.